Ростов область йаланакIуа Каменск-Шахтинский къала йауу хъахIара гIагра мурад змам «Асоциал гIаджвыквцIараква рыжвлара квта» автоном адкIылари АААКи жвлара проектлыхрала апроект апкъ йтата рылшараква адыркIылтI.
«Асоциал гIаджвыквцIараква рыжвлара квта» автоном адкIылара йацдырхъйауа апроект апкъ йтата асквш 2025 агIан йапхъахауата йъацаз ПакIващ кыт акIвпI. Ауаъа гIвымшкI руацIа жвлара проектлыхра ащатаквала тшыбжьара акIвшан чкIвыныргIа йлырхыз апщпроекткI йрыуата закI гIалырхтI.
«Асоциал гIаджвыквцIараква рыжвлара квта» адкIылара апроект «НКО алахIарта тып: Апсны» РФ апрезидент грантква р-Фонд йакIвнаршаз анкъвакъвра апны йайгIайтI. АгIвадкIыларакI рацынхара АААК асквш 2024 агIан чкIвыныргIа руысквали спортли Апсны Республика АкъральыгIва комитет йацта йдырхъйуз апроект алшараква ауацIнахитI.
Жвлара проектлыхрала анхара апкъ йтата апхьартаква рпны йдырхъйуш агIаджвыквцIарала йгIанымхауата сынчIва «НКО алахIарта тып: Апсны» проект апны йгылу ахачIвква рырхъйарагьи гIалахIуштI – ЩащикIвар, Аацы, ПакIващ йгьи Уаквым кытква рапхьартаква рыщатала жвлара уатыкв агвныргIвра ахъазла аъащаква гIаныршара.
АпщапхьартакI рпны атшпсщара, йапшым атшыбжьараква, аларпшраква йырзалху жвлара уатыкв адыргалуаштI. Апроект йазалырхуа апещква гIадыршIыцра ахъазла йатахъхуш ауыхвага пкъыгIваква рхвгIарныс лшара гIарауаштI, ауи амщтахь ауи ауатыкв адыргалуата ауи йатахъхуш зымгIва рхвгIуштI. РгIапсгата, псауатлата, техниката йырхвгIуш щаквзыргылуаш дара апхьагIвчва ракIвпI, йауа ухIварыквын ауи ауатыкв апны уыста йакIвшуш, ргвы йту дырхъйара ахъаз йыртахъхуш ахъазла джьауап зкIуаш дара ракIвпI. Араъа йатахъхарныс ауаштI апроекторква, аноутбукква, айшва йадзхъачIвата йызсуа ахъвмарраква, псауатла, квчIварта датшагьи щарда.
ПакIващ кыт апны атренинг гIвымшкI йакIвшатI: йапхъахуз амш атеория ддырдыртI, йгIвбахуз атшын чкIвыныргIа гвып-гвып тшыршан рпроектква лырхуан. Ауи амщтахь аэкспертква рыцIа йыргвапхаз гIалырхтI.
Апроект зырцауа дрыуата жвлара проектлыхрала атшыбжьара йалаз Аслаханов Рустам апроект чкIвыныргIа швабыж йрымагIальаматта йхIватI.
«ХIара апхьагIвчва тшырбжьата, дырра чIыда раута ажвлара проектква йрылалырныс лшара ъарауаш ауатыквква гIанхIыршитI. ЙшхIылшауа апшта ауи анхара анадзара рыцIа йшщтIыхIхуаш хIащтапI. АцIайква ари ауыс зджьара йгIанымхауата йрымагIальаматпI, ауат апроектква ррыхIазырра цIолата йшалалуа, ауи лахIварата йгIарыланацIауа угвы йаладырхIитI. Ауат гвыбзыгъарчIвачIвапI. Ауи хIаргьи хIаргвышхвитI, хIацынхара алшараквагьи дара асабиквагьи рылшараквагьи апхъахьыла йшрылахIуш йазхъаунарцIитI», – йгIаликIгIатI ауи.
Жвлара проектлыхрала аъачIвагIагIвчва Абидова Наиди Цквитариа Мати рдырраква чкIвыныргIа йрыцагIвыршатI, нархара гIалырхта ауи ахчата йаквшвуш рпхьадзарныс, апроект лырхта ауатыкв йгIатаргарныс йырцхърагIатI.
ЧкIвыныргIи спорти тшауацIдрыхрала АААК ахъвшара аъачIвагIагIв Квициниа Есма апхьагIвчви амодераторкви абагвынгIвуата йшылбаз гIалхIватI, апроект ахча азгIауызщтуа аорганизациягьи аразыра ажваква азыналырхатI.
«ДзачIвсабийызлакIгьи ажвлара проект апны йара йымч зквхъуш закI йызгIауитI, йаргьи закI шимагIну тшазидыруата дцитI. Апроект дъадзадынхалуа апхьагIв йапшым анархараквала апхьарта апны дызхъысуа адырраква йызгIаршIыцхитI, аинформация даланхауа, хачIвы йыргылта ауи йырхъйауа тшибжьитI. Ауатыкв йгIатаргаз апщпроекткI йрыуата ари азын йызцыркIыз спорт-згIвадара нархара зму апроект акIвпI. ХIаргьи «Асоциал гIаджвыквцIараква рыжвлара квта» адкIылара хIапхьагIвчва йъагIарцхърагIуш ахъазла швабыж хIазыразпI. Аспортпещ арчIаджьри спорт ъамапсымала йадгалри – дара апхьагIвчва йыртахъыз уыспI, йаргьи ауат ргIаджвыквцIара гватрадъа йгьгIанымхатI, ауи йацыркIтI», – лхIватI Квициниа.
МшкIыла рыцIа пасата АААК ауысхарта апны Адуней апсуа-абаза конгресси Ростов область йаланакIуа Каменск-Шахтинский къала йауу хъахIара гIагра мурад змам «Асоциал гIаджвыквцIараква рыжвлара квта» Россия автоном адкIылари рацынхара йазынархаз брифинг акIвшатI. Ауаъа апхъахьыла чкIвыныргIи арыпхьари йырзынарху агIаджвыквцIараква йрыцкIрала ангIалра мачвы ацIарцIатI.
АААК ЙхIаракIу асовет аунашвачпагIв Эгьзакь Мусса апроект Россия апрезидент грантква р-Фонд йъацнакIыз а-Конгресс анхара дахIвра шаму сабапрагьи шалу йшаквшахIатхауа гIаликIгIатI.
«Апсуа кытква рпны чкIвыныргIа ргIаджвыквцIараква тшауацIдрыхрала хIпроект Россия апрезидент грантква р-Фонд йъацнакIыз – ауи а-Конгресс агвып рынхара шабгу дахIвра шаму, йхъадахугьи – хIара хIынхаща амаль сабапра шалу, Апсны абзазара апны апсахра дуква йрыщатахарнысгьи йшауаш йаквшахIатхитI. МагIын ду амапI Россия йауу «Асоциал гIаджвыквцIараква рыжвлара квта» йрыцхIырхъйауа апроект России Апсни ркъральгIв джьгарква аргваныта йъацыннархушгьи – ауи айщчвара зызбжьу агIвкъралькI рацынхара анархара шIыцква рзыгIахънатIуаштI», – йгIаликIгIатI Эгьзакь Мусса.
Жвлара проектлыхра ащатаквала атшыбжьараква асквш 2024 йгIашIарышвта Апсны акъалакви акыткви рапхьартаква рапхьагIвчва ахIбачва рыхъазла йакIвшитI, ауат апхьагIвчва апроект нхара йшалалуаш, йхъвыцуа штшадрыщцуш, рыршIыйара йшаздырхIуш йазынхитI.
швталра йа тшаншвцIара атахъыпI.