«Ахьа» – Адуней апсуа-абаза конгресс йджвыквнацIаз проект шIыцпI, ауи апкъ йтата цIла 200 райхIа ларцIахьатI.
ХьыцIла (йа адгьылраса, каштан, апсуаква ауи «ахьа»-хIва йапхьитI) – хвы зму мшIыжвлапI, йзарарчу ахIапшхвыпшква йгIарылцIла адуней апны ауи ъагIайуа аштаква йрылдзгIитI. Йыдзныс шварагIварахатI ауи Апсны апынгьи. Араъа ахьыцIлаква метр 500 йгIашIарышвта метр 1000-дза ахIагIараква ныркIылитI. Ауат йрыуата адгьыл тшыткI АААК апроект йазалырхтI.
АцIла шIаква лацIарала ашIыпIа хъвшараква рыцынхарала АААК ахъвшара агIаджвыквцIара АААК ЙхIаракIу асовет Эгьзакь Мусса дайгвыргъьатI йгьи йацикIтI. Аэкологква, агрономква, АГУ агроинженер факультет астудентква йгьи акурсант шIаква ргвбзира рымата а-Конгресс анхагIвчва аэкология проект дырхъйатI.
АшIыпIа хъвшараква рыцынхарала ахъвшара аъачIвагIагIв Симониа Херсон апроект шгIаларгази йшадынхалуи гIайхIватI.
«Ауи цIыпх хIхъа йгIаташватI. ЙцIыхъвахауа агIамта хIара щардала йыгIгIитI ахва зарарчква ззынадзауа апальмаква, акьашвайква, ахьыцIлаква шгIвауа. АъачIвагIагIвчва ари ауыс ажвлара ргватра азынадырхауа рбжьы дыргитI. АААК агвыпгьи хъатакIла йгIанымхауата ауи ркъару аларцIарныс ртахъхатI», – йхIватI ауи.
АцIлаква ларцIара апхъала мызквакI руацIа тшазадыргалтI. Апроект йахъпшылквауа Апсны анаука-рхъвыхырта бна станция (АБНИЛОС) анхагIвчва йрайкьангьаштI, ауат цIла лауцIа йъауаш адгьыл гIалырхныс йгIарцхърагIатI, ауыс тамамта йшдырхъйушла йгIарылабжьатI. Адгьыл ауысла СогIвым район абна млыкврхIарта йрангIалтI. Тшъадзадыргалуаз ахьыцIлаква анахьанат агIайыраква гIарбжьауыршвара шатахъу гIардыртI. Ауи йгIалцIла хьыцIлакIипхьадза датша хгIайыракI адзхъата йларцIатI.
«ЙцIыхъвахауа асквшы 100 руацIа адуней апны ахьыцIла ыквызхыз ахъварп зарарчы йачвыхчара ахIатырла ахьыцIла анахьанат амшIыжвлаква йрылакъачIвахра атахъыпI. АцIла шIаква уырхьпшра атахъыпI, ауат йапхъахауа ахвысквша руацIа зарар радзата уырцымхърагIазтын йгIварныс закIы гьазхIвам. Ауаса ауи азаман згIвадата йнацIсуа ацIла зарар гIадымсылхуата йара-йара йгIайитI», – ауыс гIахIгвынйыргIвытI абна млыкврхIара АкъральыгIва унашвахъцIарта аунашвачпагIв йтарагылыгIв Мелкумов Камо.
«Ахьа» проект агвынзыргIвуа Симониа Херсон ауи архъйара збзиру зымгIва йразыра ажваква рзынайырхатI.
«СырзыразпI апроект архъйара апны йгIахIцхърагIаз Апсны Республика ахъахчара а-Министерства, Апсны анаука-рхъвыхырта бна станция (АБНИЛОС). Ауыс тшъадзазадыгIгалуаз шIыцра щарда гIдыртI. КIьыдата ажва пхаква расхIвра стахъыпI гвышхвара ду злата апроект йгIалалыз къвырльыкъв зхауа акурсанткви АГУ агроинженер факультет астуденткви», – йгIацицIатI Симониа.
Студент йгьи курсант 30-гIв райхIа АААК агвып йрыцта цIла 200 райхIа Хъахь Ешера кыт апны йларцIатI. ДзачIвызлакIгьи ауи анхара къаругьи гIайыланацIатI йгвгьи йаланархIатI.
«ХIара йапхъахауата Адуней апсуа-абаза конгресс апроект хIалалитI. ЙахьчIва ари йырхчауа ашта йгIвбахауи йхпахауи акурсква рапхьагIвчва гIайтI. Ауат рыхъаз ари акция – йгIалырхыз аъачIвагIа йазызрыщцауа, бзи йдзырбауа уыспI. Анчва дырзыразхатI АААК анхагIвчва ари йапшу уыс бзи закIыла хIацхърагIарныс лшара ъагIахIыртыз», – йхIватI АГУ агроинженер факультет апны агрономия акафедра арыпхьагIв Арджениа Астан.
«Ахьа» проект йыдзуа агIайыраква гIащаквыргылхра, чкIвыныргIа апсабара, йалкIгIата апсуа уагIахъа ргвбайара апны гыларта ду зкIуа агIайыраква йшрызсакъуаш йазыбжьара мурадта йызму проектпI. АдгалагIвчва йыргвыгъапI йларцIаз абна шIа йахъпшылларныс. ЙащтагIайуата ацIлаква адзын агIан йларцIарныс йаквдырпшитI.
швталра йа тшаншвцIара атахъыпI.