Адуней апсуа-абаза конгресс Апсны аквтанай апхьартаква рапхьагIвчва пычIв айсра дырра рытрала апроект джвыквнацIахтI.
Бганба Щазина
Апроект АААК ашIыпIа хъвшараква рыцынхарала ахъвшара йгIаджвыквнацIан Апсны Республика ахъахчара а-Министерстви «Апсуа хысырта клуби» йацыркIтI.
Ауи мурадта йамапI чкIвыныргIа айсра ъачIвагIаква йырпщылу рдырраква йрылархIара, айсра апхьартаква рпны йапхьарныс разыгIальаматра гIаршIыхара, йзгIваду абзазаща йгIаланаркIра.
Апроект апкъ йтата йапхъахауата уыс анадыргал асквш 2024 февраль агIан акIвпI. Ауищтара ауи йгIаланакIтI ареспублика ахвкыткI – ПакIващ, Атара, Цандрыпщ, Дурыпщ, Мгвыдзырхва – рапхьагIвчва.
СынчIва апроект зымгIва рапхъа йгIалалтI Сарсаниа Дауыр йыхьыз зхъу Гвып аквтанай апхьарта ажвыхвыгIвапхьагIвчва. Ауат зымгIва «Апсуа хысырта клуб» апны йгIарылабжьатI, абджьар ушалаъабуш ахабза хъадаква гаргвындыргIвытI. Ауи амщтахь дасузлакIгьи акьашана дайхсныс лшара йырттI.
«АААК ЙхIаракIу асовет аунашвачпагIв Эгьзакь Мусса йбзирала зымгIва йрапхъата чкIвыныргIа патриотта йбжьара йазынарху апроект хIырхъйарныс лшара хIаутI. ЦIыпх ауи уагIати кытти йгIаланакIыз йгIахIнарбатI апроект чкIвыныргIа шазыбжу, йнардзарагьи шатахъу», – йхIватI АААК ашIыпIа хъвшараква рыцынхарала ахъвшара аунашвахъцIагIв Жьыба Дмитрий.
Апроект лшарата йгIанарыцIсуа даквчважвауата Гвып апхьарта апны апхьагIвчва пычIв айсра дырра рызтуа Сарсаниа Джьумбер йгIаликIгIатI:
«Ари йапшу апроект апхьагIвчва зымгIва – заджвы дрылымшвтуата – йалазара атахъыпI. ЙалкIгIата – зныбыжьла ар йызшIыртырныс йазынадзаквауа. Йатахъу атеория дырраква ауат апхьарасахIатква рпны йрауитI. Ауаса Апсны апхьартаква зымгIва лшара гьрымам атшарыщцараква акIвдыршарныс. Кьангьаш гьазгIазгуам ачкIвынчва зымгIва ахысра штшазырбжьуз рхъа йшгIатахуш».
Апроектла хачIвыта йгылапI ужвыгьи хвкыткI рапхьагIвчва атшыбжьараква рзадыргалырныс.
швталра йа тшаншвцIара атахъыпI.