Макъымла йырчвыз, аниматорква злаз ларпшра, бамби хъагIа, сабипхьадза йыхъазлагьи согIа – абараса акIвпI агвыргъьахъв шнардасыз Цандрыпщ кыти СогIвым къали рпны йаъу ареабилитация квтаква йрыцIу ацIайква.

ЙшцIасхаз апшта, АААК асабиква ргвыргъьахъв хъада йазынарху ауысква джьгарта йрылаллитI. Асквш 2025-гьи датшата йгьымцатI. Асабиква рхчара амш йазынархаз акция гIвымшкI йакIвшатI. Йапхъахуз атшын адгалагIвчва Цандрыпщ кыт йцан «ХIара хIацыпI» реабилитация квта йыцIу асабиква йрызнашылтI. 

Арыпхьарали жвлара джьгаррали згIвадарахчарали АААК ахъвшара аъачIвагIагIв Хьышба Науыр акция штшазадыргалуаз гIахIайхIвтI.

«Аконгресс агвып Асабиква рхчара адуней мшы йазынарху ауысква йапхъахауата йгьакIвнаршум. СынчIва хIара хъахIара гIагра мурад змам «Асоциал гIаджвыквцIараква рыжвлара квта» адкIылара бзита хIацынхитI, хIпны йынхауа Хагба Изольда лгIаджвыквцIарала ауат Цандрыпщ кыти СогIвым къали рпны йаъу ареабилитация квтаква рпны агвыргъьахъвква радгалра ахча ауысла йацхърагIатI. Ауат йхIыцыркIтI, Россия Федерация апрезидент грантква р-Фонд гIахIцхърагIан гIвреабилитация квтакI рпны асабиква рыхъазла гвыргъьахъв акIвхIыршарныыс хIылшатI», – йгIаликIгIатI ауи.

ЙгIвбахуз атшын агвып зылшараква ахъарысу асабиква ъацIу а-Республика реабилитация квта йцатI. Ауаъа ацIайква уызланахIвауа музыка программи йщардаз асогIа хъагIакви рызпшуан.

 ХъахIара гIагра мурад змам «Асоциал гIаджвыквцIараква рыжвлара квта» автоном адкIылара аунашвачпагIв Моисеева Светлана ари йапшу ауысква магIныта йрыму гIалылкIгIатI.

АнбжьагIври агвы йгIатыцIуа алахIваракви: АААК зылшараква ахъарысу асабиква гвыргъьахъв рзаднагалтI

© АААК

«ХIара хIахьыла йгIауахвырквын – хIара хIызцынхауа ажвлара адкIылара – Адуней апсуа-абаза конгресс – агIаджвыквцIара йацхIкIтI. ХIара хIгвы рахIагьи йалазырхIауа ареабилитация квтаква йрыцIу асабиква насыпла йырчвыз алахъвгIахъасраква ъарыхIтыз акIвпI. Ари йапшу ауысква сквшыкI апны зны ацкIыс щардата йчпалара атахъыпI. Йауа ухIварыквын, арат асабиква дара рыквлагIвчви ран-рабачви рахьыла йахъазымкIва ажвлара рахьылагьи айгвыгIвра, гватра йалкIгIата йазыбжапI», – йгIалылкIгIатI Моисеева.

Аларпшра пшдза асабиквагьи, ауат ран-рабачвагьи, рарыпхьагIвчвагьи йыргвапхатI. АлокI фырква ртурасы йтагылыз аниматорква рхъвмарщали рчгIвычаквали ръамапсымаквали зынла асабиква хъыркъьалтI. АцIайква йшрылшуз апшта йапшымыз анкъвакъвра джьащахъваква йрылалуан.

А-Республика реабилитация квта аунашвачпагIв Данелян Марина агвыргъьахъв адгалра зкъару алазцIаз зымгIва лразыра ажваква рзыналырхатI.

«Аквта анхагIвчвагьи, хIызхъпшылуа асабиквагьи, ауат ран-рабачвагьи рыхьызла ари ауыс хIзадызгалыз зымгIва хIшырзыразу расхIвра стахъыпI. Швабыж кьахвта, гвыргъьара дута йакIвшатI, зымгIвагьи ргвы чIватI. Абараса йадызкIылуа ауысква асабиква рыхъазла, ауат йрызхIара, ажвлара йрылагIващауа йцара ахъазла швабыж магIын ду рымапI», – лхIватI ауи.

Асабиква рхчара адуней мшы ансисквша июнь а 1 йдыртлапIалитI. Ари агвыргъьахъв ажвлара сабипхьадза дхчара, асабиква насыпла йырчвыта, йызгIвадата, ъадаб рыквта, джьауап рзыкIуата йшгIадзынгылуаш апш лшара рзыгIаныршара шатахъу гIаргваланаршвитI.