ХIара хIыхъазла
АшIыпIа хъвшараква рыцынхарала Адуней апсуа-абаза конгресс ахъвшара апхьара сквшшIыц апны «Аимадара» проект джвыквнацIахтI. Апроект йгIвбахауа ашIчIвара апны йапхъахауата амдара йцатI Тванаархув аквтанай апхьарта апхьагIвчва.
АААК КIавкIаз айсра йаладзыз ауагIа рхъмаштылра мшы йазынархаз алалраква йрылан.
АуагIа ргвы абайара гIаузырбауа ачIвыйа? Рыбызшва, рцIасква, ркультура. ЙгIацхIцIапI араъа абанпараква йамырдауамца йгIамгIвайсуа, ауагIа сабап рызгIаугуа йгьи йуыргвыргъьауа уыршIыйарныс лшара гIауызтуа анхараква. «Йбзу ъачIвагIа» – Адуней апсуа-абаза конгресс йапроект шIыцпI. АгIатраква рабаркIыра ацIасква шымдзуаш, хIуыжвгIанчIви культура йахъвыкIта йшаъазлуш апшта знапIквала йацхърагIауа анхагIвчва ъазаква йгIарыквчважвуштI. Швара аъачIвагIаква ртурыхи рымадзакви рыцIа цIолата йыжвдыруаштI, йалныс ауыпI шваргьи ауатква швзычпузтын швапшныс гIашвтахъхарнысгьи.
Асквш 2024 агIан АААК йджвыквнацIауа апроект шIыцква йрыуапI акытква рапхьартаква рапхьагIвчва ажвлара хачIвлыхра ащатаква йырзыбжьара.
Апсуа литература ащатащтIацIагIв, ауагIа руысагIв, апхьахьа Гулиа ДырмытI дангIадрийызищтара сквшы 150 ъацIуа йадахIвуата АААК Гулиа Д.И. йымчыбыжь джвыквнацIитI. Ансимшы хIара агIвгIвы йбзазари йыршIыйари йгIарыквчважвауа агIвыраква швзынатахIцIуштI. Асоцсетьква рпны хIбгъьыцква швырпшла – джьащахъвара щарда швауаштI.
АААК ареспублика апхьагIвчва рзгIвадара рхъвыхрала апроект атаджвыквнацIахтI. Асквш 2024 агIан йапхъахауата йъацаз Гвдауыта район йаланакIуа Уатхара кыт акIвпI.
ЧкIвыныргIи физкультури тшауацIдрыхрала АААК ахъвшара Апсны акыткви акъалакви рпны апсуа уагIахъа хъвмарщаквала атшыбжьараква акIвнаршауаркIвитI.