Анкъвакъвраква ххъвыкIта йакIвшуштI йгьи Апсны акытквакI гIарыларкIуаштI.
Голандзиа Есма
Анкъвакъвра агIахътIра йазынархаз агвыргъьахъв гIахIвра пшдзала йалаз аргылчIвла йгIалагатI, ачемпионатгьи ауи амакъым йтагылтI.
АдгалагIвчва анкъвакъвра йалаквугьи апшыгIвчвагьи сальам рархуата тшырзынадырхатI.
«УахьчIва магIын ду зму уыс хIаквшахIатпI. АуагIахъа хъвмарщаква апсуаква апхъазаман уалагата йрыман, ауат ргIащаквыргылхрагьи швабыж хвы амапI. Ари ауыс адгалра зкъару алазцIаз зымгIва сырзыразпI – акъраль ахъада, чкIвыныргIи спорти руысквала АкъарыльыгIва комитет, Гвынба Адгвыр унашва зхъицIаауа ауагIахъа спорт квпшыраква р-Федерация йгьи Адуней апсуа-абаза конгресс», – йхIватI йгIачважвара апны Апсны а-Президент спортла йкьангьашагIв Ашуба Ахра.
АуагIахъа хъвмарщаква гIащаквыргылхрала апроект йшадынхалуаз гIайхIватI СогIвым йаъу АААК ауысхарта аунашвахъцIагIв Реквава Темур.
«Хысквша руацIа хIара Апсны йапшым арайонква рпны атшыбжьаракви анкъвакъвракви акIвхIыршун, аимҵакьачара йгIаквчважвауа абзазара йгIахъыху фильм гIацIхIщттI, ахъвмарща йапщылата йхIауаз зымгIва цIолата йхIхIырдыруамцара ахабзаква лыхIхтI. Швабыж йгвлахIарапI ареспублика апны арат йрапшу анкъвакъвраква адызгалуа Федерация ъанхауа. АААК ЙхIаракIу асовет аунашвачпагIв Эгьзакь Мусса йыхьызла ари агIаншара пшдзала снашвайхIвахIвитI!» – йхIватI Реквава.
Ацынхара абзира даквгIашIастI ачемпионат асудьяква йрыуазаджву чкIвыныргIи спорти тшауацIдрыхрала АААК ахъвшара аунашвахъцIагв Берзениа Валерий.
«ЧIвырхъа-чIвырхъамцара а-Конгресс агвып Гвынба Адгвыри ари апроект гIалазгаз Пачалиа Алиси рыцта ауагIахъа спорт квпшыраква гIащаквыргылхрала анхара акIвдыршун. Ауи ацынхара йабзирахатI Федерация агIаныршара, ужвы хIара ауи хIацхърагIитI. ХIгвы йтаз гIахIыдахIвтI, ауи бзидздзапI!» – йхIватI Берзениа.
Анкъвакъвраква гвщтIыхра, анбжьагIвыгIа амакIыра рылата йакIвшатI. Ахъвмарраква йрылан СогIвым 1-хауа йгьи 5-хауа апхьартаква, «ЧIлоу», «КвтIол» йгьи Афон ШIыц йауу «Апсар» командаква. АчкIвынчва ркъаруква йырмайгьдзауа рщаласра гIадырбун. СахIатквакI руацIа йнайыз ахъвмарраква рпны ргIарбараква рыцIа йагъьхатI «ЧIлоуи» «Апсари». РыцIа йшIу аспортсменква рквта айгIайра тыргатI СогIвым 1-хауи 5-хауи апхьартаква ргвыпква.
ЙащтагIайуа ахъвмарраква ноябрь а 2 ЧIлоу кыт апны йакIвшуштI.
«Аимҵакьачара» – апсуаква зслуз хъвмаррапI, регби, бейсбол йгьи хвитта абакIра аларцIазшва йаъапI. Акомандаква зыщту атоп рымата йзанкъвакъвквауа рахьыла йхъыста балл рыцIа щардата йшгIарынхуш акIвпI.
швталра йа тшаншвцIара атахъыпI.