Трыкв апсыуа-абаза диаспора цхърагIарата Апсны йгIарщтийыз комплект 1200 йнадзауа агъын чгIвычаква АААК цхърагIара йазыбжу атгIачваква йрыларшарныс ахъазла агвчIагIвчпара адкIылараква йрырттI.
Барганджиа Саид
ЦхърагIара йазыбжу рыхъазла Трыкв апсыуа-абаза диаспора Апсны йгIарщтийыз агъын чгIвыча комплектква агвчIагIвчпара адкIылараква йрыртатI йазалху адресла йшыршуш апшта.
АгвчIагIвчпара цхърагIара ауат адкIылараква йрызтыз Адуней апсуа-абаза конгресс ракIвпI.
«ХIшхъвыцуала, ари йапшу ауысква ужвыгьи цIхъва гьырчпум, – йхIватI АААК архъйагIв секретарь Гицба Инар. – Ауи йапшу агIаджвыквцIараква йгIарылалырныс ахъазла анахьанат адиаспораквагьи тшырзынахIырхуштI. ХIшгвыгъауала, ари агвчIагIвчпара цхърагIара зхъахIара мачIу атгIачваква ззыбжадзу йадамызтынгьи рпсы гIатанакIуаштI».
А-Конгресс анхагIвчва акомплектква жвабапхьадзара йнадзауата арат агвчIагIвчпара адкIылараква йырзыргатI: Согъвым йгьи Согъвым район радкIылара «Апсны уагIа р-Абашта айсра аныкъвадыкъваква рассоциация», «Асквшква 1992-1993 рагIан йакIвшаз Апсны уагIа р-Абашта айсра йалаз апхIвыс ныкъвадыкъваква рассоциация», «Киараз», датшагьи. АчгIвычаква рызбжа Апсны республика репатриацияла аминистерства апынгьи йщтIарцIатI.
«ХIара жвлара комиссия хIымапI, ауат цхърагIара рыцIа йызквнагу гIадрыбергьыльта ачгIвычаква рыртуаштI», – йхIватI репатриацияла аминистр Дбар Беслан ауыс адгалагIвчва дшырзыразу гIацицIахуата.
АцхърагIара ахъазла аразыра ажваква рхIвун ачгIвычаква ззыргуз атгIачваквагьи.
«Сара цгIвы сабичва сымапI. АхIбадза 17 сквша дыртапI, айцIбадза – агIсквша. Схъазы йгIадзынсыргылитI, схъапщыла адуней йхIваджьищтара хвысквша цIитI. Ажва гьалам «Киараз» шгIахIцхърагIауа. УахьчIва хIара зымгIвагьи Трыкв йтабзазауа хIайщчвагьи Адуней апсуа-абаза конгрессгьи швабыж хIырзыразпI йхIызгIаргыз агъын чгIвыча ахъазла. Швыла йгьшвызгIацIажьуам ари ацхърагIара швабыж йшхIыхъваз», – лхIватI «Киараз» адкIылара зцхърагIаз Очамчыра район Лашкиндар кыт абзазагIв Цурцумиа Нани.
АгвчIагIвчпара цхърагIара азбжа Къабард-Балкъар йнадырдзатI, араъа ауи рзыршуштI Апсны апны Абашта айсра зтахъырала йпшцIалта йаладзыз ачкIвынчва ранчва.
Асквшква 1992-1993 рагIан йакIвшаз Апсны уагIа р-Абашта айсра йалаз апхIвыс ныкъвадыкъваква рассоциация аунашвачпагIв Тарба Ларисагьи ацхърагIара адгалагIвчва дшырзыразу лхIватI.
«Сара тIакIвгьи йджьасщатI. А-Конгрессгьи ацхърагIара адгалра зкъару алазцIаз зымгIвагьи хIырзыразпI аквырджь-апсыуа айсра аветеранква, апхIвыс ныкъвадыкъваква согIа ъахIзырчпаз ахъазла. ХIъархъмаштылуа швабыж йхIгвапапI», – лхIватI Лариса.
СынчIва сентябрь мыз агIан АААК ЙхIаракIу асовет йалу ХIапIатI АхIмад йгIаджвыквцIарала Трыкв апсыуа-абаза диаспора йадыркIылын йгIарщтитI чгIвыча пхата комплект 1200 Апсны апны цхърагIара йазыбжу атгIачваква рыхъазла. Ауат йрыуата 400 саби чгIвычапI, 250 – хъацIа чгIвычапI, 550 – пхIвыс чгIвычапI. Октябрь а 4 атшын ачгIвычаква Апсны йгIадырдзатI. АчгIвычаква зымгIвагьи шIыцпI, архарджьыгIвчва ауат рейша афабрикаква рпны йадыргалын йгIапшцIырщттI. Абар ауат афабрикаква рыхьызква: Şik Örme, HSM Tekstil, Karadağ Tekstil, Hayber Tekstil, Dark Tekstil, Espira Tekstil, Anemon Tekstil, Berfin.
швталра йа тшаншвцIара атахъыпI.