АААК йгьи Апсуафед Трыквшта апны рацынхарала хачIвы лырхтI

АшIыцраква 23.10.2018 12:10 21974

АААК йгьи апсуа культура квтаква р-Федерация рунашвачпагIвчва Астомбыль апны йанйан йшацынхуш йаквчважватI, ацацхърагIара ауысла ашвъагьи мачвы ацIарцIатI.

Барганджиа Саид

Адуней апсуа-абаза конгресси апсуа культура квтаква р-Федерации (Апсуафед) рунашвачпагIвчва ашвахьа Астомбыль апны рацынхари рацацхърагIари руысла ашвъа мачвы ацIарцIатI – ари апш хабар гIахIирадзатI АААК архъйагIв секретарь Гицба Инар.

Ауи йшихIвазла зымгIва йрапхъата ангIалраква ззынарху йазаъу аткъвымква ращтаныкъвара гIащаквыргылхра, Трыквшта йбзазауа апсуа-абаза диаспори ауат рыщайдза ъану рпсадгьыли рабадырра рыбагъьара йгьи тшауацIнарыхра ракIвпI.

«Апсуа-абаза йгьи аубых уагIахъахъаква рацзакIыра, рылкIгIараква, рцIасква, рхабзаква гIащаквыргылхрала нхара акIвшуштI», – йхIватI Гицба.

ЙхIаракIу асовет аунашвачпагIв Эгьзакь Мусса АААК ахабарргарта портал ахъазла ари агIаншара даквчважвауата анйара апны агIвыжвлара адкIыларакI рацынхара ауысла ахачIвква лырхныс шрылшаз йхIватI.

«ХIацыта, азаджв йчпауа азаджв йдыруата, хIуагIа ъабзазауа акыткви акъалакви рыцIа-рыцIа йгIаланахIыркIуамцара хIынхуштI. Сара хIазазаъащаква рыцIа-рыцIа йбагъьахушта сгвыгъитI. ХIара тгIачва дукIта хIалапI, йаргьи хIуысква шгIахIдахIвуаш йазхъахIцIитI», – дацIачIвагъватI Эгьзакь Мусса.

Апсуафед ауысхагIвчвагьи а-Конгресси дари рацынхара ауагIахъа гвбайара гIащаквыжьра ауыс апны щарда гIанацIгIушта йгвыгъитI.

«Апсыуакви абазакви зымгIва хIъанызлакIгьи хIкультура, хIцIасква, хIыбызшва хIхчара хIборчпI. Ари ауыс апны хIара Адуней апсуа-абаза конгресс ацынхара щардала хIайгвгъитI», – йгIаликIгIатI апсуа культура квтаква р-Федерация аунашвачпагIв Акусба Атанур.

Адуней апсуа-абаза конгресс ауыснкъвгагIвчва октябрь а 21 нхара уысла Трыкв Республика йцатI, ауат ауаъа октябрь а 25-дза йаъазлуштI. Ауат амшква руацIа ауаъа а-Конгресси Трыквшта ажвлара йгьи адиаспора адкIыларакви рацынхарала йалыргу ахачIвква лырхра атахъыпI.