АААК агIаджвыквцIарала Санкт-Петербург апны йапхъахауата ауаъа йту апсыуакви абазакви ранйара акIвшатI.
Барганджиа Саид
Адуней абаза-апсуа конгресс йаднагалыз Санкт-Петербург йтабзазауа апсыуакви абазакви ранйара йапхъахауата ноябрь а 11 агIан акIвшатI.
АААК ЙхIаракIу асовет аунашвачпагIв йцхърагIагIв Тания Кан ауи анйара мурадта йамаз гIайхIватI: Санкт-Петербург йтабзазауа апсыуакви абазакви абардырра.
Тания йгIаликIгIатI ауи «ахачIвы шхъйаз», йайхIатагьи йхIхIвапIта, ауаъа йгIадгылкваз йрыуата гвыпквакI апхъахьыла аргваныта йащтаныкъварныс тшадыркIылтI.
«Ажва ахъазла, араъа йалачважватI ауагIахъаква ргIахIвыща тшъазырбжьуш кружок гIаныршазарквын йшбзийызлуш, йащтагIайуа Абаза хъвмарраква йрылазлуш спортла гвып азкIкIра шатахъу. ХIара йазхъахIцIитI уахьчIва йабадыркваз уыжвласыла йшагIвзачвахуш, даргьи уыс шIыц щарда шгIащтIырхуаш, ауат шдырхъйуш, АААКгьи ауи йшацхърагIуш», – йхIватI Тания Кан.
Кан йгIацицIахтI ахъвлапын Санкт-Петербург йауу апсыуакви абазакви ркъарула йадыргалыз концертгьи шалаз, ауи зрыпшдзакваз йрылан ари акъала апны йгIандыршаз адыгьа гIахIвчва ргвып «Нарт».
Ари агIаншара асуратлента апшра >>
Анйара далан Россия Федерация апны Йазалху хъвдаквцIара зму Апсны Республика рщтийыгIв Ахба Игорь. Ауи дшхъвыцуала, ари йапшу анйараква апсыуа-абаза уагIахъа Санкт-Петерург апны йахъазымкIва адиаспора ъабзазауа аштаква зымгIва рпынгьи йадыркIылитI.
«СлахIвараква шIала йгьузыхIвушым! Сара сгIаквылта артистква срыцгIахIвныс сгIащтIнапгIун! ЗымгIва бзидздзата йадгалан. Насыпрата йспхьадзитI ари апш уыс съалаз», – йгIацицIахтI ауи.
Ахба кIьыдата йгIаликIгIатI апсыуа-абаза уагIахъа рыбызшва, ргвбайара, рцIасква рхчара, йара ауи апшта Апсны ахабар цIабыргыта адуней йрылагара ауыс апны АААК уыста йархъйауа.
Санкт-Петербург апны КъЧР рщтийыгIв Курбанов Шамильгьи анйара далан, ауыгьи ари йапшу ауысква магIныта йрыму даквгIашIастI.
«Ауатква адгалрала атахъыпI – зышта йтнагата зджьара йаъу ауагIа шзабабуш, йшабадыруаш, йыззычпу шырзыгIарбуш апшта. Анйара – гвыргъьарапI», – йажва алйыргатI Курбанов.
«Алашара» адкIылара КъЧР апны йгIаныршу ахъвшара аунашвачпагIв Мыква Мурат апсыуа-абаза уагIахъа адуней шабгула йшхъылапсу, ауат адукIылра ахъазлагьи джьгарта уынхара шатахъу гIаликIгIатI.
«ХIуагIахъа адхIкIылта ауахьауат хIгIархьымшвауата хIчIвырхъара, хIуысква агвынхIыргIвра хIтахъызтын хIуагIа йъакIвызлакIгьи йадкIылра атахъыпI. ХIара йхIгвапапI араъапны хIайщчва айззата ари апш уыс ду шадыргалыз гIбарныс», – йхIватI ауи.
Анйара чкIвыныргIа щардагIвыта йгIадгылтI – ауат райхIарагIв Санкт-Петербург йхIаракIу апхьартаква рпны йапхьауа абаза студентпI. ЗымгIвагьи ари ахъвлапын закIгьи йузашIмырпшуаш хIауала йшкIвыршаз гIалыркIгIун.
«Питер апны амара мачIпI йангIапхауа, ари йапшу айззараква уанрылашварагьи Апсны амара араъа йгIацIцIызшва йубитI. ХIабахъмаштылуата азаджв азаджв хIйыцIагылра атахъыпI», – ллахIвараква хIыцагIвылшатI Апсны йауу астудентка Чкадуа Арина.
Санкт-Петербург апны йбзазауа апсыуакви абазакви араса йауацIыхыз йапхъахуз ранйара уагIата 120-гIвы райхIа алан.
швталра йа тшаншвцIара атахъыпI.