ЦIаста ансисквша йакIвшалауа акультура-спорт фестиваль «Абаза» Къарча-Черкес Республика апны йцбахауа Абаза хъвмарраквала йгIахъыртIытI.
Барганджиа Саид
Апсуа-абаза этнос ъатабзазауа акъральква йгIартыцIта йгIайыз уагIа 600-гIв райхIа йцбахауа Абаза хъвмарраква йрылан. Асквш 2019 агIан Ахъвмарраква йагIвсыз анкъвакъвраква рапхъагылагIвчва рцришта АлбыргIан кыт апны йакIвшатI.
Ахъвмарраква Абаза-апсуа уагIа ртшауацIыхра ацхърагIара знархару адуней адкIылара «Алашара» йгьи Адуней апсуа-абаза конгресс (АААК) ансисквша йацадыргалуа акультура-спорт фестиваль «Абаза» йаланакIуата йакIвшатI.
Йцбахауа Абаза хъвмарраква йгIарыдгылтI Апсны, Къабард-Балкъар Республика, Ставропольшта йгIартыцIыз йгьи Москва апсуа диаспора йгIарщтийыз агвыпква. Къарча-Черкес йауата быжь абаза кыткI ргвыпква гIарщтитI.
АРИ АГIАНШАРА АСУРАТЛЕНТА АПШРА>>
СынчIва анкъвакъвраква йгIарылалырныс йгIадрайгватI Трыкв Республика абзазагIвчвагьи, ауаса Трыквшта апны йазалху хъвдаквцIара нкъвызгауа Апсны ащтийыгIв Харазиа Вадим йшгIаликIгIазла, йапшым ашвхIаусыгIваквала Трыкв йауу агвып гьырзадымкIылтI. Ауи дшгвыгъауала, хIапхъа ахъвмарраква анакIвшауа атрыкв гвыпгьи анкъвакъвыгIвчва рсатыр йгIалалуаштI.
АААК ЙхIаракIу асовет аунашвачпагIв, «Алашара» адкIылара апрезидент Эгьзакь Мусса йцбахауа ахъвмарраква дрыквчважвауата ари атшын АлбыргIан ахIауа «йхъацIауачву апхарала» йшырчвыз гIаликIгIатI.
«Аспорт зныбыжьла, згIальаматраквала йапшым ауагIа аднакIылитI, ауаса зымгIва рацкIыс йхъаду хцIарата Абаза хъвмарраква йгIадырбитI ауат йапшым акъральква йыртабзазауа абаза уагIа ргIащтийыгIвчва ъагIарылалуа. СынчIва араъа йаъан Египет агIащтийыгIвчвагьи. Ауи збзиру АААК ауысхагIвчва Египет апны анйараква ъакIвдыршаз акIвпI», – йхIватI Эгьзакь Мусса.
Ауи йшихIвазла, ахъвмарраква ракIвыршара мурад хъадата йамапI къраль 50 райхIа йыртабзазауа абаза уагIа рацIагылра, апсуа-абаза уагIахъа рцIаскви рхабзакви ррыбагъьара. Эгьзакь Мусса йгIаликIгIатI анкъвакъвраква радгалра ахIагIари ауи йгIалалуа аштаква ргеографии рыцIа-рыцIа йшрылахIауа.
«ХIапхъа ауралагьи ахъвмарраква йгIарылалуа агвыпква йырхъазымкIва Сирии Иордании рпны йбзазауа абаза уагIа ргвыпквагьи гIайуаштI. ХIшгвыгъауала, Европа акъральква ргвыпква ргIайрагьи хIзадгалуаштI», – йхIватI АААК ЙхIаракIу асовет аунашвачпагIв.
ЙакIвшаз ахъвмарраква рпны даъан асас тлапIа, Апсны агIвымакъраль уысква рминистерства йазалху ахъвдаквцIараквала ауысхагIв Вито Гриттани. Ауи уыста йчпатI, Италия дгIатыцIын дгIайтI.
«Сара апсуа гвып сырхъыжвжвгIун. ЙалкIгIата йсгвапхатI апсуа волейболасыгIвчва хIвсыса, ауат хIаракIыта тшгIадырбатI. Швабыж йсгвапхатI уахьчIва хIара зымгIвагьи аспорт хIъаднакIылыз, аспорт ауагIа гвлахIарата тшалапсырщитI», – йхIватI ауи.
АнкъвакъвыгIвчва гвыпква махъвшIала йабакIуан, ащъа йхъалуан, йгIагIвуанта урала йпун, ахIатлаква щтIырхуан, хIахъв ауырщтуан, метр 100 йнадзауа адистанция апны йапхъанысуан, рпчарахIра дырхъвыхуата анашанаква йрайхсуан, аркъан йахъуан, футболи волейболи йрысуан.
Къарча-Черкес йаланакIуа Псыжв кыт йауу КIьыщмахва Амина ахъвмарраква йапхъахауата дрылан. Ауи хысрала дапхъагылагIвхатI.
«Сара сбзазара апны чIвырхъа ду атысптI. Ахъвмарраква срылалра апхъала ауи аспортквпшыра закIгьи гьалсымдыргIузтI. Апхьарта апны сарыпхьагIв лакIвпI йапхъахауата йсзырбаз. Апхъахьылагьи йстахъыпI ауи аквпшырала схъа садынхалырныс», – лхIватI апхъагылагIв.
Къарча-Черкес йаланакIуа абаза кыт Гвымлокт йауу Джьанай Аслан сынчIва йцри кыт рыхьызла футбол дасуан.
«Снашхква бзидздзапI, араъа зымгIва сгвапхитI, йпшдзапI, йшатахъу апшта йнардзата йадгалапI», – йхIватI ауи алахIвара лашараквала дырчвыта.
Москва апсуа диаспора ргвып йрыуазаджву ЧIвыджьба Абзаг ахъвмарраква радгалагIвчва швабыж дшырзыразу йхIватI.
«Анкъвакъвраква гвапарала, пхарала йырчвыпI. ХIара бзита йгIахIпылтI, аквпшыраква зымгIва хIрылапI, джьащахъвата йакIвшитI, рахIа йхъадугьи, гIвзачва шIыц хIщардахатI», – йгвтара хIыцагIвишатI Абзаг.
Арат ахысквша йащтацауата волейболла зымгIва йрагъьта тшгIадырбатI Апсны йауу ахIвсса. ЦIыпх йшцаз йапшдзата сынчIвагьи йгIаранкъвакъвуаз заджвгьи раргван дгIарымщтиуата йайгIайтI.
«ХIара швабыж хIайгвыргъьитI хIъайгIайыз, хIзанкъвакъвуа агвыпквагьи руыс йазъазапI. Араъа йгIванхауата хIгIайитI, швабыж йхIгвапхитI зымгIва», – лхIватI апсуа гвып йрылу Гмынба Илона.
Анкъвакъвраква ргIарбараквала арат агIвысквша йащтацауата йапхъахауа агыларта ркIытI АлбыргIан кыт ргвып, йгIвбахауа агыларта – Къвбина кыт, йхпахауагьи – ЙынджьыгьчкIвын ргвып.
Къарча-Черкес республика апны Абаза хъвмарраква йцынхауата йакIвшатI. СквшигIадзапхьадза анкъвакъвраква йгIарылалуа аспортсменква ъауу аштаква рыцIа-рыцIа йщардахитI, Россия йгьи агIвыма къральква рышта шIыцква гIацIанакIуамцара тшауацIнахитI.
швталра йа тшаншвцIара атахъыпI.