«Ромео йгьи Джульетта» ргылчIв август а 21 атшын пычIвта йгIадырбатI Чанба Самсон йыхьыз зхъу Апсны адрама театр апны.
Барганджиа Саид
Зынгьи йамажвуаш Шекспир Уильям йтрагедия «Ромео йгьи Джульетта» ахаша, август а 21 агIан Апсны адрама театр апны пычIвта йгIадырбатI. Актерква апьеса апны апсыуа бызшвала йчважвауата йгIахъвмаритI. Аспектакль зыргылыз Россия Федерация апны гIатгара зму артист Кове Адгур йакIвпI.
Ауи йхIватI ари йапшта йбергьльу аклассика гIвыра аргылра йара алкIгIараква шаму. Ажва ахъазла, ауи апхъала йандыргылуаз йагIвырщтыз тшытмытквакI гIауауитIта апшгIвы йгватра ауатгьи йырзынауырхитI.
«ХIара зымгIвагьи йырдыруа асюжет йалахIцIарныс хIтахъхатI апьеса йалата ауи апхъала чва зхъарымбауата йагIвырщтыз зджьакIмакIгьи», – йхIватI арежиссер.
Ауаса Кове йшипхьадзауала аргылчIв рахIа шIыцрата йалу ауи зладыргылыз абызшва акIвпI.
«Ари адуней шабгу атеатрква ррепертуарква рпны рыцIа щарда узынйалауа пьесапI. [Ауи] зымгIвагьи йанакIвызлакIгьи йъакIвызлакIгьи йдыргылитI. Арахьарыла угIапшыхта, Апсны апны ари йапхъахауата йхIыргылитI, йара ауыгьи – апсышвала», – йгIахIгвынйыргIвытI ауи.
АшIыцраква йрыуапI арежиссер йгIахъвыцраквакIгьи. Ажва ахъазла, аспектакль апны зжанрквала йапшым амакъымква угIитI. Арежиссер аспектакль адуней классика йауу акомпозицияква йрыцта ауыжвгIанчIвиквагьи ацIайцIатI.
АРИ АГIАНШАРА АСУРАТЛЕНТА АПШРА>>
АлкIгIараква йрыуапI аспектакль Пушкин Александр йпьеса «АуагIа айамына йанагауа агIан чаражвра» йгьи Росстан Эдмон йпьеса «Сирано Де Бержерак» ршIчIвараквакI ъаларцIазгьи.
Шекспир йптеса апсыуа бызшвала йатайкIтI Апсны ауагIа руысагIв Аламиа Геннадий. Ари анхара ду ахабар ауи АААК ахабарргарта портал рыцIа пасатагьи йгIарайхIвхьан – йюбилей йазынархаз айчважвара апны.
«Шекспир йтрагедия атакIра садынхалитI», – йхIватI ауи агIан ауысагIв.
АтакIра апшыгIвчвагьи актерквагьи йыргвапхатI, апьеса зыргылыз арежиссер йакIвпIта – ауи генийкI йгIвыз йапшта йхIватI.
Афыр хъада – Джульетта – лтурасыла дгIахъвмартI ауи ахъазла йгIазшIыртыз Искандер Фазиль йхьыз зхъу аурышв театр актриса шIа Тыркба Лоида.
«Сара йыгьгьисгьымхъвыцтI, зынла – «Щта!» – схIватI: «Щта, йауаштI! Джьульетта лтурасыла сгIахъвмаруаштI!» ДзачIвактрисазлакIгьи Джульетта лтурасыла дгIахъвмарырныс лгвы йтазапI, саргьи ауи сынасып йъагIанакIыз швабыж сайгвыргъьитI», – лгвы йту гьхIчвыцIалымкIтI Тыркба.
Йара ари аспектакль гIазырбауа йгIвбахауа агвып рпны Джульетта лтурасыла дгIахъвмаритI датшагьи актриса шIакI – ДжопIуа Лана. Ромео йтурасы гIайырбитI Апсныдрам актер Кове Бенар.
Апсны адрамтеатр апны уахьчIва актер шIаква щардагIвыпI, атеатр аунашвачпагIв Чанба Нодар йшипхьадзауала, ауи акIвпI йаргьи агвып ари аргылчIв йащыхIалырныс гвы зырчпаз.
«ХIара хIгвыргъьитI хIтеатр апны актер шIаква ъахIыму, щарда мцIуата ауат йгIарылахIатI – Санкт-Петербург, Москва рпны атеатр азъазара йъазырбжьауа йхIаракIу апхьартаква йгIарылгаз ачкIвынчви ахIвсси хIызгIайтI. ЗымгIва йрапхъата ари чкIвыныргIа злу спектакльпI», – йхIватI Чанба.
АргылчIв пычIвта йангIадырбуз Апсны а-КъральыгIва драма театр апещ уагIала йырчвын. Амузыка, амзаква, апещ апны адауышвара – аратква зымгIва апшгIвы датша дунейкI дташвазшва йдырбун, ауаъа «дтаздазгьи» йгIахъвмаруаз актерква ракIвпI.
ЙалкIгIата апшыгIвчва ргватра ззынархаз афырква рчгIвычаква ракIвын. Ауат лызхыз асуратчпагIвчва атурых швъаква йырпшын апьеса гIазквчважвауа аныншуз азаман агIан Верона абзазагIвчва йынкъвыргуз йрапшта ачгIвычаква рдзахытI.
Аспектакль гIадырбушта ахабар шгуз зынла абилетква амцIырчIвауа йалагатI. Согъвым апшыгIвчва щарда цIуата араса угвы йнадзуш спектакль йазпшуан.
«Ауи йузыджьамщуш спектакльын. Апхъапхъа ауыжвгIанчIви макъымкви асцена апны йакIвшуз агIаншаракви ацамхъуазшва йызбан мачIкIгьи съанквынхан, ауаса тIакIв анцIы ауи датшата сыла йгьсызгIацIамыжьхуазтI. Йызбаз швабыж йпшдзан, джьащахъван, йхъадахугьи – зымгIва апсышвала йакIвшун», – лгвгIанаграква гIахIалхIвтI апьеса йапшыз Дарчам Мадонна.
Апроект йацхърагIакваз йрыуапI Адуней апсуа-абаза конгресс – ЙхIаракIу асовет аунашвачпагIв Эгьзакь Мусса апхъа дгылата, Москва апсуа диаспора рхъада, АААК ЙхIаракIу асовет йалу Агрба Беслан.
Аспектакль пычIвта йангIадырбуз йаквымшваз ауи уыжвласыла, август а 23 агIан, йапшырныс рылшуштI. Ажва аламкIва, «Ромео йгьи Джульетта» рахIа уагIа щардагIв азызкIкIуа Апсныдрам аспектакльква йрыуазакIхуштI.
швталра йа тшаншвцIара атахъыпI.