Барганджиа Саид

Апсны апны АйгIайри Ахъахвитри рысквш 26 дыртлапIатI: аквырджькви апсуакви йрызбжьаз айсра апны айгIайра гIатыргищтара сквш 26 ъацIуа йазынархаз ауысква ареспублика арайонкви акъалакви зымгIва рпны ашвахьа, сентябрь а 30 атшын, йакIвшатI.

РахIа магIын ду змаз агвыргъьахъв алалраква акъала хъада апны йакIвшатI. Агвыргъьахъв мшы ащымта акъраль аунашвачпагIвчви Апсны йрыцызкIуа агIвыма къральква йгIартыцIыз асасчви гIвчвахъабага синкI хIврапшдза рзыщтIарцIатI: ЦIахь Эшера кыт апны йгылу Апсны йапхъахуз а-Президент Ардзынба Владислав йсини Апсны ауагIа р-Абашта айсра йаладзыз рыхъазла Согъвым Артшхъвара апарк апны йдыргылыз амемориали.

Апсны ауагIа р-Абашта айсра аветеран Тужба Сосо йчIахIру артшхъвага – «АхъацIара ахъазла» медаль – нкъвигитI. Ауи Апсны йапхъахуз а-Президент йхъмаштылра хвы аквицIауата ансисквша Ардзынба йцри кыт дгIайитIта ауи йнышвынтара дазцитI.

«ХIара ауи хIишIпшуан. Ауи ауагIахъа рапхъа дгылан, хIаргьи ауи йхIвуз ажвакI ацхIымцIауата йхIырхъйун. Ауи йхъвыцща тамами йунашва гвыбзыгъакви рбзирала акIвпI хIара хIшайгIайыз», – дацIачIвагъватI аветеран.

Йара ауи алалра апны йапхъахуз а-Президент дгIайгвалашвахуата Согъвым абзазагIв Зантариа Арлан апсуаква рапхъагылагIв йхъацIари йымчи гIаликIгIатI.

АРИ АГIАНШАРА АСУРАТЛЕНТА АПШРА>>

«ХIара зхъа йахвиту къральыгIва хIымапI, хIцри адгьыл апны [хIуачIвымш] анхIыргIалуа хIбзазарныс лшара хIымапI, ащардала ауи збзиру ауи (Ардзынба Владислав – аредакция ррытаразга) йакIвпI», – йхIватI Зантариа.

Апсны апны АйгIайри Ахъахвитри рысквш 26 дыртлапIатI

© АААК / АгIвдза Наала

АхIврапшдзаква анщтIарцIа Артшхъвара амемориал адзхъа архъвква гIамгIвайстI, ауи амщтахь йгIайззаз рпахь Апсны а-Президент ХIаджьымба Рауль дгIачважватI. Ауи йгIаликIгIатI Апсны ауагIа р-Абашта айсра апны айгIайра гIатыргищтара йцахьу сквшипхьадза зыщайдзаквала сквшышв щардала йалу атурых йалалуа ауагIахъа къральыгIвара агIащаквыргылхра йазынархаз абакIра амагIны ацIолара рыцIа-рыцIа йшхIылахIхIвауа.

«Пхата срызхIвахIвра стахъыпI хIреспублика акъральгIвква, хIыгIвзачва, йаргвану йгьи рыцIа йхъару агIвыма къральква рпны йхIыцызкIквауа зымгIва. Зынгьи йымчвргIатI АйгIайра зынцIра азтыз рхъмаштылра! Квырмыш рзысчпитI хI-Псадгьыл агIархвитра йазгылата айбащраква рпны зхъа щтIазцIаз афырква ранчви рабачви! АйгIайра амшла, сабашталагIвчва тлапIаква!» – йхIватI ХIаджьымба.

Апсны а-Президент ХIаджьымба Рауль ауагIа рпахь дгIачважватI.

© АААК / АгIвдза Наала

Агвыргъьахъв йшцIасхаз апшта «Аджьаль змам аполк» мгIвайсра алан. Ауи Искандер Фазиль йыхьыз зхъу АкъральыгIва урышв драма театр йадзхъу ауатыкв апны йакIвшатI. Ауи акция йапхъахауата асквш 2016 агIан йадыргалтI. Ужвы ауи адзынла йарамшкIымызтынгьи Апсны йапшым акъалаква рпны йакIвшалитI. Ажва ахъазла, Гагра апны ауи сынчIва октябрь а 6 – Гагра аквырджьква йанырчвгIадырхвитхыз амш – агIан йадыргалырныс йаквдырпшитI, Афон ШIыц апны ауи сентябрь а 29 атшын йакIвшатI. Ансисквшагьи ауи амгIвайсра йгIалалуа ауагIа рпхьадзара йалахIитI.

«Зджьара йгIанымхауата йуыс бзипI ари. Арат ачкIвынчва шIаква рсуратква… псы гIархъалхуазшва сыла йгIацIалитI. УгIапшитIтта – ауат рщардагIв ргIариква духатI. Ахвыртаква ужвыгьи йайдзаркIвапI», – ллахIвараква хIыцагIвылшатI хынхауата ари амгIвайсра йгIалалуа Согъвым абзазагIв Барцыц Мариам.

АйгIайра амш андыртлапIушыз апхъала, сентябрь а 29 атшын, Апсни России ркъральыгIва мажа апны датшагьи йцIасхаз мгIвайсракI джвыквылтI – «Афырква рымгIващла». Йапхъахауата ауи асквш 2007 агIан йакIвшатI. Ауи йалакву алакшараква ъакIвшаз ашIыпIаква рпны йгIашIаслауамцара «айсчва зламгIвайсыз амгIващквала» йцитI. Ажва ахъазла, Гагра йанрылсуа акъала аквырджьква йшырчвгIадырхвитхыз гIаргвалашвахитI, Гвдауыта апны айсра ъанамдзаз аштаква рпны уыста йырхуз амагIны йаквчважвитI.

СынчIва ауи амгIвайсра 170-гIвы алан. Ауат мшкIыли уахъыкIли километр 120 йымгIвайсын Согъвым Артшхъвара апарк апны йгIашIасхтI. Акция адызгалыз йрыуазаджву Таниа Нар йгIаликIгIатI мгIва йыквлыз зымгIва ауи ацIыхъвадза йшнадырдзаз.

«ЗымгIва йрапхъата ауыла чкIвыныргIа хIуыжвгIанчIви турых дхIырдыритI. АмгIвайсра йалаз рщардагIв сквшы 20 рхъыцIгIвацатI. ХIара амгIва апны хIзынйуз акъалаква зымгIва, акыт щарда рпны йгылу Апсны ауагIа р-Абашта айсра йаладзкваз рсинква хIрыдгылуан, хIврапшдза рзыщтIахIцIун. ХIъадзагIамгIвайсуаз хIабачва, хIанчва, хIайщчва ахIбачва йырхIвахуата йыгIгIаз айсра агIаншараква [азаджв азаджв] йахIхIвхуан. ХIара цIабыргдзата атурых йалу мгIващла хIгIайтI. Кьангьаш гьазгIазгуам ари йапшу ауысква йгIадзынгылуа абанпара рпсадгьыл йазрыму абзибара рыцIагьи йшдрымчуа», – йхIватI Таниа.

Ардзынба Владислав йыхьыз зхъу Айсра Ртшхъвара АкъральыгIва музей апны ауи атшын айсра телеоператор Кецба Виталий йгIарбарта «Айсра агьарпагьаджь» адыргалтI. Автор ауаъа Апсны ауагIа р-Абашта айсра агIан йхъихыз асуратква гIайырбатI. Кецба йбзирала Апсны датша зджьарагьи йумауаш асураткви авидеокадркви рархив амапI. АгIарбарта суратта 80 райхIа аднакIылтI.

«Айсра агIан зымгIвагьи руыс баргвын – йайсуазгьи, журналист уыс зхузгьи. СъачIвагIалагIвчва рыуа щардагIвы айсра йаладзтI. Сара айсчва срыцын. СгьамайсытI, абджьар гьснапIыцIамызтI. Сара йсабджьарыз акIартIхъыхги авидеокамери ракIвын. Йшсылшуз апшта йызбуз зымгIва хъысхуан», – йхIватI айсра корреспондент.

Агвыргъьахъв мшы апсуа эстрада «айачIваква» злаз аконцертли асалютли йалгатI.

Апсны АйгIайри Ахъахвитри рымш сквш 26, апсуа рхъвква акъраль аквырджьква йанырчвгIадырхвитх йгIашIарышвта, йдыртлапIитI. Ауи амш ареспублика Ахъахвитра йамштагьи йырпхьадзитI. Ансисквша сентябрь а 30 Апсны сасчва щардагIв гIайитI апсуа уагIа ари амш агвыргъьара рыцагIвыршара ахъазла. Ауат йхIайгву йгьи йхIыцызкIуа акъральква – Приднестровье, Щхъа Карабах, Сирия, Италия, ГIвадахь Осетия – йгIатыцIыз асасчва, Къарча-Черкес, Къабард-Балкъар, Москва, Санкт-Петербург, Трыквшта, Сирия, Иордания йауу хIабашталагIвчва ракIвпI.