Апсны апны 28.09.2022 21:30 6486

Апсны йапшым ашIыпIаква йгIартыцIыз пщгвыпкI ауагIа рхъвмарщаквала йапхъахуз анкъвакъвра «Ахьышьтра» апны апхъагылара йазабакIтI.

Апсуа уагIа рспорт хъвмарщаквала анкъвакъвра йапхъахауата йакIвшатI СогIвым апны. Анкъвакъвра акъала хъада ангIадырхвитхызищтара йцIыз асквш 29 артлапIара йазынархан. Ахъвмарраква Дурыпщ, Джгерда, ЧIлоу йгьи СогIвым йауу 14 сквша уалагата 16 сквшадза йырту апхьагIвчва рыпщгвыпкI рылан. Ауат «Аимцакьачара» (апсуа уагIа ртопасща – аредакция ррытаразга), «Ахылпахас» (апсуа бызшвала – «ахъылпа гIакIра» – аредакция ррытаразга) йгьи «Акьыброу» (аурышвква чIвгIванчкIвынла рхъвмарра йашIырпшу апсуа хъвмарща – аредакция ррытаразга) ауагIа рхъвмарщаква рыцIа йырзычпу гIадырбун.

Анкъвакъвраква Адуней апсуа-абаза конгресс ацхърагIарала СогIвым къала аунашвахъцIарта йаднагалтI.

АхъвмарыгIвчва шIаква тшырзыналырхауата акъала хъада аунашвахъцIарта апны чкIвыныргIи аспорти руысквала аунашвахъцIарта анхагIвы Квициниа Викториа ашIара рквта ауагIа рспорт хъвмарщаква тшауацIдрыхра магIныта йаму гIалылкIгIатI, СогIвым апны арат анкъвакъвраква цIасхушта дшгвыгъауагьи лхIватI.

«АуагIа рспорт хъвмарщаква агIамта хъараква рпны йгIашIарышвта апсуаква ркультура йахъвыкIпI. ЙахьчIва хIара йгIащаквыргылхта апхъахьылагьи йынкъвгаоа атахъу ари аспорт цIас чкIвыныргIа азхIраргвануата йапхъахауа ачIвырхъа хIчпатI», – йгIалылкIгIатI Квициниа.

СогIвым апны АААК ауысхарта унашва ахъызцIауа Реквава Темур ахъвмарраква ъагIахъыртIызла аспортсменквагьи асасчвагьи драйхIвахIвтI йгьи дацIачIвагъватI ауагIа рхъвмарщаква, апсуаква йырцIасыз анахьанат ауысква йрапшта, ашIаква йрылагара а-Конгресс анхара анархара хъадаква йшрыуу.

«Аимцакьачара», «Ахылпахас» йгьи «Акьыброу» хъвмарраквала анкъвакъвраква сахIатквакI йнайтI. Уыла рыцIа йдырпшуата йаъан «Аимцакьачара» ахъвмарраква: агвыпква рапхъагылагIвчва лабала алабчва топ йасуан, анахьанат ахъвмарыгIвчва ауи гIаркIыта, ласыта йырпшIагылу агвып рыштала йхъыста дара ргвып рыхъаз балл шгIарынхуш йащтан. Ари ахъвмарра афинал йкIылстI ЧIлоуи Джгерди рспортсмен шIаква. АчкIвынчва ркъаруква йырмайгьдзауа рщаласра гIадырбун, гIвраундкI йнайыз йаквыргъвгъваз апшIагылра апны 8:2-та айгIайра ЧIлоу ркоманда йыргатI.

Ари агвып анахьанат ахъвмарщаквагьи рыцIа йрызкъвльейта тшгIадырбатI. «Акьыброу» афинал апны ЧIлоу йауу аспортсменква ЩынкIвба Б.В. йыхьыз зхъу СогIвым йапхъахауа аквтанай апхьарта йрайгIайтI. Ари ахъвмарра апны ачкIвынчва чIвы дрышвуанта йызквшваз аратква йчпара атахъын: ачIвыла йларысыз алаба чIвры ахъа йнапIыршIашIа аквицIата, ауи ахъахь рыцIа йайшысу алаба аквицIата йхпахауа алабала ауи даста хъахьыла йъадзайылшауа йалайжьра, ауи амщтахь йхпахауа алаба йларысу алаба «уандыр» сурат айрычпауата йадйыргылра. Ауи асахIат йырпшIагылу агвып рхъвмарыгIв йаларжьыз алаба гIайкIыта йа йанкIашвара йгIащтIихта «ауандыр» алапитшра атахъын.

Ага Еник Дамей дызлаз СогIвым йапхъахауа аквтанай апхьарта ари ахъвмарра апны ЧIлоу аспортсменква йгIаладырхазтынгьи ауи йынбжьагIвчва штшыркIуаз йгвапхатI, йгIайуа асквш ахъвмарра рыцIагьи бзита тшазырбжьата апхъагылара йшазабакIуаш зымгIвагьи азйыргвыгъатI.

«УыззамайгIайуаш заджвгьи дгьыгIбум. ХIгвып мачIкI тшадрыщцара атахъыпI акIвмызтын. Апхъахьыла ауагIа рхъвмарщаквала анкъвакъвраква хIрылауамцара рыцIа тшазыгIбжьуштIта йапхъахауа агыларта шхIкIуаш хIащтазлуштI», – йхIватI Еник.

«Ахылпахас»-ла анкъвакъвраква рыхъаз ахъвмарырта аквта лабакI ладрысын «ахылпарч» (апсуа хъачва йынкъвыргауа ахъылпа – аредакция ррытаразга) хъарцIатI. Алаба аныли арыли 15 чIвырхъакIли чIвырхъа 20-ли йачвыхъарата агIвгвыпкI рхъвмарыгIвчва гылтI. РыцIа аргваныта (15 чIвырхъакIла унаскIьата) йгылаз «ахылпарч» дамцIаста йгыларта дазгIайхра атахъын, рыцIа хъарата (чIвырхъа 20-ла унаскIьата) йгылаз ауи шыййымрычпуш дащтан. Ари ахъвмарра апынгьи айгIайра ЧIлоу ачкIвынчва йыргатI.

Анкъвакъвраква рпны рыцIа йагъьу хъвмарыгIвта йырпхьадзаз ЧIлоу йауу Инапщба Астамур йаргьи йыгIвзачвагьи рдахIвра йащатахаз бзита тшъадрыхIазырыз акIвта йбитI.

«Агвыпква зымгIвагьи бзита йхъвмартI. Ауаса йамгIанхъвмарразлакI апынгьи заджвы рыцIа дымчхитI. ХIара атшыбжьараква гIамта щарда рзалхIхуан. Ауи акIвзапI йаргьи хIзайгIайыз», – йгвгIанаграква йхIватI Инапщба.

ЧIлоу агвып рбжьагIвы Ануа Ансоу йбжьаматаква ауагIа рхъвмарщаква бзи йырбата анкъвакъвраква мчыта штшрыздрыхIазыруаз йхIватI, аххъвмарщакIлагьи йзайгIайызгьи ауи йапищылтI.

«Ага тшхIрыхIазырныс заманта йхIымаз щардамызтынгьи, агвып бзита тшгIадырбара ртахъын, даргьи ансимшума ухIвушта атшабжьараква йгIайуан. ЙайхIатагьи йсхIвапIта, арат ахъвмарщаква апхьагIвчва щардагIв йыргвапхан ауагIахъа хъвмарраквала апхьара сахIатква кIьыдата йырзалхIхтI», – йхIватI Ануа.

Анкъвакъвраква йрылаз зымгIва ахъвмарщаква рхабзаква шырдыруа, къару бзи шрылу, айгIайрагьи йшазгIашыкъыз гIаликIгIатI асудья хъада Гвынба Адгур.

«АчкIвынчва йыргвабызта анкъвакъвра тшаздрыхIазыртI, АААК йаднагалыз амастер-классква рбзирала ахъвмарраква рхабзаква рдыртI. Йхъадахугьи – ауат рылаква гъьазгъьазитI, ахъвмарра ргвапхитI, гол штарцуш, йшайгIайуаш йащтапI. Ауатква сырпшитIта – ауагIа рхъвмарщаква апхъахьыла тшауацIыхра ду рауашшва йызбитI», – йлахIвараква хIыцагIвишатI Гвынба.

ЧкIвыныргIи физкультури ртшауацIыхрала АААК ахъвшара аунашвахъцIагIв Берзениа Валерий йшихIвауала, анкъвакъвра адыргалра апхъала апхьагIвчва бзита йрыдынхалтI, ауат рыхъаз апсуа уагIа рхъвмарщаква ртурыхла алекцияква, йазалхыз амастер-классква акIвдыршатI.

«ХIара чкIвыныргIа гIахъхIкъьалныс хIылшатI. ХIа ахъвмарщаква хIрыквчважвара йахъазымкIва ушхъвмаруашгьи дхIырбун, даргьи йрымагIальаматдзата йгIахIылалуан. Дара-дара хъвмаруа йаналага йгьузашIамкIхуазтI», – йхIватI Берзениа.

ЙгIаликIгIатI ауи ауагIа рхъвмарщаква Апсны атурыхи акультури йахъвыкIта магIын ду шрымугьи.

«АуагIа рхъвмарщаква абанпараква апырщылитI. Ауи хIа йхIтурыхпI. Апсны апны йгIаншата хIдаква йыртаныкъвауа акIвпI. Сара чIахIра дута йызбитI ауат тшауацIдрыхра йацхърагIауа апроект съалу», – дацIачIвагъватI Берзениа.

Анкъвакъвраква ргIахътIра ахъазла йазалхта «Ахьыщьтра» адамыгъа лырхтI. Ауи гIвыджь апсуа фаша рышва «Аимцакьачара» йхъвмаруата йгIанарбитI. Адамыгъа анкъвакъвраква рыхъаз йазалхта адгалагIвчва аспортсменква йырзырдзахыз афашаква йырныта йубун. Ауи акIвымкIвагьи СогIвым аунашвахъцIарта анкъвакъвраква йрылаз асогIаквагьи рыздрыхIазыртI – амедальква, артшхъвага швъаква, апхьартаква рыхъаз аплакатква.

АААК ауысхагIвчва апсуа уагIа рхъвмарщаква апхъахьылагьи чкIвыныргIа йрыларгаларныс, «Ахьышьтра» анкъвакъвра ансисквша йакIвдыршаларныс, хIапхъа ауи Апсны ашIыпIаква йрыуата жвагвыпкI йрайхIата йгIаланадыркIырныс шыргвыгъу рхIватI.