Апсуа бызшва асабиква йшдуырдыруаш уыжвгIанчIви амаль лырхын йгIадырбатI ЩынкIвба Баграт йыхьыз зхъу Апсуа бызшва тшауацIнарыхрала агвчIагIвчпара фонд йалакву.
Барганджиа Саид
Апсуа бызшва асабиква йшдуырдыруаш уыжвгIанчIви амаль шIыц гIадырбатI Согъвым апны ЩынкIвба Баграт йыхьыз зхъу Апсуа бызшва тшауацIнарыхрала агвчIагIвчпара фонд йалакву.
Афонд адиректор МикIьиа Леван йшгIайхIвазла, йбергьльу арыпхьагIвчви апсуа бызшвала аъачIвагIагIвчви злаз агвып апхьаги аметодики рлыхра гIвысквша райхIа йадынхалтI. Агвып унашва рхъицIун АААК ЙхIаракIу асовет йалу апсуа бызшвадырыгIв Чирикба Вячеслав (ауи йацйырцауата Чирикба ЩынкIвба Баграт йыхьыз зхъу афондгьи даунашвачпагIвпI – аредакция ррытаразга).
Анхара анджвыквырцIуз аъачIвагIагIвчва адуней апны йапшым абызшваква шддырдыруала йагъьу амальква йрылапшын лкIгIараквакI рчпатI. Апрограмма шIыц апсуа бызшва шууырдыруаш, йалкIгIата – асабиква йшдуырдыруаш, йаквыргIапспI.
Аметодика алыхра йазадызцалыз сквшквакI рапхъала йакIвшаз архъвыхра акIвпI. Ауи агIан Чирикба Вячеслав ъачIвагIагIвчва гвыпкI йыцта апхьагIвчви апхьарта йымцас асабикви рцри бызшва шырдыруа дырхъвыхтI. ЙшгIацIцIызла, Апсны акъалаква рпны ацIайква рпроцент 70 апсуа бызшва гьырдырам.
«Апсуа бызшва зымдыруаз ацIайква ауи рдырра ахIатырла асабигIзартаква рпны апсышвала йчважвуз асабиква йрыларцIун. Ауаса йшыртахъыз апшта йымцауата апсышва здыруаз асабиквагьи урышвла йчважвауа йалагун. Ауи йгIалцIла хIара хIпахь хачIвыта йхIыргылтI апсуа бызшва зымдыруа ацIайква ауи здыруа йрылагIмыжьуата кIьыдата йазалху амальла йыгIбжьарныс», – йхIватI МикIьиа Леван.
Афонд адиректор йгIаликIгIатI амаль шIыц ззынарху «апсуа бызшва зымдыруа асабиква шракIву».
«ХIара йгIахIгвынгIвытI асабиква хысквша йанырталра уалагата абызшва йазыбжьара шатахъу. Аметодика хпата йшапI. Йапхъахауа ахъвы хысквша-хвысквша йырту ахвыцква йырзалхпI. Арыпхьара комплекс йапхъахауа ахъвы уахьчIвала йхIазырпI, ауи Согъвым ахъатачIв сабигIзартаквакI рпны йхIырхъвыхуаштI», – йхIватI МикIьиа.
Ауи архъвыхра проект саби 150-гIвы гIаланакIуаштI.
Амаль шIыц ауыс йалакIыта ушадгылуаш йаквыргIапспI, лхIватI апрограмма лызхыз йрыуазаджву Цвейба Любовь. Арыпхьара йащатахуштI апхьага абаркIыракI, ауат йрыуата йхъаду арыпхьагIвчва йырзалху, апхьарасахIатипхьадза йалыргата йызну апхьага акIвпI.
«ХIара ужвы йапхъахауа ахъвы джвквыгIжьитI, ауи хвапхьагакI азлыхпI. АзакI – арыпхьагIв йыхъазла, анахьанат – асабиква рыхъазла: акласс апны йызланхуш, ахачIвква зну, йаъапI агIахIвахраква ъазкIкIу книга дукIгьи. Ауат зымгIва сурат рыцпI. ЙаъапI аудио йгьи видео апхьарасахIатква. Ауат данрыланхауа асаби сурат йгIвитI, ашвъабгъьы апны кIара гIатйырситI, пластилинла зджьакI йчпитI, ауасамцара йгIайархIвыз гвникIылитI. Арыпхьара шабгу хъвмаррата йадгалапI», – лхIватI Цвейба.
Ауи йгIацылцIахтI апхьараква гвыпла йакIвшара шатахъу.
«Агвып дучвамкIва, йалу жвыгIвыгIвкI йайхIамкIва йадгалра атахъыпI. Ауи агIан акIвпI хIарыпхьаща амаль хIыззпшуа асабап ангIанагуаш», – йгIалылкIгIатI аъачIвагIагIв.
Чирикба Вячеслав йъачIвагIалагIвчва йырхIваз йацицIахуата асабиква йшхвыцыркIву уалагата абызшва йазубжьарквын рыцIа йзагъьу йхIватI.
«ХIара абызшвала арыпхьара асаби апхьарта дымцаскIва хIалагитI, йауа ухIварыквын, асаби хысквша-пщысквша данырту агIан акIвпI йыбызшва анщаквгылуа. Апхъахьыла хIара йхIгвыгъапI апычIв апхьарта ахъазлагьи апхьагаква лыхIхырныс. ХIметодика, цIабыргыта, ащата багъьапI. Ауаъа арыпхьагIв йчпара атахъу зымгIва гIарбапI: атшарыщцагаква, ажвакви ажва адкIыларакви, ахъвмарраква, ашваква, асуратчпара, йапшым ахачIвква. Йызпхьаз зымгIва уацIыхъван атшарыщцагаквала йахъазымкIва уысала, ашвала, DVD йанула йдрыбагъьахитI», – йхIватI агвып рунашвачпагIв.
Чирикба йшгIаликIгIазла, аметодика йадынхалыз аъачIвагIагIвчва «ауи бзиракI гIанацIгIушта йайгвгъитI».
«Асквш ауацIа йлыхIхыз амаль шынхауа гIбуштI. ХIара ауыс шгIахIдахIвуаш ацIыхъва хIтагылапI. ХIгвыгъитI абызшва зымдыруа ацIайква сквшыкIла ауи йзалачважвауа йцушта», – йхIватI апхьахьа.
ЩынкIвба Баграт йыхьыз зхъу Апсуа бызшва тшауацIнарыхрала агвчIагIвчпара фонд апхъахьылагьи асабиква апсуа бызшва рыцIа бзита йызладдырдыруаш амальква рлыхра йадынхалуаштI.
швталра йа тшаншвцIара атахъыпI.