Акъраль апхьартаква рпны апхьара сквшы йацта АААКи Апсны Республика згIвадарахчарала а-Министерстви диспансеризация йапхъахуз ахъвы алдыргатI.
Асквш йапхъахуз аъарагIвшара ауацIа йызпшырныс йаквыркIыз йрыуата йцIыхъвахауата зызгIвадара дырхъвыхыз Дурыпщ кыт апхьагIвчви арыпхьагIвчви ракIвпI. Ауат рща дырхъвыхырныс йарттI, рзгIвадарагьи абгата йдырхъвыхтI – кIара рыхьуазтын пасата йгIаддырдырта азгIва рыламшскIва йрайъазарныс ахъазла.
АпхьагIвчва йырпшытI апедиатрква Рогова Наталья, Уатырба Ангелина, аэндокринологква АмкIваб Рената, Джьыкьырба ХIамида, аофтальмолог Сангулиа Фатима, акардиолог Лакырба Оксана, а-ЛОР-айъазагIв Миканба Лана, УЗИ-ла азгIва щаквзыргылуа Габова Лариса, аневрологква Конджариа Саида, Ходжава Альбина, ауролог Шамба ХIаджьрат, ареабилитолог Агрба Арзадин, ЭКГ нзырхауа амедахща ДжопIуа Элла Руслан йпхIа.
Арыпхьарали жвлара джьгаррали згIвадарахчарали (ОСАЗ) АААК ахъвшара аъачIвагIагIв Хьышба Науыр апроект джвыквырцIищтара йакIвдыршаз архъвыхраква ргIарбараква гIайхIватI.
«Апроект джвыквхIцIищтара акытква йырбзазагIвчвата 2400-гIв райхIа рзгIвадара хIырхъвыхтI, ауат йрыуата 2100-гIвы раъара апхьагIвчвапI, 300-гIв райхIа арыпхьагIвпI. ХIынхауищтара кыт 24 рпны хIаъан. СынчIва хвкыткI хIцарныс хIахадзатI. Ари анхара ду хIырхъйарныс хIара йгIахIцхърагIатI медицина ъачIвагIагIв 90-гIвы райхIи волонтер 50-гIвы райхIи», – йгIаликIгIатI ауи.
Апроект архъйара ъалшарахаз ахъазла Хьышба кIьыдата йразыра ажваква АААК ЙхIаракIу асовет аунашвачпагIв Эгьзакь Мусса йзынайырхатI, ауи акIвымкIвагьи АААК агвып шабгу ъагIарцхърагIауагьи дырзыразпI.
«ЙсхIвара стахъыпI АААК аунашвачпагIв Эгьзакь Мусса сынчIвагIваца апроект архъйара йара йахчата сом зыкь 700 айхIа шалайцIаз. Зджьара хIцапхьадзагьи айъазагIвипхьадза йа волонтеркI йа АААК анхагIвыкI дйыдзхъачIвитIта йызпшуа агIвычIвгIвыс йызгIвадара агIарбараква йгIвитI. УацIыхъван ауат агIарбараква йрыдынхалитIта апхьагIвчва кIьыдаква йрайъазуш арайон педиатрквагьи Апсны згIвадарахчарала а-Министерствагьи йрыртитI, йауа ухIварыквын, диспансеризация хIуагIа рзгIвадара шаъу хIнардыритI. Ауи агIарбараквала акъральыгIва йаргвану ахвысквша-жвасквша руацIа акъраль азгIвадарахчара уыста йаквызлуш лнахитI», – йхIватI ауи.
АААК апны ОСАЗ хъвшара унашва ахъызцIауа Хагба Изольда апроект тшауацIнарыхра къару алазцIаз, ауи архъйара лшарата йызчпаз аъачIвагIагIвчва зымгIва дшырзыразу лхIватI.
«Ари апроект уагIа хъадата йалу айъазагIвчва ракIвпI – ауатдъа закIгьи гьхIзымчпушызтI, хIаргьи ауат зджьара йгIанымхауата хIырзыразпI. Анчва дырзыразхатI Апсны згIвадарахчарала а-Министерства анхагIвчвагьи, кIьыдата рыхьыз схIвапI Делба Саида Юрий йпхIи Гуниа Есма Юрий йпхIи. Архъвыхраква йнардзата йархъйитI «Medlife» лаборатория. ХIырзыразпI айъазагIвчвалагьи нхагалагьи йгIахIцхърагIауа Ходжава Альбина дзунашвачпагIву «Альба-мед» квта. Йара ауи апшта сшырзыразу схIвара стахъыпI йанакIвызлакIгьи йгIахIцхърагIауа Адуней апсуа-абаза конгресс анхагIвчвагьи апроект йацызкIуа АААК аунашвачпагIв Эгьзакь Муссагьи», – лхIватI ауи.
Хагба йшылхIвазла, апроект ахъазла ажва бзи зхIвауа ауагIа рыцIа-рыцIа йщардагIвхитI, зызгIвадара зырхъвыхта закI шрыхьуа здырыз щардагIвы айъазара йалагахьатI. АзгIва йаназаману йгIакIра, аъачIвагIагIвчва рбжьагажва архъйара асабигьи, атгIачвагьи, ауагIахъагьи рзгIвадара агъьчIвра апны магIын ду зму чIвырхъапI.
«ЙалкIгIата хIайгвыргъьитI йакIвхIыршаз архъвыхраква рымщтахь щардагIвы операция ъарчпаз, рыцIа цIолата рзгIвадара ъадырхъвыхыз, ан-абачва рсабиква дырбзихауа йъалагаз. Ауи акIвпI йаргьи апроект згIалагIгаз. Йызпшыз асабиква ран-рабачва йырчпуш рдыритI, ргIариква рзгIвадара рыцIа гватшныта йахьпшитI. Ауат зымгIва хIа йхIсабипI, йауа ухIварыквын, саби гIвыма дгьаъам. Ауат ракIвпI хIкъральыгIва зрыбагъьуш, даргьи згIвадазара атахъыпI», – йгIацылцIатI ауи.
Адуней апсуа-абаза конгресс апроект асквш 2023 мартI мыз агIан йджвыквнажьтI. Адиспансеризация Апсны акытква йырту апхьагIвчви арыпхьагIвчви йнардзу медицина цхърагIара шрадзуш йазынархапI.
швталра йа тшаншвцIара атахъыпI.