Апсны апны йапхъахауата йакIвшуш «Абаза» культура-спорт фестиваль йазынархаз конференция акIвшатI АААК апресс-квта апны ажвлара хабарргагаква рыхъазла.
Барганджиа Саид
Апсны апны йакIвшуш «Абаза» культура-спорт фестиваль ауыс ажурналистква йрархIвтI АААК апресс-квта апны ахваша, октябрь а 11 атшын.
Апресс-конференция йалакваз рпахь дгIачважвауата а-Конгресс аппарат аунашвачпагIв Таниа Кан йгIаликIгIатI афестиваль акIвыршара гIазрыцIсыз КъЧР апны «Алашара» жвлара адкIылара нхарала адахIвраква шракIву: цысквша руацIа адкIылара ауи апш фестиваль Черкесск апны йаднагалитIта – ауи апсуа-абаза уагIахъа йгIарыланакIуа зымгIва рыхъазла гвыргъьахъв дута йалитI.
«Йапхъахуз асквш КъЧР апны афестиваль уагIата йгIаланакIыз 50-кI ракIвын, йащтагIайуаз асквш ауат рыцIа йщардагIвхатI – 120-гIвы. СынчIва Черкесск апны «Абаза» фестиваль уагIата 2500-гIв райхIа гIадгылтI. Агвква рпхарала йырчву афестиваль адунейла йхъылапсу апсуа-абаза диаспора йауу ауагIа абадырырныс лшара рнатитI», – йхIватI Таниа.
Ауи афестиваль Апсны апны йакIвыршара магIныта йамугьи даквгIашIастI.
«ХачIв апхъата хIпахь йгылакву йрыуапI йапшым акъральква рпны йбзазауа хIабашталагIвчва [рпсадгьыл] йшгIайхуаш апшта аъаща гIаныршара. Ари афестиваль хIабашталагIвчва хIкультура рыцIа джьгарта йгIалалырныс йацхърагIуштI», – йхIватI Таниа Кан йгьи йгIацицIахтI апсуакви абазакви рбжьара «агIвычIвгIвыс ащтаныкъвараква щаквгылра шатахъу».
Афестиваль апрограмма ажурналистква ахалыргIвазатI АААК апхIвыс советква рунашвахъцIагIв Ардзынба Гета. Ауи йылхIватI афестиваль гIвхъвыкIта йшалазлуш. Йапхъахауа ахъвы а-Конгресс ЙхIаракIу асовет аунашвачпагIв Эгьзакь Мусса йкубок ахъазла хвитта абакIрала анкъвакъвра акIвпI. Ауи Гвдауыта апны йакIвшуштI. ЙгIвбахауа ахъвы акультура йазынархазлуштI йаргьи Согъвым, АмхIаджьырква рдзытшпурам апны йакIвшуштI.
«Ауаъа ауагIа йырбуш аджьащахъвараква йгIарылукIгIушта йаъапI абазаква апхъала атаца дшгIадыргалуаз гIазырбауа аргылчIв. Ауи акIвымкIвагьи йауацIыху агIарбарта чатыр апны Апсны акъральыгIва музей акъачIвахыртаква йгIарыгIвнырхуаш апкъыгIвакви АлбыргIан амузей аэкспонатква рсураткви гIаквырцIуштI. Йара ауаъа йгIадырбуштI ари агвыргъьахъв ахъазла йгIаргуаш абаза фашаква. Ауатыкв шабгу абазаква щарда зхъыцIуа рсуратква йыргIарбартахуштI, ауи йахьзызлуштI «Ауат хIабазапI – рхIвитI». Ачара йазалху ауатыкв апны «Алашара» адкIылара йаланакIуа апхIвыс совет йалакву йырмацIауыз арызкъква гIадырбуштI, йызтахъу дзачIвызлакIгьи ауат рхъагIара йырхъвых йауаштI», – лхIватI Ардзынба.
АААК апхIвыс советква рунашвахъцIагIв йгIалылкIгIатI афестиваль адгалагIвчва зымгIва йрапхъу мурадта йрыму ауагIахъа цIасква щатата йызму гвыргъьахъв пшдза зымгIва йддырбарныс, «рыжвла ъану рпсадгьыл йгIайуаш абазаква культура ауысла рыщтаныкъвара ахъазла щата бзи гIандыршарныс» шакIву.
Ауи йгIацылцIахтI афестиваль хачIв хъадата апахь йгылу апсуа-абаза уагIахъа радкIылра шакIву, адгалагIвчвагьи ауи йазынхауата «йазакIу хIтурых шгIадрысабапуаш».
«Ауи акIвпI алалра ду апны атурых, аэтнография йырпщылу ауысква гыларта ду зыркIуа. ХIара хIшапшуала, йагIвсыз, хIанадкIылаз азаман хIанаквчважвауа уахьчIва йхIмагIну рыцIа бзита йгIахIгвынгIвитI. ХIара ауи зныкI йхIызбжьаз ацзакIыра хIазыбжапI, ауи агIацарпахра йазынхитI абарат йрапшу ауысква», – лажва аллыргатI ауи.
Аспорт йазынарху афестиваль ахъвы акIвызтын, хвитта абакIрала анкъвакъвра Апсны апны ужвы гьакIвым йангIаларга. Эгьзакь Мусса йкубок ахъазла йапхъахуз анкъвакъвра жвасквша рапхъала йакIвшатI, ауищтара аспортсменква ауи швабыжта йыргвапхатI. Ауи йайззакваз йгIаргвалайыршвахтI хвитта абакIрала аклуб «Абаза» архъйагIв директор Боджгуа Леонид. Ауи йшипхьадзауала йагIвсыз асквшква руацIа аклуб «ахIагIара дуква йырзынадзатI».
«Ари асквш анкъвакъвра йалазлуштI Москва, Санкт-Петербург, Ростов, Краснодар, Калининград, Швача, йара ауи апшта Къарча-Черкес, Къабард-Балкъар, Лагъь Осетия, ГIвадахь Осетия, Йынгвыщшта йгьи Апсны акъалаква зымгIва йрыуу аспортсменква. Ауат гIвныбыжькIла йагIвшазлуштI: 15-16 сквша йырту йгьи 17-18 сквша йырту. ЗымгIва шалу аспортсменква 200 райхIа йнадзуштI», – йхIватI Боджгуа.
«Абаза» культура-спорт фестиваль Апсны апны хымшкI руацIа йакIвшуштI. Ауи октябрь а 16 Гвдауыта апны гIвымшкI йцуш абакIрала анкъвакъвраква йгIахъыртIуаштI. Октябрь а 18 афестиваль Согъвымла йайтыпахуаштIта АмхIаджьырква рдзытшпурам, Апсны акъральыгIва театр апахь культура программа дула йалгуштI. Согъвым апны агвыргъьахъв асахIат а 13 йалагуштIта джьасыдза йакIвшуштI.
швталра йа тшаншвцIара атахъыпI.