Адуней апсуа-абаза конгресс ауысхагIвчви Гагра йгьи Гагра район абзазагIвчви ранйара апны АААК ашIыпIа хъвшара асовет гIандыршатI.
Барганджиа Саид
Ахаша февраль а 27 атшын Адуней апсуа-абаза конгресс ауысхагIвчва Гагра район абзазагIвчва йрынйан адкIылара анхара, амурадква йгьи ахачIвква йрыквчважватI. Анйара амщтахь Гагра апны АААК ашIыпIа хъвшара асовет гIандыршатI, ауи даунашвачпагIвхатI Гагра район ауысхарта ахъада йтарагылагIв Цвижба Геннадий.
Цвижба Геннадий йшгIаликIгIазла, Гагра абзазагIвчва а-Конгресс анхара гIальаматра ду шазрыму гIадырбатI, щардагIвы йгIартахъхатI ашIыпIа хъвшара асовет йгьи АААК йрылалырныс.
«ХIара агIарбара бзиква хIрайгвгъитI. А-Конгресс амурадква рыхъазла згвы цхIауата анхара тшгIадызкIылуа рыцIа йшщардагIвхуш хIащтапI. Абызшви адемографии знархару апроектква ацлыхIхта абзазара йацалагIжьырныс хIтахъыпI. Акъраль ауацIала йъакIвызлакIгьи йаъу абаргвыраква ракIвпI хIаргьи хIзынйауа. ХIацрызхъвыцпI, хIацрыдынхалпI», – йхIватI ауи.
Гагра ашIыпIа хъвшара асовет далалтI хвитра абакIрала абжьагIвы Аристава Астамургьи. Ауи йшипхьадзауала, швабыж магIны амапI акъраль арайонква зымгIвагьи а-Конгресс амурадква йъарыцыркIуа. ЙгIаликIгIатI зымгIвагьи рсабап злу ажвлара ацынхара акIвыршара шатахъу.
«ХIара хIайгвыргъьитI а-Конгресс ахъвшара хIара хIпынгьи йъагIаншаз. ЙахьчIва адкIылара амурадкви ахачIвкви тшрыхахIыргIвазатI йгьи йрыцхIкIитI. Сшгвыгъауала, хIкъала, хIреспублика цIабыргыта рсабап злу, ауат рыхъазла магIны зму ауысква хIзахъвдаквыщтуаштI», – йхIватI Аристава.
Гагра апны АААК ашIыпIа хъвшара асовет 14-гIв алалтI: Агрба Астан, Сакания Слава, Таниа Темур, Джикирба Феликс, Беиа Алла, Аквсба Мадина, Папба Эдгар, Аристава Амина, Барцыц Рабстан, Агрба Закан, Габуниа Тенгиз йгьи Демерджипа Самсон. Гагра район абзазагIвчва рынйара далан а-Конгресс ЙхIаракIу асовет йалу, Апсны агуманитар рхъвыхраква ринститут аунашвачпагIв Ашуба Арда. Ауи айззара йалаз рпахь дгIачважвауата йхIватI адкIылара амурадква апсыуа-абаза этнос шабгу рыхъазла рмагIны шдуу.
«ХIара йара этноскI хIрыуапI, хIадкIылазара атахъыпI, йалкIгIата уыжв азаман – адуней апны ащтаныкъвара йацхърагIауа ауи аъара амаль анщарду. ХIачвызрыхъараз атурых гIаншараква хIырхъвыххта агIващагIараква рхIисап хIчпахра атахъыпI. ХIара (апсыуакви абазакви – аредакция ррытаразга) цIабыргыта йухIварыквын хIгьмачIгIвым, хIадгылрагьи атахъыпI. ХIыбызшваква ргIахчара ауыс йхIылшауа зымгIва азынахIырхара атахъыпI. Апхъахьыла хIара ауысквагьи ахачIвквагьи хIщардапI», – йхIватI ауи.
Гагра абзазагIвчва рынйара йалан а-Конгресс архъйагIв секретарь Гицба Инар, АААК апхIвыскви чкIвынргIи рсоветква рунашвачпагIвчва Ардзынба Гета йгьи Торчуа Леван, а-Конгресс ахабарргарта портал апресс-секретарь йгьи агIацIщтра редактор Барганджиа Саид йгьи Хагба Изольда, Апсны апны «Алашара» адкIылара ауысхагIв Айба Альас йгьи ЙхIаракIу асовет йалу Алшунба Инвер.
Адуней апсуа-абаза конгресс ауысхагIвчви Гагра район ауысхагIвчви ранйара Апсны Республика акъалакви арайонкви рпны йакIвшауа абзазагIвчва рынйара анархарала йпщбахитI. Анйараква рпны Адуней апсуа-абаза конгресс ауысхагIвчва адкIылара амурадква, ахачIвква, абзазара йаларжьыз йгьи апхъахьыла гвыгъарата йрыму апроектква йрыквчважвитI. А-Конгресс йгIалалуа ауагIа йрылахIарныс, ауат ауи анхара йгIадыркIылырныс йащтата ауысхагIвчва арат йрапшу анйараква акъраль арайонква зымгIва рпынгьи йакIвдыршуштI.
швталра йа тшаншвцIара атахъыпI.