Адуней апсуа-абаза конгресс Апсны йауата Санкт-Петербург йтагылу акъральыгIва бнатехника университет (СПбГЛТУ) йыцIалырныс зтахъкву абюджет тыпква ркIырныс йырцхърагIуштI. Ауи лшарахатI йхIаракIу апхьарти АААКи йазалху дырра зму аъачIвагIагIвчва рыхIазыррала йщацынхушла ангIалра мачвы анацIарцIа амщтахь.

АнгIалра мачвы ъацIарцIаз даквчважвауата Адуней апсуа-абаза конгресс ЙхIаракIу асовет аунашвачпагIв Эгьзакь Мусса ауи ацынхара ду йшаджвыквцIагу дацIачIвагъватI.

"УахьчIва хIара АААК Апсны йауу абитуриентква абнатехника университет йшыцIалуаш йацхърагIарныс хIангIалтI. Араъа хIызквчважвауа абюджет тыпква ракIвпI. ХIара апсуа чкIвыныргIа зтурых байу, Россиягьи ауи утыцIтагьи зунашва бзита йырдыруа йхIаракIу апхьарта апны дырра рауырныс лшара ъахIызрытуа хIайгвыргъьитI. ХIара хIгвыгъитI абнатехника университет дырра гIацIыргарныс АААК уахьчIва йъанхауа анахьанат акъральква рпны йбзазауа апсуа-абаза диаспораква йрыуу чкIвыныргIагьи йрымагIальаматхушта", – йхIватI Эгьзакь Мусса.

Ауи йгIацицIахтI АААК йгьи СПбГЛТУ рацынхара апны йащтагIайуа чIвырхъата йалуаш йара ауи апш нархара зму Согъвым ауниверситети Апсны акъральыгIва институткви наука нархарала рыцынхара шакIву.

АААК йгьи СПбГЛТУ йшацынхушла ангIалра мачвы ацIарцIатI

АнгIалра йшгIанахIвауала, ауи мачвы ацIазцIаз агIвхъатакI АААКгьи СПбГЛТУгьи йрымагIальамату ауысквала йалата аконференцияква, агIарбартаква, асеминарква, апрезентацияква, айззараква адыргаллуштI.

СПбГЛТУ аректор йхъвдаквцIараква заманкIла йзырхъйауа Мельничук Ирина ауниверситет Апсны йауу астудентква йалкIгIу лшара рнатырныс йшхIазыру лхIватI.

"ХIара арыпхьара анархара 21-ла бюджет тыпта 600 райхIа хIымапI. УахьчIвала хIара хIапхьарта йхIаракIу политехника апхьартата ухIва йауаштI: абна млыкврхIара, абнапкъра, амшIы адынхалра йырпщылу анархараква йырхъазымкIва араъа аршIыйара нархараквагьи щардапI – ландшафт архитектура, дизайн, датшагьи. ХIара багъьата йхъахIцIитI аршIыйара нархараква астудентква йрымагIальаматхушта, йауа ухIварыквын, Апсны запш аъам псабара гIаныршарапI, ауи зуыс здыруа аъачIвагIагIвчва рхъпшылра, райгвыгIвра йазыбжапI", – йылпхьадзитI ауи.

АнгIалра мачвы анацIарцIуз даъан СПбГЛТУ астудентква назахвуа акомиссия асекретарь Богатова Елена. Ауи йшылхIвазла, апхьарта абитуриентква злацIалуаш архъвыхраква штшрыздрыхIазыруаш йырцхърагIарныс, йатахъу методика цхърагIагала йадыргалырныс йхIазырпI. Ауи акIвымкIвагьи ауи ауниверситет йастудентхуш апхьара йапщыламкIва датша уыста тшыздыркIыл йауаш гIашIылпхьадзатI.

"Апхьара йахъазымкIва ауниверситет агIвычIвгIвыс йызхIарныс лшара бзи йнатитI. СПбГЛТУ апны запш умауаш спорт кафедра аъапI. Ауи спорт квпшырата 70 райхIала йынхитI, хIстудентква Россия, Европа, адуней анкъвакъвраква йрылазлитI. Ауниверситет апны астудент хъаунашвахъцIара швабыж тшауацIыхра ду амапI. АршIыйара йхънахуа атеатр, ашвахIвара студияква рпны йыззычпу гIадырба йауаштI", – йгIахIгвынлыргIвытI анахвра комиссия аунашвачпагIв.

Апсны йауата СПбЛТГУ апны йапхьарныс зтахъу ауаъа рыцIа майрата йшзыцIалуаш ауысла info.spb@abaza.org электрон почтала йа +7 812 514 88 55 телефонла Санкт-Петербург апны йаъу Адуней апсуа-абаза конгресс ауысхарта тшазынадырха йауаштI.

АААК йгьи СПбГЛТУ йшацынхушла ангIалра мачвы ацIарцIатI

ЙЫЖВДЫРРА АХЪАЗЛА: Киров Сергей йыхьыз зхъу Санкт-Петербург йтагылу акъральыгIва бнатехника университет (СПбГЛТУ) асквш 2020 агIан сквш 217 ахъыцIтI. Ауи ъачIвагIа гIацIгарала аквтанай, йхIаракIу, йкIьыду арыпхьара программаква архъйитI; абна млыкврхIара, абнапкъра, амшIы адынхалра, абнахимия, ашвъабгъьычпара, агидролиз рхарджьра нархараквала архарджьра, анаука йгьи анаука-арыпхьара нхара йапщылу аъачIвагIагIвчва арыхIазыритI, шIыц-шIыц йанарыпхьитI, ръазара йаланархIитI; анхара йаквыргIапсу, йцIолу анаука рхъвыхраква акIвнаршитI.

СПбГЛТУ акъраль йхIаракIу абнатехника апхьартаква зымгIва йрапхъата надзара щардала йалу аъачIвагIа арыпхьаща йазцатI. УахьчIвала ауаъа студентта 6000-гIв райхIа апхьитI, ауат йаргвану йгьи йхъару агIвыма къраль 42 йгIартыцIызгьи рылапI. Ауниверситет арыпхьари анаука рхъвыхракви рыхъазла щата багъьа амапI. Ауниверситет арыпхьагIвчва ргвып цIаста йщаквгылхьаз арыпхьащи анаука нхащи йрыццауата анархара шIыцквагьи тшауацIддрыхитI, ауатква зымгIва рнадзара шбзийу аъачIвагIагIвчва аквшахIатхитI. Арыпхьара акIвзыршауа апрофессоркви арыпхьагIвчви зуыс бзита йыздыруа гвыппI.

Ауниверситет йанакIвызлакIгьи Россия Федерация абнатехника апхьартаква наука йгьи методика квтата йырзалуан. Ауаъа йынхитI Россия а-Госстандарт ашвъа зму экспертиза Аквта, акъральква рацынхара ргIапсра йахъвыкIу Абна млыкврхIари абна рхарджьри рдуней квта (МЦЛХП – IСFFI), Европа абна институт Санкт-Петербург апны ашта проект квта, Адуней бна институт йаланакIуа абни абна пкъыгIваква ртехнологии рхъвшара.