Апсны акъральыгIва университет алата акыт апхьартаква рапхьагIвчва рыхъазла этнография йазынарху алекцияквала проект шIыц джвыквнажьтI Адуней апсуа-абаза конгресс.
Адуней апсуа-абаза конгресс ашIыпIа хъвшараква рыцынхарала ахъвшари Апсны акъральыгIва университети этнография нархара зму алекцияквала проект шIыцкI йадынхалуа йалагатI.
Апроект апкъ йтата йапхъахуз алекция Эшера аквтанай апхьарта апны ахваша, мартI а 10 атшын йакIвшатI.
Апсуакви абазакви разазаъащаква ртурых йгIаквчважвуз рхъвыхрата йадыргалыз йапхъахуз алекция дгIадрайгватI Апсны акъральыгIва университет апны атурых, археология йгьи этнология ркафедра адоцент СалакIая Сослан.
СалакIая йшихIвауала, апхьагIвчва дара-дара хIтурых ддырдыруа йалагара ахIатырла апхьарасахIатква йрыланамкIуата Апсны атурыхи акультури йырзынарху ауысква рыцакIвуыршалара атахъыпI.
«Апроект апкъ йтата йапхъахуз алекция атурыхдырыгIв, анаука уысхагIв, Апсны Республика йапхъахуз а-Президент Ардзынба Владислав дъапхьаз апхьарта апны йъакIвшаз ари ауыс чIыдахъвыла магIны гIанатуазшва йызбитI. Эшера аквтанай апхьартагьи анахьанат апхьартаквагьи рапхьагIвчва хIара йапхъахуз хI-Президент хI-Псадгьыл атурых ййырдырырныс шитахъыз йгьи йшидыруаз швапхата йырзалра атахъыпI», – йхIватI ауи.
АГУ адоцент апхьагIвчва шджьгарыз, алекция ззынархаз ауысква йрыквчважварныс йшазгIашыкъыз гIаликIгIатI.
«Йапхъахуз алекция апсуакви абазакви разазаъащаква йырзынархан. ХIара хIуагIахъа шгIаншаз, апсуакви абазакви атурых лахьыта йырзалнахыз хIрыквчважватI. АпхьагIвчва ахъазгIваца йдзыргIвуа йгьчIвамызтI, айчважвара йгIалалуан, дара йырдыруа рхIвун, йрымдыруа йазцIгIун. Сшхъвыцуала, аинтерактив формат шIыц абзирала апхьагIвчва Апсны атурыхи акультури ддырдырырныс рыцIагьи йрымагIальаматхуштI», – йгIацицIахтI ауи.
АшIыпIа хъвшараква рыцынхарала АААК ахъвшара аунашвахъцIагIв Жьыба Дмитрий йшгIаликIгIазла, ужвы ари асахIат апроект акыт апхьартаква ркласс ахIбаква рапхьагIвчва ракIвпI йгIаланакIуаш.
«Адуней апсуа-абаза конгресс апроект шIыц Апсны атурых, аэтнология, аэтнография, акультура йырзынарху лекция абаркIырата йаъазлуштI. Ауат алекцияква рпны акыт апхьартаква ркласс ахIбаква рапхьагIвчва интерактив амальла апхъанчIви заман угIалагата Апсны атурых рархIвуаштI. Алекторква апхьагIвчва айчважвара йшгIаланадырхIвуш йащтазлуштI, ауат йрыцынхуштI. ХIа йшхIпхьадзауала, ари апш адгылща апхьагIвчва хIкъраль атурыхи акультури азыгIальаматрата йрызрыму йаланархIуштI», – йхIватI Жьыба.
Жьыба йшихIвазла, этнография нархара зму алекцияква йгIарыпхьарныс Апсны йхIаракIу апхьартаква рарыпхьагIвчва, анауки акультури йбергьльу рынхагIвчва гIазшIыртлуштI.
«Алекцияква ракIвыршара атурыхдырыгIвчва, аэтнографква, аэтнологква гIаланахIыркIуаштI. Ауат апсуа уагIа ртурыхи ркультури йырзынархата йырдыруа зымгIва йгIадзынгылуа чкIвыныргIа йрыцагIвыршуштI», – йгIацицIатI ауи.
Эшера аквтанай апхьарта адиректор СакIаниа Фатима АААК йгIаланагаз апроект шIыц магIныта йаму даквгIашIастI.
«ЙшыгIдыруа апшта, арыпхьара ауыс баргвыра щарда гIалашвитI, апсуаква ртурыхи ргвбайари апхьагIвчва йрымагIальаматта йучпара ахъазла апхьарта зланхауа апрограммагIваца аннамхъауа ншитI. Алекцияква рагIан арыпхьагIвчва амакIыраквагьи гIаларгитIта – ауи апхьагIвчва аъачIвагIагIвчва рдырраква гIаршIыркIгIарныс йгIарцхърагIитI», – лхIватI ауи.
СакIаниа йгIалылкIгIатI аинтерактив лекцияква апхьагIвчва апхъахьыла Апсны атурых дара-дара рыцIа цIолата йддырдырырныс рымагIальаматхарныс йшахъвуш.
Этнография йазынарху алекцияква рабаркIыра апкъ йтата апхьара сквшы ацIыхъвадза цанйаракI акIвшара атахъыпI. Апхъахьыла апроект рхъйащата йамазлуш ауысла Апсны акытква рпны йгIаныршу ашIыпIа хъвшараква руысхагIвчва йрайкьангьашуаштI.
швталра йа тшаншвцIара атахъыпI.