Йызкьазууыз адиспансеризация Адуней апсуа-абаза конгресс сентябрь а 15 йгIашIарышвта а 18-дза ПсхIвы кыт апны йакIвнаршатI. Анахьанат акытква йгIарыквухырквын араъа уагIата йгIаланакIыз агалагьи йщардагIвын.

Акыт ацара ъабаргву йгIалцIла хысквша цIуата ауи абзазагIвчва рзгIвадара гьдмырхъвыхсызтI. АААК акыт йту дугьи хвыцгьи рзгIвадара архъвыхра хъвдаквцIарата йнанауахвтI. Ареспублика згIвадарахчарала а-Министерства, СогIвым район аунашвахъцIарти аполиклиникакви рцхърагIарала адиспансеризация швабыж йауацIыхта йакIвшатI. Асамолет ауылагьи арылагьи гIван-гIван йпссгIатI. Диспансеризация апкъ йтата ПсхIвы йапхъахауата УЗИ йгьи ЭКГ ргIапсгаква ргатI. Рейс кIьыдала акыт рентгени флюорографии злахъырхуа йатдрыпауа рентген диагностика ргIапсга ргатI.

Ари акыт ацара йагIаджвыквцIагIвхаз арыпхьарали жвлара джьгаррали згIвадарахчарали АААК ахъвшара аунашвахъцIагIв Хагба Изольда лакIвпI.

«Ари йапшу йауацIыху ауыс зджьара йгIанымхауата гватшныта тшазадыгIгалтI. ПсхIвы йрыдынхалуа СогIвым район аполиклиника акIвпIта – апхъапхъа аполиклиника айъазагIв хъада Тыжвба Андрей дхIыцта ауыс шадыгIгалуаш лыхIхтI. Ауи амщтахь згIвадарахчарала а-Министерства апны аминистр йтарагылыгIв Делба Саиди айъазара-профилактика нхарала а-Министерства аунашвахъцIарта аъачIвагIагIв хъада Гуниа Есми хIыцта агвып айъазагIвчвата йрылазлуш щаквхIыргылтI. СогIвым район ахъада Читанава Алхаси ПсхIвы кыт ахъада Новинкин Петри акыт йцушыз айъазагIвчва ргвып бзазарта рызгIараутI, йауа ухIварыквын, ауат ауаъа хымшкI йынхара атахъын. ХIара йапымшвтуата аэропорт телефонла хIрабадыруан, ПсхIвы йпссгIуш арейсква агвынхIыргIвуан – ауаъа апссгIара амш аъаща йапщылапI», – лхIватI Хагба Изольда.

Датшагьи ауи йгIалылкIгIатI ари йапшу ауыс йапшым абаргвыраква шапщылу, ауаса ауатква зымгIва ахъвдаквырщттI, акыт йъацазгьи ПсхIвы абзазагIвчва швабыжта йрысабапхатI.

«АйъазагIвчвагьи, хIыздгылыз зымгIвагьи хIхIатыр ъарбаз абзирала акыт апны йнымшас рхъвыхра акIвхIыршарныс хIылшатI. Швабыж йхIгвапахатI акыт абзазагIвчва йырзыхIчпаз хвы азырымбауата йъагIанырымжьыз.

Акыт ацара баргвыпIта – ПсхIвы абзазагIвчва йаназаману рзгIвадара дырхъвыхырныс рчвыбаргвпI. Ауи йгIалцIла ауагIа рзгIваква гIардырра йахъазымкIва йчпара атахъугьи рзыщаквдыргылуата йадыгIгалыз ари ауыс, кьангьаш аламкIва, йатахъдзан, сабапгьи алан», – йгIалылкIгIатI Хагба.

Анхара хымшкI агатI. ЙшцIасхаз апшта, апхъапхъа ауагIа ща рылырхын йдырхъвыхтI. Абиоматериал НИИЭПиТ анхагIвчва йнарахвын йара ауи амш самолетла СогIвым йыргатI. Ащаква ргIарбараква йащтагIайуаз ащымта айъазагIвчва йырнапIыцIашвахьан. Ауи акыт абзазагIвчва йнархъу диагностика йгIакIылсырныс лшара рнаттI.

Адиспансеризация знархараквала йапшым 11-гIв айъазагIвчва алан: акардиолог Пипиа Инга, амедахща Нарманиа Ева, арентгенолог Берзениа Аслан, астоматолог Амычба Лев, агинеколог Читанава Оксана, асаби хирург Апба Зита, аневропатолог Сангулиа Фатима, аэндокринолог Аргвын Нана, аофтальмолог Кове Анна амедахща Царгуш Мадина длыцта, ауролог Смыр Давид, атерапевт Тыжвба Андрей йгьи НИИЭПиТ анхагIвчва Горухчиева Фаини Трапщ ХIамиди.

Арыпхьарали жвлара джьгаррали згIвадарахчарали АААК ахъвшара аъачIвагIагIв Хьышба Науыр акыт абзазагIвчва амедицина рхъвыхра штшаздрыхIазырыз гIаликIгIатI:

«ЙхIвара атахъыпI акыт абзазагIвчва швабыж пхата йшгIахIпылыз. Йубун ауат йшауаш апшта архъвыхраква зымгIва йгIаркIылсырныс шыртахъыз. Йшабгу йгIауахвырквын, ауагIа згIвадапI. Ауаса урология, кардиология, стоматология нархараквала гватра ззыбачIву проблемаквакI гIараутI. Офтальмология нархарала йгIауахвырквын – йымкъвауата хирург дрыднымхалуазтын зылаква йрымбахуаш зджьакI аъапI. Зунашва схIвауа айхIарагIв зныбыжьла йнаскIьахьу уагIапI».

Агинеколог Читанава Оксана акыт абзазагIвчва данырпшуаз гвы зылтыз хIыцагIвылшатI.

«АпхIвысква тшгIарызмырдыруа, ауаса йрылу згIваквакI гIасаутI, ауат хIрайъазуштI. АпхIвысква зымгIва руацIа рак амазтын рщала йхIырхъвыхтI. Анализта йгIахIахвыз зымгIва СогIвым йыгIгуштI. Ауаъа йынхауа ацитологква мшквакI руацIа ауат ргIарбараква гIахIархIвуаштI», – лхIватI Читанава.

Акыт рхъада Новинкин Петр ари ауыс бзи адгалра йапщылаз зымгIва дшырзыразу йхIватI, йакIвдыршаз адиспансеризация магIныта йамугьи гIаликIгIатI.

«СынчIва зджьара йгIанымхауата йгIахIыдахIвтI. ЙгIалскIгIара стахъыпI Адуней апсуа-абаза конгресс. МызквакI рапхъала ауати хIари хIанйатI, сентябрь ари ауыс шадыгIгалуашыз хIаквчважватI, йаргьи уахьчIва йсхIва ауаштI ауыс тамамта йъалыхIхыз абзирала зымгIва йнардзата йшхъйаз. ХIара ари апш лшара ъахIауыз хIайгвыргъьитI, ауыс йапщылаз дзачIвызлакIгьи хIизыразпI», – йхIватI ауи.

Диспансеризацияла апроект Апсны акытква рапхьартаква рапхьагIвчва йнардзу медицина цхърагIара шрадзуш йазынархапI. Ауи АААК ЙхIаракIу асовет аунашвачпагIв Эгьзакь Мусса ахчала дацхърагIауамца йакIвшитI.