Санкт-Петербург 29.06.2021 22:30 18026

Адуней апсуа-абаза конгресси Санкт-Петербург апны йаъу Антропологии этнографии рмузейи (Кунсткамера) йацынхарныс ангIалра мачвы ацIарцIатI.

Барганджиа Саид

Адуней апсуа-абаза конгресси Санкт-Петербург апны йаъу Петр Ду йыхьыз зхъу Россия анаукаква ракадемия йачIву Антропологии этнографии рмузейи (Кунсткамера) (айшыста МАЭ РАН – аредакция ррытазага) ацынхауа йалагатI. Ацынхара ауысла ангIалра агIваша, июнь а 29 атшын мачвы ацIарцIатI АААК ЙхIаракIу асовет аунашвачпагIв Эгьзакь Мусси МАЭ РАН адиректор Головнев Андрейи.

Амузей апны йакIвшаз анйара агIан Адуней апсуа-абаза конгресс ЙхIаракIу асовет аунашвачпагIв Кунсткамера адиректоргьи анхагIвчвагьи йъацынхауа ахъазла дшырзыразу райхIвтI.

«КIьыдата йгIалскIгIара стахъыпI швабыж сшылзыразу КIавкIаз аэтнографияла Кунсткамера ахъвшара анхагIвы, аистория наукаква ркандидат Аблогачиева Макка СултIангьари йпхIа, ауи лбзирала акIвпI йара амузейи хIари хIшабадырыз. Асквш ауацIа хIара йацлыхIхыз апроектква хIрыдынхалуан, ангIалра мачвы ацIахIцIарныс тшазхIрыхIазыруан. Багъьата йхъасцIитI хачIвыта хIпахь йхIыргылыз зымгIва йнардзата йшхIзырхъйуш, даргьи КIавкIаз ауагIахъаква ртурых хчари Россия акультура тшауацIнарыхри руыс апны сабап шрылазлуш», – йхIватI Эгьзакь Мусса.

Амузей адиректор Головнев Андрейгьи Эгьзакь Мусса йразыра ажваква йзынайырхатI йгьи дйыргвыгъатI йара КIавкIаз ауагIахъаква наука хъатала драбадыруа абазаква рпныла дшгIалагуш.

«ХIара аэтнографква йалкIгIата йхIымагIальаматпI ауагIахъа мачIква, йауа ухIварыквын, ауат рхъа рзыхчатI, ауаса йанаъазара уахьчIва йъагIадзаз йгIащаквхарныс йгIарцхърагIаз закI рылапI. ЙайхIатагьи йсхIвапIта, ауат анахьанат рацкIыс руагIахъара рхчарныс ртахъыпI. АуагIахъа дуква рхъа рхчара ахъаз амаль мчквакI лырхра гьатахъхум», – йхIватI ауи. Головнев Андрей йгIацицIахтI Адуней апсуа-абаза конгресс атурыхгьи рыцIа цIолата ййырдырра шитахъу.

ЙызлангIалыз

АААК «Россия апны щайдза зчпата йбзазауа ауагIахъа мачIква: аэтнокультура проекцияква» проект йалу МАЭ РАН анхагIвчва ашта апны архъвыхраква акIвдыршарныс йырцхърагIалуштI. А-Конгресси амузейи йалата экспедиция адыргалырныс йаквдырпшитI.

АнгIалра йшанула, КIавкIаз ауагIахъа мачIква руысква рыквчважвара йагъьу анаука нхагIвчва гIаланадыркIуата йакIвшуш «КIавкIаз – акультураква рымгIвалысырта» семинар адгалри анхари а-Конгресс ащтийыгIвчвагьи рылазлуштI.

«Апсуакви абазакви XIX–XX асквшышвква рагIан йхъырхыз асуратква рпны» йатдрыпауа агIарбарта ахъазла материал гIаури йазкIкIри йазынарху ацынхара адгалазлуштI.

Амузей асквш 2022 агIан йакIвшуш Адуней апсуа-абаза конгресс Айззара ду йазынархазлуш асурат альбом арыхIазырра йацхърагIуштI.

АААК Апсны акъральыгIва университети МАЭ РАНи ангIалра адырчпалырныс йацхърагIуштI.

«АуагIахъакви акультуракви» серия йаланакIуата йгIацIцIуаш «Абазаква» том арыхIазырра йацыта йадынхалуаштI.

Ацынхара ауысла йлырхыз ахачIвква рырхъйара йазынарху йапхъахауа ачIвырхъаква уыжвласыла йджвыквырцIуштI.