Адуней апсуа-абаза конгресси Санкт-Петербург апны йгIаныршу чкIвыныргIа рквта «Охти» йалата Апсны ауагIа р-Абашта айсра апны йгIатыргаз АйгIайра амш йазынархата гвыргъьахъв концерт адыргалын йакIвдыршатI.
Апсны ауагIа р-Абашта айсра апны йгIатыргаз АйгIайра амш йазынархаз аконцерт акIвшатI Санкт-Петербург апны. Ауи чкIвыныргIа рквта «Охта» йгьи АААК йадыргалтI.
АААКи «Охти» сынчIва август агIан йшацынхушла ангIалра адырчпалтI. АнгIалра ауат йалата йапшым ауысква адыргалырныс йшагвынгIвуа гIанахIвитI. Ауат ауысква йрыуазакIыта йалтI АйгIайра амш йазынархаз аконцертгьи.
Аконцерт джвыкврымцIаскIва Адуней апсуа-абаза конгресс ЙхIаракIу асовет аунашвачпагIв Эгьзакь Мусса йыхьызла йайззаз зымгIва АйгIайра амшла драйхIвахIвтI АААК аппарат аунашвачпагIв Таниа Кан.
Аконцерт йалан адыгьа гIахIврала ансамбль «Нарт», Дагъстан агIахIвчва ргвып «Ритмы Кавказа», «Имамат» ансамбль йгьи агIахIвчва Хвапшыхв Арсоуи Бешехоева Зарини. АпшыгIвчва рпахь рыршIыйара гIадырбатI ашвахIвагIвчвагьи. Ауи апшта Лебедева Валентина аурышв йгьи аэстон уарадква лхIватI, Смыр Аида «Апҟақәа» (апсуа бызшвала – «Адзычваква» – аредакция ррытаразга) ашва лхIватI, Семенова Залини Ажьиба Диани «Вставайте, Кавказа сыны» («ШвгIагыл, КIавкIаз апачва») ацырхIватI.
Йалан апрограмма амакъымасчва ргIахъвмарраквагьи. «Ритмы гор» гвып рмакъымасчва адагъстан дауылква дрыхIвачватI, Арутюнян Вардан йбжьауа асабиква – армель дудук йгIастI.
«АуагIа аквчважвауата йшызгIазла аконцерт зымгIвагьи йыргвапхатI, ауи йапшу аларпшраква акIвыршалара атахъыта йырпхьадзитI – апсуаква рышта йанаъамгьи Апсны атурых рхъдымраштылуата, ргвбайара рхъа аладырдууа адуней йшрыларгуш апшта», – лхIватI чкIвыныргIа рквта «Охта» ауысадгалагIв Ажьиба Диана.
Санкт-Петербург апны йгIаныршу АААК ашIыпIа хъвшара йалу ШакIайа Мактина аконцерт ззынархаз ауыс хъадаква ауагIахъаква райгвара шакIву дацIачIвагъватI.
«Ажва аламкIва, ауи гвалагIваласракIгьи гIахIыланацIун. Сара аконцерт акIвсыршунта – апшыгIвчва тшырзынасырхалара, ауатгьи гIаланасырхIвара атахъын. Даргьи швабыж бзита йхIыцыркIуан. Аконцерт амщтахь ажва пшдза щарда гIахIархIвтI, «ари апш концерт ужвыгьи йаъазлушма?» – хIва азцIгIараква гIахIыквырпсун», – лгватраква хIыцагIвылшатI ауи.
ШакIайа йшылбауала, аконцерт дара адгалагIвчва йшыргвыгъаз апшта йакIвшатI, апрограмма байан, аномерквагьи гьапшымызтI.
«Ауи йалан аурышв уагIа рмакъымквагьи, угIащтIызпгIауа адагъстан гIахIвраквагьи, угвы йалахIауа узыздзыргIвуа армель дудукгьи, адзычваква уыла йгIацIазыжьуа асатин гIахIвраквагьи, Анчва ршIыйара гIазлайцIаз апсуа ашвахIвагIвчвагьи, уацгIамхIвкIва тшузымчхIауа уызчпауа аэстон уарад «Катарина»-гьи», – лхIватI АААК ауысхагIв.
Ауи Санкт-Петербург йту апсуа-абаза чкIвыныргIа рыцIагьи тшадыркIылырныс, йджьгарызларныс, рабашталагIвчва йадыргалуа ауысква йрыцыркIларныс йаквгIазшIылттI.
«ХIара йахьчIва йапшым адгалра уысквакI зыхъвда йхъахIцIарыз уагIа гьхIзымхъузтI. Ауи хIгвы йаситI, йауа ухIварыквын Петербург апны апсуа, абаза чкIвынчвакви ахIвссакви щардагIвыпI, ауат хIуысква азыгIальаматра рыцIа йрызрымазларныс хIтахъын. Ага ауаса йаъазтынгьи апшыгIвчва зджьара йгIанымхауата йразыта йамцIыцIхтI, ажва пха щарда хIзырхIватI. Ауатква ауыс шгIахIыдахIвыз йаквшахIатхитI. Анамхъараква ракIвпIта – ауат хIрыдынхалуаштI. Ари йапшу ауысква йъаджьащахъву йахъазымкIва анхарагьи уазырбжьитI», – лажва цIхъва алттI аконцерт акIвыршагIвы.
Аконцерт адгалагIвчва йразыра ажваква рзынайырхатI Санкт-Петербург апны йгIаныршу АААК ашта хъвшара асовет аунашвачпагIв Реквава Темур. Ауи аконцерт бзита йшадгалаз, апшыгIвчва ргвква йшырзынадзаз гIаликIгIатI.
Реквава Санкт-Петербург йту апсуакви абазакви ансисквша Абашта айсра апны АйгIайра амш шдыртлапIауа йхIватI.
«А-Конгресс ахъазла магIын ду амапI хIтурых агIаншара дуква гватра рзалхра. Ауат йгIадзынгылуа чкIвыныргIагьи йдхIырдырра, йшырхъмаштылуаш апшта хIрылабжьара атахъыпI. Апсадгьыл уаначвыхъару ауатква зымгIва угвы дрытыртыруа йуылаухIвитI. Сара насыпра дута йызбитI Санкт-Петербург апны Апсны Республика АйгIайра амш йазынархата ари апш уыс ду ъакIвшаз», – йхIватI ауи.
Адуней апсуа-абаза конгресс апхъахьылагьи Петербург апны чкIвыныргIа рквта «Охта» йрыцынхалуштI, йалата ужвыгьи йадыргалуаш уысквакI лырххьатI. Ауат шакIвшауагьи АААК ахабарргарта портал апны швзапхьуштI.
швталра йа тшаншвцIара атахъыпI.