Абаза драмтеатри «Меркурий» уагIахъа гIахIвыщала ансамбльи Апсны Республика апны КъЧР гIандыршищтара сквы 100 ъацIуа йазынархата йакIвшаз Къарча-Черкес акультура амшква йрылан.
Апсны Республика культурала а-Министерства ацхърагIарала КъЧР гIандыршищтара сквы 100 ъацIуа йазынархата Къарча-Черкес Республика АкъральыгIва филармония уагIахъа гIахIвыщала ансамбль аконцерткви АкъральыгIва абаза драма театр йдыргылыз «АмхIаджьырква рыщтала» спектакльи Апсны апны йгIадырбатI.
Апсны апны Къарча-Черкес акультура амшква цIыпх адзын агIан йадыргалырныс ргвыгъан, ауаса апандемия йгIалцIла йатдрыпара атахъхатI. Асквш 2022 май агIан агвыпква разъазара Апсны акъалаква Гагра, Пицунда, Гвдауыта, Ткъварчал, Очамчыра рпны йырзыгIарбатI. Агастрольква акъала хъада СогIвым апны йалдыргатI.
«УгIахIвы, Апсны!»
Май а 28 ахъвлапын Гвымба Рожден йыхьыз зхъу Апсны афилармония асцена апны Къарча-Черкес Республика АкъральыгIва филармония гIахIврала атеатр «Меркурий» аконцерт акIвшатI.
Атеатр ршIыйарала аунашвачпагIв йгьи абалетмейстер хъада, КъЧР йгьи Апсны рпны гIатгара зму артист Гагьи Мурат йшихIвауала, Къарча-Черкес акультура гIазырбарныс йгIайыз агвыпи артисткви рыхъаз Апсны апны агастрольква гIаншара дупI. Гагьи Мурат аконцертква зымгIва ъакIвшаз апещква йшрызназ, апшыгIвчва агвып швабыж пхата йшгIарпылыз йхIватI.
«Агвып йхIылапI Апсны йапхъахауата йгIайыз уагIа. ХIгIахIвчва апсуаква шгIахIпылыз гьырзыджьащум – «Концертипхьадза амщтахь абараса хIдрысаслушма – чаражвра, абацкъьа, абыста хIызпшлушма?» – хIва йазцIгIитI», – йхIватI аунашвачпагIв йгьи йгIацицIахтI:
«ХIара зджьара йгIанымхауата йхIгвапапI араъа хIаъата йхIайщчву апсуаква рпахь хIгIахъвмарныс».
Аконцерт тшазылрыхIазыруата 16 сквша йырту артистка Бавыжв Алеся лгвы йтшуз гьцIалымкIытI: СогIвым апны дъагIахIвуаш «йалкIгIата гвалагIваласра гIалыланацIитI». Ага агвып гIвысквша дрыцгIахIвхьазтынгьи апхIвыспа ауат «дгIарылалшIыцта» тшылпхьадзитI.
«Агастрольква йрыуу йцIыхъвахауа аконцерт СогIвым апны йакIвшитI, ауи йгIалцIла йхIзычпауа зымгIва гIахIырбара атахъыпI. Сара цысквша саныртаз салаган сгIахIвитI, ауаса адуква ари йапхъахауа гвыпта срыцгIахIвитI», – лхIватI Алеся.
Аконцерт «АмхIаджьырква» гIахIврала йгIахъыртIытI – ауи агвып ауагIа йызлардыруа гIарбагапI. Йшалу апрограмма КIавкIаз ауагIахъаква ргIахIвыща гIазырбуз 17 номеркI алан.
Ансамбль ашвахIвагIвчва абаза уарадква рхIватI, агвып йгIадрайгваз СогIвым йауу рыгIвза Квициниа Макландагьи апсуа ашвакI лхIватI. «Меркурий аконцертква зымгIва «УгIахIвы, Апсны!» хореография композицияла йалгалитI. Ауи агвып гIанзыршаз, Апсны йгIадрита сквш 30 КъЧР апны йбзазаз, йынхаз КъЧР йгьи Апсны руагIа рартист Таниа Валерий йыргылтI.
«ХIъагIахъвмарлакIгьи хIпрограмма абари агIахIврала йалхIыргалитI. Ауи апшыгIвчва рыуа заджвгьи гвалымста дгьгIаннажьуам, йауа ухIварыквын ауаъа апхъала апсуа гIахIвраква рпны йуымбушыз тшытквакI алапI. Ауи гIазхъвыцызгьи йзыргылызгьи Таниа Валерий йакIвпI. ХIгвып ауи йгIанйыршатI. ХIара ауи йбжьаз хIакIвпI, йыщта хIырцитI, абар йпсадгьылгьи хIгIайтI», – йхIватI Гагьи Мурат.
Ауи йгIацицIатI агIахIвчва араъа агIахъвмарра мачIкIгьи йшачвшвуз: апрограмма айхIара злалу апсуа-адыгьа фольклорпI, апещ ауи бзита йыздыруа «хореография агIвычIвгIвыс дуква» – пIатIу зкву сасыта йгIадрайгваз йбергьльу агIахIвчва, артистква гIвнан.
Аконцерт амщтахь ауат йрыуазаджву Апсны ауагIа рартистка, «апсуа гIахIвра дакIважвата» йырпхьадзауа Герзмава Майя лгвы пшыхь штасыз гIахIалхIвтI.
«Ари агвып са щарда цIуата йыздыритI, ауаъа са сыгIвза аргваны, сызцгIахIвуаз Таниа Валерий дынхатI. Ужвы агвып йрылу агIахIвчва рыуа щардагIвы срабадыритI. Лагъь КIавкIаз ауагIахъаква разъазара швабыж бзи йызбитI, нцIрата йсыму ауат ргIахIвыщала сгIахIвуан. Анчва дырзыразхатI йъахIызгIайыз, щарда цIуата йгьсымбахсызтI. АдахIвраква рымазтI!» – лхIватI Герзмава Майя.
Апсны афилармония апны апшыгIвчва рыхъазла йдучвам гIарбартакI адыргалтI. Абидоль апны Къарча-Черкес апны йгIащаквдыргылхыз анапIылачпараква гIазырбауа апкъыгIваква гIаладыргылтI. АпшыгIвчва рыуа зджьакIы кIара рхвгIара ртахъын, аэкспонатква рыуа закIгьи шрымтиуа ангIарархIв ргвы цIыркIгIауа йгIанхатI.
Ауаса Черкесск йтагылу акультури азъазари рколледж напIылачпара азъазарала ахъвшара аунашвачпагIв ЛапIгъва Эмма дазгIашыкъдзата пкъыгIвипхьадза даквчважвун.
«Ари «айгвара йамхIачIвапI» – гIвмгIакI амапI. Ари ауагIа йырмакъым ъамапсымапI – мшIкъвабыз, ауи аструнаквагьи йызласуагьи атшцIыхъва йгIалхпI. ХъацIа башлыкъ зымгIвагьи йырдыритI, араъа йыжвбитI рызна рахъвала йрыпшдзу пхIвыс башлыкъ», – йгIашIылпхьадзун ауи.
АгIарбарта апны датша зджьарагьи уызнымйуш апкъыгIва пшдзадзаква, цIабыргыта, йщардан. Асхъи рахъви йгIарылху арыпшдзагаква, ажва ахъазла, апхIвыс йгьи ахъацIа асква рыхъазла йалапу аджьынджьква – ачокъвква. Абакъбакъква – атаца йахъалцIуз ащапIхъацIа хIагIаква – ауат лышвата агъыцIара дангылаз зымгIва дгIархъыхIвун. Акъамыш абыгъьква йгIарылху аджьаргьан йапшымкIва йгIадрысабапуан: амсылманква ауи йыквгылата намаз рчпун, апсгьи йыкIвдыршун, асабигьи дамгварцIун, йауа ухIварыквын – ауи пкъыгIвас цкьапI. Джьаргьанипхьадза анахьанат йгьрапшым, йара атхыпхаквала йрыпшдзапI.
«Ауат рчваквала йгьапшымызтI, ашвыга ажвпIара зпщыдаз ауи… апслымдз апны зъара йыркIуаз акIвпI. МачIта йтаурызларквын гIвабджьа чвышхитI, щардата йукIрыквын – гIвабджьа аквыршвхитI, удзышваракIгьи гIанауахвитI», – аджьащахъвараква гIахъылтIуан ЛапIгъва Эмма.
«ЗымгIвагьи йырхьыгIу»
Йара ауи ауахъ Чанба Самсон йыхьыз зхъу Апсуа драма театр асцена апны АкъральыгIва республика абаза драма театр ТхIайцыхв Бемырза йроман «Нышв напIыкI» ащатала йдыргылыз «АмхIаджьырква рыщтала» спектакль гIадырбатI.
Абаза театр ъадзанхауа асквшы 20 руацIа ауи Апсны йапхъхауата йгIайтI.
Актриса Къвныжв Ратха аргылчIв апны атурасы хъадала – лаба дйыцта дъахъысыз Трыквшта апны рыцхIагIара щарда зхътысыз абаза пхIвыспа Асйат лтурасыла – дгIахъвмартI. АргылчIв афыр чвгьара лзызхаз ахI йпны лща лхахырныс къару лаутI, лылахь йгIанакIыз ачкIвын дйыцта лпсадгьыл дгIайхнысгьи лылшатI. Актриса йапхъахуз арепетицияква рагIан лфыр длымарыцхIахауата дшчIвыуаз лхIвахитI.
«Сгвы швабыж далсуан. УацIыхван тшабыстхын – йаргьи сгIаунащтхтI. Швабыж йспектакль баргвыпI, ахъвмарра учвхIатлапI, агIаншараква зымгIва гвыла йугитI. Ауаса хIтурых хIхъхIраштыл йгьауашым. Ауи хIара апсуаквагьи абазаквагьи йацыхIчIвпI, хIыщайдзагьи азакIыпI», – йгIалылкIгIатI Къвныжв Ратха.
Актер шIа Быджь Назир «Апсны апшыгIвчва джьайщатI», ауат «рлахIвараква швабыж йшымчу, даргьи шджьгару» гвы айттI.
«АпшыгIвчва йыншауа йшазаъу рдауышквала йангIадырбауа асцена апны йгIахъвмаруа актер швабыж йгIайцхърагIитI. Ага хIара абаза бызшвала хIгIахъвмарыргьи апшыгIвчва атакIра йазымпшуата йыншауа йаланахIвитI. КъЧР апшыгIвчва йгIарыквухырквын [Апсны апшыгIвчва] рлахIвараква ргвы йгьтаркIуам, йгIатырщтитI. ХIара ауи швабыж йхIгвапхатI. ХIгвыгъитI Апсны датша спектакль хIымата хIатагIайхырныс», – йхIватI Назир.
АпшыгIвчва йрылаз Шармат Ханифа арадиуа атакIра даздзыргIвызтIхIва йырхIвуз ащарда ауидъагьи йгIалгвынгIвытI.
«Апсышви абаза бызшви швабыж йапшыпIта – айхIара гIаугвынгIвуан. Аспектакль угвы йнадзитI. ЙгIащтIнахуа ауыс, КIавкIаз айсра йащтагIайыз ауагIа ртгара – ауи, ажва аламкIва, зымгIвагьи йхIхьыгIапI. Абазаква хIа йхIайщчвапI, хIаргьи ауат Апсны апны йыгIбарныс йанакIвызлакIгьи йхIгвапапI. Агастрольква рыцIагьи йщардазтI. Апеспубликаква культура амыгIдапхьадзагьи рыцIа-рыцIа хIабадыруаштI, азаджв азаджв йпны сасра хIцалуштI», – йылпхьадзитI Шармат Ханифа.
Апсуа драмтеатр ауатыкв апны йгIахъвмарыз абаза артистква сасчва зызгIайыз пшвыма гвапакI йапшта дырпылтI атеатр аунашвачпагIв Чолокуа Алхас. Артистква тшыршвырныс ахъазла йагъьу апещква рзалырхтI, атеатр анхагIвчва заджвы дрылымшвтуата ауат йшгIахъвмаруаш акIвымкIва закIгьи йшазымхъвыцуашыз апшта йыртахъу зымгIвала йадыргалуан.
«ХIара хIуатыкв апны йхIцрийу хIуагIа, хIайщчва гIахъвмаруан. Ауат рспектакль Апсуа театр асцена апны йъагIадырбаз араъа йауу апшыгIвчва рыхъаз магIын ду амапI. ХIайщчва ртеатр азъазара гIбарныс хIылшатI. Уайгвыргъьушта йаъапI апшыгIвчва абаза театр агастрольква гватра ду шырзалырхыз – йрыцыркIныс йгIайтI, апещ йадрызнатI», – йхIватI Апсуа драмтеатр адиректор.
КъЧРи Апсни ркультура амдарала ауысква ауи апхъалагьи йакIвшун, апхъахьылагьи пышвтдъа йакIвшалуштI. Культурала а-Министерства апны йшырхIвазла, апсуа эстрада ашвахIвагIвчвагьи Къарча-Черкес йцуштI. Йанцуши йцуш дзачIвуи ужвыгьи йдрытамамыркIвитI.
швталра йа тшаншвцIара атахъыпI.