Барганджиа Саид

Апсуа уысагIвчва шIаква Читанава Инар, Гицба Инал, Къапщ Шарида йаларцIаз жвипщуысакI абаза бызшвала йатаркIтI. Ауи ахабар АААК ахабарргарта портал йгIадйырдыртI апсуа йгьи абаза чкIвыныргIа радкIылра йазынарху «Абазги» проект унашва ахъызцIауа АмкIваб Ахра. АтакIраквагьи ауи апроект апкъ йтата йдрыхIазыртI.

«ЙгIашаркIкIапхьадза майрума зымгIва рыхъазла убылныс?»: Аджьба Таиф дгIахIгвалашвахуата

«Ауысаква зымгIва [абаза бызшвала] «Абазашта» газет йгIаншвалтI. Ауи апсуа-абаза студентква радкIылра йазынарху чIвырхъа бзипI. Ауысаква атазкIыз йбергьльу абаза уысагIв Апса ФатIимат лакIвпI», – йхIватI АмкIваб.

АуысагIвчва рыуа азаджв, Гицба Инал, сквш 25 дыртапI. Ауысара дхънахуа далагищтара жвасквша цIитI, йапхъахуз йуысаква «Агара» газет (абаза бызшвала – «Гара», Гвдауыта район апны йгIацIцIуа агазет – аредакция ррытаразга) апны йгIаквырцIатI. УацIыхъван ауи йуысаква ауниверситет апны йгIацIырщтуа ауысагIвчва шIаква ржурнал «Аҧсынгьери» («Псыргла» – аредакция ррытаразга) йгIаншвалуа йалагатI. АуысагIв шIа Апсны агIвгIвчва р-АдкIылара ажвлара-политика журнал «Алашарагьи» йгIаквицIун. Гицба Инал йгIвытI асквш 2015 агIан апсуа бызшвала йгIацIцIыз «Сгвы ъадзакшауа сара йсыгIамтапI» азкIкIрагьи. Инал йшгIахIайхIвызла, йуысаква апхъапхъа Жиба Алина урышв бызшвала йаталкIын уацIыхъван ауи латакIраквала Апса ФатIимат абаза бызшвала йанлыргIалхтI.

«Ажва гьалам, хIара – ауысагIвчва шIаква – хIыхъазла ари гIаншара дупI, йауа ухIварыквын хIуысаква абаза бызшвала йхIвачватI. Ауи [абазакви хIари] акультура уысквала хIабадырра рыбагъьара йгьи тшауацIнарыхра ахъазла магIын ду амапI», – йхIватI апсуа уысагIв.

«Абазашта» газет асоциал-экономика хъвшара аредактор Дзыуа Аминат йгIалгвалашвахитI сквш 30 рапхъала – ауи аъара дынхитI лара агазет апны – аредакция апны апсуа уысагIвчва руысаква щардата абаза бызшвала йшатаркIуаз. Ауаса йцIыхъвахауа асквш 25 руацIа, Аминат гвы шалтуала, «Абазашта» апсуа уысагIвчва руысаква абаза бызшвала йгьгIаквнамцIахуазтI. Ауи акIвпIта, ужвы ауат ргIаншвалра йгIалукIгIуш гIаншарапI.

«ЙыздыритI бзита адуней сыззгIаквлыз»: Мыхц Кьарим йысквш 70 йадахIвуата

«Сара схъатала абазаква арат йрапшта йгврыхву апсуа уысагIвчва шIаква шаъу рдырра стахъын. ЙалкIгIата магIын ду амапI ауат руысаква абаза бызшвала хIъазрыпхьауа. Ауи швабыж йджьащахъвапI. РыцIа хIаргванхара ахъазлагьи щарда гIанацIгIитI. Бзихушын абаза уысагIвчва шIаква ргIвыраквагьи апсуа бызшвала йатакIзарквын», – лхIватI Дзыуа Аминат.

«Абазги» проект «Алашара» Дуней адкIылара агIаджвыквцIарала Апсны йгьи Къарча-Черкес къральыгIва университетква йадырчпалыз ангIалра апкъ йтата йдырхъйитI. Апроект апсуа йгьи абаза чкIвыныргIа радкIылра йазынхауа уыс щарда алапI.

Ауи апроект апкъ йтата Апсны къральыгIва университет (АГУ) апны йбергьльу апсуа уысагIв йгьи алитературадырыгIв АмкIваб Владимир йюбилей йазынархаз апсуа йгьи абаза студентква ранйараква акIвшахьатI. Ауат анйараква ракIвпI йгIазрыцIсыз апсуа чкIвыныргIа руысаква абаза бызшвала йатакIра ауысгьи. Апроектла АГУ апны ауысара йазынарху ужвыгьи уыскI акIвшуштI: абаза уысагIв ду Мыхц Кьарим йюбилей артлапIара.