Апсны апны йапхъахауата акоронавирус згIва шIкIгIара шгIаншаз гIардыртI, лхIватI Апсны Республика асанитар айъазагIв хъада Скорик Людмила.

АйъазагIв йшгIалылкIгIазла, азгIва гIазахвыз ачымазагIв Гагра къала дтабзазитI. Ужвы ауи йашIашIкIгIару акоронавирус гIазахвуа ачымазагIвква йрайъазарныс ахъазла рыцIа паса йадыргалыз Гвдауыта къала аквта чымазагIвтара апны дщтIапI.

«АчымазагIв ачымазагIвтара кIьыдата дщтIарцIатI. Ужвы асахIат ауи йзгIвадара аъаща уарыразуата йщаквгылапI. ЙчмазагIвхаз агIвычIвгIвыс Москва дцан дгIацапахтI, ауаъа нхара уысла даъан», – лхIватI Скорик.

Ауи йшгIалылкIгIазла, АкъральыгIва санитар-эпидемиология къвырльыкъвхарта ачымазагIв дызщтаныкъвата йаъу зымгIвагьи гIадрыбергьыльырныс рмурадта ари агIаншара цIолата йдырхъвыхитI.

«Ари акоронавирус згIва ъагIаншаз хIара хIыхъазла йгвынгIвырапI, апхъахьылагьи ашIашIкIгIара щарда хIрыквшахIатхарныс ауаштI, йшпакIву ухIварыквын хIкъраль абзазагIвчва ащарда уыста йгьрымбузтI Апсны Республика аминистрква ркабинет, апрезидент йхъвдаквцIараква зырхъйауа, азгIвадарахчара аминистерства йлырхыз ашвъаква йгIархIвуз ажванахъаква. ЙалкIгIата ашIашIкIгIара коронавирус згIва ъагIарауыз акъральква рпны йаъата йгIацапахкваз абзазагIвчва рпныква йаъазлара, тшдыркIьыдара шатахъу гьрыларымхIвузтI», – лхIватI лтшазынархара апны Апсны асанитар айъазагIв хъада.

Ауи йшылхIвазла, уахьчIвала Апсны Республика азгIвадарахчара аминистерства йрылшауа зымгIва гIадрысабапитI ашIашIкIгIара тшауацIнамхырныс ахъазла: гвгIвара ъагIаншауа йаназаману цхърагIара гIандыршарныс ахъазла атестква рчпитI, ауагIа рквтала ашIашIкIгIара ашварагIварара йалдырдзгIарныс ахъазла амальква нарахвитI, ажвлара ауыс зкву ддырдыритI.

Апсны азгIвадарахчара аминистр Цахнакиа Тамаз ауыс араса даквчважватI.

«Ари апш гIарбара (COVID-19 архъвыхра ауысла – аредакция ррытаразга) хIазымпшуата йгьаъамызтI», – йхIватI аминистр йгьи йгIацицIахтI рыцIа паса Россия аштаква, йалкIгIата акоронавирус згIва гIазахвыз ачымазагIвква рыцIа-рыцIа йъащардагIвхауа Москва, йгIартыцIхта акъральыгIва гIвына джьгарта йгIахъысхуамцара ареспублика щардагIвы шгIацапахуаз.

«ХIара йызнымкIва йхIхIвун швабыж йымчу амальква нахвра шатахъу: ауагIа ртыдзква йгIарджвылымцIырныс, агвыпква тшъазыркIкIуа, айззараква ъакIвшауа йрыламлырныс, йанамальынтшадзу – афачIвтйыртаква, аптакьква рпны йанцуш – акIвымкIва, йа азгIва агIарбараква рхъа йадырбалта ачымазагIвтара йанцуш акIвымкIва йгIаджвылымцIырныс. Швабыж магIны ду амапI дзачIвызлакIгьи тшйыркIьыдата йхъа дазхъвыцырныс, йауа ухIварыквын аэкспертква йшырпхьадзауала, апрель ацIыхъвадза азгIва йалахIауа йымгIвайсырныс закIы гьазхIвам», – йгIаликIгIатI Цахнакиа.

Ауи апхъала, апрель а 7 атшын щыбжьан намдзаскIва, Апсны Республика апрезидент йхъвдаквцIараква зырхъйауа Бганба Валерий щаквыргылра мачвы ацIайцIатI Псоу дзыгIв апны акъральыгIва гIвына ахъысырта акъральгIвчва зымгIва рыхъазлагьи йшхъыргIвауа асквш 2020 апрель а 8 асахIат а 00.00 йгIашIарышвта апрель а 20 агIандза.