Экологияли апсабара хчарали Апсны Республика акъральыгIва комитет аунашвачпагIв Читанава Савелий АААК а-Дискуссия клуб экологияла асекция алачIвара апны дсасын.
Барганджиа Саид
АААК аклуб йалакву Экологияли апсабара хчарали Апсны Республика акъральыгIва комитет аунашвачпагIв Читанава Савелийгьи дрылата апщаша, февраль а 13 атшын, Апсны аэкология йазынарху ауысква йрыквчважватI.
Анйара шабгаз азцIгIараквали аджьауапквали йалан. Йауырачвамыз йджвыквцIага ажва амщтахь Читанава Савелий аэкологии апсабара ахчари йырзынархаз азцIгIара 20 райхIа джьауап рыйттI.
«МшквакIгьи гьхIзымхъарызтI аэкология йапщылу абаргвыраква зымгIва хIрыквчважвара ахъазла, ауаса хIара Апсны ахъазла уахьчIвала рыцIа гватра ззыбачIву ауысква хIрыквгIашIастI: апслачваква райтыпара (апслачвака айтыпауата ауат рахIа йанрайшвауа агIан йщаквгылу ахабзаква щардала ймыгIвхъыргалитI – аредакция ррытаразга), архарджьра нхараква йгIархъшахъыцIуа амыгIвхъгараква. Ажва ахъазла, анышвкъвара адзыгIвква йыртапсара йгьи Апсны ахъазла баргвырата йаъу анышвкъваракIапсартаква руыс. ЙалкIгIу гватра азынахIырхатI апхьартакви асабигIзартакви рынхара эгология азыбжьара алацIара шатахъу», – йхIватI акъральуысхагIв.
А-Дискуссия клуб аунашвачпагIв Турава Ирина «Экологии хIгIакIвзыршауа агьагьара ахчари» сессия йаланакIуата йакIвшаз йгIвбахуз анйара ауагIа ргвы ари ауыс йшазыцхIауа шарцIабыргыз гIалылкIгIатI. ЙгIашвгвалахIыршвахпI экология нархара а-Дискуссия клуб анхара ауагIа рахIварали аклуб йалазларныс зтахъкваз ражвали йшаларцIаз.
«Ари ауыс цIабыргдзата хIкъраль ахъазла швабыж магIны амапI. Йаргьи уайгвыргъьушта йаъапI йгвалымсым уагIа щардагIв рзаман йамайгьдзауата акъраль апны аэкология аъаща апсахра ркъару аларцIарныс йъазыхIазыру. Ауат ауагIа (аклуб йалакву – аредакция ррытаразга) закI ззычпадзуш ракIвпI. СгвыгъитI экологияла щата зму проект хIызлыхта йгьи йхIзынырхушта», – лхIватI Турава йгьи йгIацылцIахтI: «Абараса акIвын сара аклуб ангIанхIыршуз ауи анхара сыла йшгIацIазыжьуаз: ъанатIа ду зму акъральуысхагIв згвы цхIауа ауагIа драчважвауа, ауат разцIгIараква йхътIыта джьауап рыйтхуа».
Аклуб алачIвара шабгу АААК YouTube канал апны швапшы йауаштI>>
АААК а-Дискуссия клуб йалу Цабриа Инал Апсны къральыгIва университет абиология-география хъвшара апны дапхьитI. Экологии апсабара ахчари апхьарта даныцIаркIваз йгIашIарышвта йымагIальаматпI. Ауи акIвпI йаргьи аклуб дгIазгыз.
«Апсны апсабара гIалцIырта байаква амапI, ауат тамамта йгIахIрысабапуа тшыгIбжьара атахъыпI. Йапшым адкIылараква ауагIа экология йазырбжьарныс йащтапI, апсабари агIалцIыртакви йрызсакъитI, ауаса йахьчIва хIанйара амщтахь йшгIасгвынгIвызла, аэкология йапщылу ауысква рпны апсабара хчара йазынарху ахабзаква хIырзыбжапI – датша закIы йапшым хIпсабара пшдза гIащаквыгIжьра ахъазла», – йпхьадзитI астудент.
А-Дискуссия клуб йалу ужвыгьи заджвы – Пачулиа Алиса – «Амч» жвлара адкIыларагьи далапI. Ауи дшхъвыцуала анйара рахIа бзирата йалаз ауи йалакваз «аэкологии апсабара ахчари руысла акъральыгIва пшыща ргIарныс», ауи знархару акъральыгIва уысхартакви ажвлара адкIыларакви згвы цхIауа ауагIи злацынха йауаш анархараква йрыквчважварныс ъарылшаз акIвпI.
«Читанава Савелий хIара (а-Дискуссия клуб йалакву – аредакция ррытаразга) хIгIаджвыквцIараква зымгIва йрыцикIырныс дхIазырта дгIачважватI йгьи йхIватI азцIгIара кIара гIаншузтын тшизынахIырха йшауаш.Сшхъвыцуала, хIара хIзацынхуштI, ажвапIта, ауыс зкву [рыцIа бзита] ажвлара йшдхIырдыруаш апшта, йауа ухIварыквын, ажвлара ауи рымагIальаматпI, дара йалырдыргIауа мачIпI. ХIара ауыс цIабыргыта йгIазырбауа ашвапхаква, ахабарква хIымазара атахъыпI – ауат хIхIырдырта хIшрызхъвыцуаш апш», – лхIватI Пачулиа.
Анйара гIвсахIаткI раъара йнайтI. Ауи йгIалыркIгIаз йаквчважвауата аклуб йалакву ужвы йахьъамгIвайсуаш, аклуб апны анхара амщтахь экология йахъвыта рпроект ззынадырхуш алдыргатI.
АААК а-Дискуссия клуб анхара йанархара хъадата аэкология йахъазымкIва рыцIа пасата йгIалырхтI апсуа бызшва гIащаквыжьри тшауацIнарыхри, цри бызшвала алитература ауагIа йшрылалуаш ацхърагIара, апсуа-абаза уагIахъа ртурых-культура тынха хчара, абашта наука тшауацIнарыхра, Апсуара ацIасква хчара. Ауат нархараквала айчважвараква аклуб апны мызкIы ауацIа гIван апщашаквала йакIвшитI.
швталра йа тшаншвцIара атахъыпI.