Акоронавирус шIкIгIара абакIра йазынархата аиммунофермент рхъвыхра амаль (йапшдзам азгIваква йырпщылата йалкIгIу антигенква ргIаура йазынарху алаборатория диагностика рхъвыхра амаль – аредакция ррытаразга) адиагностика ахъазла Апсны йгIархвгIатI рхъвыхра 1000 зларчпуш аэкспресс-тестква. Атестква «йазалху агIарбараквала йъатахъу апны» йгIадрысабапуаштI, йхIватI азгIвадарахчара аминистр, абзазагIвчва акоронавирус шIкIгIара йачвхъыхчара ауысла а-Оперштаб ахъада Цахнакиа Тамаз.

Апсны азгIвадарахчара аминистр Цахнакиа Тамаз йпресс-конференция асквш 2020 май а 19 агIан

© Апсны азгIвадарахчара аминистерства апресс-къвырльыкъвхарта

Аминистр йшгIаликIгIазла, а-ПЦР-диагностика ареспублика бактериология лаборатория йаланакIуата йырчпитI, ауи «йцIабыргдзу архъвыхраква» гIанатитI.

Цахнакиа Тамаз Апсны апны акоронавирус шIкIгIара штшауацIнахуала ауыс зквугьи даквчважватI. УахьчIвала ауыс рыцIа йайчвахатI: йацы пщыгIв чымазагIвчва гIадрыбергьыльтI Россия йхIаракIу арра апхьартаква йрыцIата йгIайхыз апсуа курсантква йрыуата.

«Ауат зымгIвагьи, йшбергьльу апшта, ковид йазалху (COVID-19 згIва зхьуа ачымазагIвква райъазара йазалхта йадгалу ачымазагIвтара – аредакция ррытаразга) Гвдауыта район аквта чымазагIвтара апны йщтIарцIатI. УахьчIвала ари ачымазагIвтара апны йрайъазитI чымазагIв 20-гIвы. АщардагIв хIара хIкурсантква ракIвпI. Ауат рызгIвадара аъаща уарыразуата йаъапI, айъазара амальта йатахъу зымгIва абгата йрыдыргалитI», - йхIватI Цахнакиа Тамаз.

Ауи адунейла апандемия тшауацIнахуа йалагищтара Апсны апны йчмазагIвхаз руысла апхьадзараква гIайырбатI. Ареспублика апны йгIадрыбергьыльтI згIва гIаншарата 24, ауат йрыуата Гвдауыта ачымазагIвтара апны асквш 1925 агIан йгIадрита йзайъазуз ачымазагIв дпсытI, хгIвы бзихахын рунагIваква йаъапI.

Апсны азгIвадарахчара аминистерства: COVID-19 абакIра апны май мыз зымгIва рацкIыс йхьантахуштI

Аминистр йшгIайырбазла, Гвдауыта район аквта чымазагIвтара ачымазагIвква райъазара ауысла йатахъу зымгIвала йадгалапI. «Ауи йаланакIитI ахъвшвква зымгIва – авирусква, абактерияква йызларпшIагылуа, ауат ари азгIва зхьуа ачымазагIвква йызларайъазауа амальпI. АчымазагIвква мышкIы апны хын йдырчитI», - йхIватI ауи.

Цахнакиа даквчважватI Согъвым йтагылу «Айтар» сасырта апны йадыргалыз архъвыхыртагьи, араъа йдыркIьыдауата йандыргIалитI апандемия тшъауацIнахыз аштаква йгIартыцIта йгIайхуа ауагIа. Архъвыхырта апны уахьчIвала уагIа 187-гIв аъапI.

«Ауат зымгIвагьи йщаквгылу апIатлаква йрыквшвауата йырхьпшуаштI. Ауи апшта, абар уахьчIвагьи абаклаборатория йырщтиуаш архъвыхра пкъыгIваква гIарахвтI. Ауат азгIва гIадмырбузтын зпны йгIарахвыз акъральгIвква рунагIваква йырщтихуаштI», - йхIватI а-Оперштаб ахъада.

«Айтар» ауагIа рбзазара йазынарху амальквала йшатахъу апшта йадгалапI – ауагIа райъазара ауысла, мышкIы апны ауат хын йырчара ауысла. Йацы архъвыхырта йгIацIрыгIвгIахтI уагIа 52-гIв, ауат йызлархьпшыз архъвыхраква коронавирус гьгIадмырбатI, азгIва йашIырпшу кIара рыхьуатагьи йгьрыдрымбалтI.

ЙгIадрыбергьльыз згIва гIаншара 24-и псракIи ршвхIаусыгIвала акъраль аунашвачпагIвчва йнарахвуа амальква йгьи йашIамсуата агIвыма къральквала йгIацапахуа Апсны акъральгIвчва руысла ажурналистква разцIгIара джьауап айтуата Цахакиа Тамаз йгIаликIгIатI:

Апсны апны абзазагIвчва COVID-19 йачвхъыхчара знархару амальква рпсахтI

«Апрезидент йцIыхъвахауа йщаквыргылра хIапшрыквын ауаъа ауыс гIазырльальауа амальквакI гIарбапI. Йхъаду ажванахъаква йшаъаз йгIанхатI. АгIарльальара ззынарху абазарква рынхаща акIвпI, ажва аламкIва афачIвтйыртаква нхитI. Ачартаква, ауи ащаквыргылра йшгIанахIвауала, йнахвчIву амальква дырхъйауата йынхара атахъыпI. Ужвы ауат анхартаква цIолата йдырхъвыхитI. Йщаквгылу ахъыхчара цIасква абгата йынкъвыргара атахъыпI: йгIарпхьадзаз абжьара надырдзауата, йрыгIвну ауагIа щардагIвымкIва, анхагIвчва амаскIакви анапIтаракви нкъвыргауата, хъвшвы злу адзыла ахъахьква зымгIва дрыцкьахуата, ауасамцара. Ауатква зымгIва гIадымрысабапуазтын йзачIв чартазлакIгьи зынла йадыркIуаштI. Йара ауи акIвпI ахъасартаква руыс зквугьи. Ауаъа уагIа щарда гьайззалум, аэпидемия ахъазла магIны рымата йпхьадза йгьауашым».

Апсны апны уахьчIвала коронавирус шIкIгIара гIарахвта 24-гIв гIадрыбергьыльтI. АхвыгIв Согъвыми Гвдауыти йырбзазагIвпI. Апсуа эпидемиологква йщаквдыргылитI COVID-19 гIазахвыз ачымазагIвква зщтаныкъвуз абзазагIвчва дзачIву. Арахьарат йчмазагIвхаз Россия арра апхьартаква рстудентква ракIвпI. Ауат гIайхищтара архъвыхырта апны йаъапI, гIвымакIгьи йгьрыщтанымкъватI.