Апсуа агIвдзычпарта «Аргун Иашта» Россия зымгIва ачагIырчпагIвчва асквш 2018 райззара йаланакIуаз агIвдзы анадзарала анкъвакъвра йдрайгваз гвыпта йалан.
Барганджиа Саид
Апсуа агIвдзычпарта «Аргун Иашта» октябрь а 6 йгIашIарышвта а 8-дза аурышв агIвдзы атдзы «Абрау Дюрсо» йаднагалыз Россия зымгIва ачагIырчпагIвчва райззара йаланакIуаз агIвдзы анадзарала анкъвакъвра апны рызна гIатнагатI. Ауи ахабар АААК ахабарргарта портал йгIайрайдзатI «Аргун Иашта» агIвдзычпарта адиректор Аргвын Алхас.
Ауи йшихIвазла, анкъвакъвра «Аргун Иашта» апны йырчпауа агIвдзыта пщзигIвакI рщтийтI: Асквш 2017 агIан йцIдрычIваз «Рислинг», асквш 2016 агIан йырчпаз агIвдзчвапщ «Лофт», «Пино Нуар» йгьи агIвдзбах къапщы «Шираз». АчагIырчпагIвчва йгIадыргалыз ажвчIв къомкI йызчIву рымдыруата рнадзара андырхъвыхуаз «Шираз» агIвдзы рызна медаль гIаквнадыргатI.
ЙгIадыргылыз ажвчIвква рнадзара хвы аквызцIуз ажюри йапшым акъральква йрыуу агIвдзычпарала аэкспертква алан: аэнологква – агIвдзы ачпара аргIапсщала аъачIвагIагIвчва, сомелье – агIвдзы ахъгIарала аъачIвагIагIвчва, дуней класс зму, Master of Wine («агIвдзы ачIвы бзита йыздыруа» – аредакция ррытыразга) хьзы нкъвызгауа асудьяква.
«ХIара хIагIвдзы анкъвакъвра йызхIщтийыз хIылшараква хIырхъвыхырныс, цIбата йхIыцIырбауа гIдырта ауи хIынхара апны йгIахIпхьадзарныс ахъаз акIвын. Апсны апны агIвдз нардза аъамта йхIзырхIвауа штамамым дхIырбара, ауи ауыс хIкъару хвыцкI алахIцIара хIтахъыпI», – йгIаликIгIатI Аргвын Алхас.
Ауи йшибауала, Россия апны ачагIырчпара анадзара рыцIа-рыцIа йалахIитI, ауаса йанаъазара ажвчIвчпагIвчва йрызбжьу анкъвакъврагьи рыцIа-рыцIа йымчхитI.
«ХIара датша заджвгьи йымам, хIа йхIчIву ажвчIв квпшыраква тшауацIдхIымрыхква амаль гьамам, ауи ахIатырла нхара ду акIвыршара атахъыпI. ХIара хIапхъанчIвиква йырчпуз, ужвы йхIчвыдзхыз агIвдз квпшыраква шгIащаквхIыргылхуаш хIащтапI. Ауи анархарала уыс ду ахахьатI «Апсны агIвдзкви адзкви» компания. Ауат уахьчIвала Апсны агIвдзычпара агIащаквыргылхра йацхърагIуш къарута йалырныс рылшуштI», – йгвгIанаграква йхIвитI «Аргун Иашта» адиректор.
Ауи йшихIвауала, «Аргун Иашта» компаниягьи агIвдзычпара апны йара «ахатI» шамазлуш йащтапI.
«УахьчIва хIара хIпшгIитI, ужвы агIвдзыта цзигIвакI цIхIрычIвитI, ауаса, ари йшнайуа акIвызтын, араъа апсахраква аъазлуштI», – йхIватI Аргвын Алхас.
Ауи йгIахIгвалайыршвахтI «Аргун Иашта» агIвдзчпарта асквш 2014 агIан йшгIаншаз, асатучпаралагьи пхьадзараквакI хIызгIайгтI: асквш 2016 йгIашIарышвта араъа йырчпаз агIвдзыта башырба 15-нзыкь ртйытI. Анхарта Гудаута район йаланакIуа Квланырхва кыт апны йаныргIалпI, ауаъа йынхауа акыт абзазагIвчва ракIвпI, сквшигIадза араъа анхарта тыпква йрылахIитI.
Россия зымгIва ачагIырчпагIвчва райззара асквш 2018 агIан агIынхауата йакIвшатI. Ари адзын ауи анхара йалан агIвгIархарджьырта йгьи агIвдзчпарта нхартаква йрунашвачпагIвта йгьи ари анархара йапщылу ъачIвагIагIвта 1000-гIвы райхIа. ЙхътIыз
айчважвараква рпны йбергьльу аэксперткви аъачIвагIагIвчви ачагIырчпара ауыжвгIанчIви лкIгIараква, ари ауыс апны йаъу абжаракви абаргвыракви рыхъазла ргвгIанаграква рхIватI.
швталра йа тшаншвцIара атахъыпI.