Адуней апсуа-абаза конгресс ахабарргарта портал апрезентация сентябрь а 18 атшын Согъвым апны йакIвшатI
Барганджиа Саид
Адуней апсуа-абаза конгресс (АААК) йазалху ахабарргарта сайт апрезентация агIваша, сентябрь а 18, атшын Апсны акъральыгIва телебара астудия апресс-конференция апны йакIвшатI. А-Конгресс анхари апсыуа-абаза диаспора рбзазари знархару апортал шIыц йгIаквчважватI апортал аунашвачпагIв, аредактор хъада Лазба Амина йгьи а-Конгресс архъйагIв секретарь Гицба Инар.
Апортал аунашвачпагIв апресс-конференция йалакваз ргватра азыналырхатI Адуней апсуа-абаза конгресс агIаныршара атурых йгьи ахабарргарта портал уыста йархъйуш йгIарыквчважвауата ашвъаквала йадгалу афильм.
Лазба Амина йшгIалылкIгIазла, апортал йгIаквшвалуштI а-Конгресс анхара йгьи апсыуа-абаза уагIа рбзазара йгIарыквчважвауа агIвыраква. Апортал агIвыраква зымгIвагьи нархарата йрымазлуштI Апсны абзазара злалу абзиракви атшауацIыхри адуней жвлара рахаргIвазара.
«Апортал йгIаквшвауа агIвыраква, асуратква, анахьанат ашвъаква зымгIва йалкIгIата гуманитар нархартапI йынкъвыргуш. ХIара адуней йдхIырдырырныс хIтахъыпI хIтурых, хIкультура, хIэтнография, хIуагIахъа йгIарылцIыз агIвычIвгIвыс дуква. Адуней рпныла хIара хIхъа хIгIаквчважвуштI. ЙхIымапI хIызлачважвушгьи хIхъа злахIырдууашгьи», – лхIватI Лазба.
Апортал аунашвачпагIв йгIалылкIгIатI, асайт «йшгIаквымшвуш политика нархара зму, ажвлара-политика мгIвайсраква, апартияква, алхра кампанияква йгIарыквчважвауа агIвыраква». Ауи апортал агIвнархарта хъадакI гIалырбатI: ахабарргага-арыпхьара йгьи агIарысабапра.
Лазба Амина йшылхIвазла, йызтахъу зымгIвагьи йрылшуштI асайт апны тшанырцIарныс йгьи ауи йгIаквшвауа адырраква гIадрысабапырныс. Адырраква цхърагIарата йалуаштI адунейла апсыуа-абаза уагIа йрыуу заджвы уанизыпшгIауа. Датшагьи Лазба йгIацылцIахтI адунейла апортал агIарысабапыгIвчва ращтаныкъвара йацхърагIуш амальгьи апхъахьыла йшгIаныршахуш.
Апрезентация анакIвшуз чIвырхъа-чIвырхъамца йгIарбахатI АААК апортал агIарысабапыгIвчва штшырзанцIуш.
«Ауи швабыж ймайрапI. ДзачIв гIарысабапыгIвзлакIгьи закI-гIвба дакъикъа йзынахъуштI тшаницIарныс ахъазла», – арат ажваквала тшырзыналырхатI Амина аконференция йалакваз.
Ауи йгIалылкIгIатI апортал агIвыраква цбызшвакIла йшгIаквшвалуш: абазала, апсыуала, урышвла, трыквла, ангьльызла йгьи гIарыпла. УахьчIвала асайт хвбызшвакIла йынхитI: агIарып бызшва нархара ужвыгьи йадынхалыркIвитI йгьи ласыла анхара джвыквцIахуштI.
АААК архъйагIв секретарь Гицба Инар йшгIаликIгIазла, апортал магIны ду зму лшарапI а-Конгресс амурад хъада – апсыуа-абаза уагIахъа шабгу радкIылра – архъйара апны.
«УахьчIва, йапшым ахабарргага амальква ргIаныршара йанашымту атлахан, ауагIахъа радкIылра ауыс хъвдаквыщт ду амазлуштI уыжвгIанчIви абадыргаква гIарысабапхарквын, зымгIва йрапхъата интернет агIалцIыртаква. Ауи ауысла ахабарргарта портал апахь хачIвыта йгылапI адуней шабгула апсыуа-абаза диаспора йгIарыцIаркIуа ауагIа раргванчIвра йацхърагIарныс», – йхIватI а-Конгресс архъйагIв секретарь.
Ажурналистква разцIгIараква джьауап ритуата ауи йгIайхIватI а-Конгресс анхара анархарта хъадаква, АААК алаща шадгалу йгьи апхъахьыла рхъйачIвыта йлыху ауысква.
Апрезентация ъадзакIвшуз араъа йаъаз дзачIвызлакIгьи йылшун ахIвара швъа йгIвыта а-Конгресс далалырныс.
АААК ахабарргарта портал анхара аджвыквцIара йъадзаздрыхIазыруаз асквшбжа ауацIа ауи анхагIвчва йрылшатI гIвырата, дыррата щарда адыркIылырныс: агIвыраква напа 700 райхIа, асуратква, авидеогIвыраква рпхьадзара1000 райхIа йнадзитI, гигабайтла йгIауахвырквын – 50 райхIа.
швталра йа тшаншвцIара атахъыпI.