Апсны апны йапхъахауата «Аимҵакьачара» апсуа уагIахъа хъвмарщала дуней анкъвакъвра акIвшатI.
Араса йапхьитI уыжвгIанчIви регби йашIырпшу топла ахъвмарра. Ауи ахабзаква йшгIархIвауала, йхъвмаруа агвыпква рапхъагылагIвчва йгIапссгIауа ауабчватоп дара ргвып ахъвмарыгIвчва рахьыла йшацадырпуш апшта мшIлабала йаситI. Атоп гIазкIуа ауи йыквызхра зтахъыта йгIайпшIагылквауа тшдимыркIуата ласыта ахъвмарырта ацIыхъвадза днадзара атахъыпI.
АуагIахъа спорт квпшыраква гIащаквыргылхта ауагIа йрылагахра – йгьахъазгIваца гвшIыгъра тыщтрам, йгьахъазгIваца бзазаща згIвада аквгIазшIытрам – ауи уагIахъа гвбайарапI. АуагIахъа спорт квпшыраква ауагIахъара йанкъвгагатагьи йалитI, чкIвынргIа рпсадгьыл йазрыму абзибара йаланархIитI, рхIаль арымчитI.
Сентябрь а 4 йгIашIарышвта а 6-дза акъала хъада йтагылу «Динамо» стадион апны «Аимҵакьачара» уагIахъа хъвмарщала дуней анкъвакъвра акIвшатI. Ауаса ауи агIаншара джьащахъва апхъала АААК агвып йдырхъйаз йгьи йдырхъйауаркIвауа нхара ду аъан: ауыс ардырра, ахъвмарра ахабзаква азкIкIра, абзазара йгIахъыху афильм «Аимҵакьачара» адуней йгIаквыжьра, ахъвмарща азыбжьарала амастер-классква акIвыршара хысквша аъара йакIытI.ЙдахIврахаз апроект акъраль аунашвахъцIагIвчвагьи йрымагIальаматхатI. Ауи архъйара йгIалалтI репатриацияла АкъральыгIва комитети чкIвыныргIи спорти руысквала АкъральыгIва комитети.
«Апсуа уагIахъа хъвмарщаква» проект архъйара йачIвырхъакIхатI Трыквшта апны июнь а 28 йгIашIарышвта июль а 11-дза амастер-классква адгалра. Репатриацияла АкъральыгIва комитет ацхърагIарала йадыргалыз Трыквшта ацара йалан чкIвыныргIи физкультури тшауацIдрыхрала АААК ахъвшара аунашвахъцIагIв Барзениа Валерий, апсуа хъвмарщаквала аметодист, Апсны арадиуа адиректор Гвымба Адгвыр, арежиссер Логуа Дауыт. Агвып «Аимҵакьачара» апсуа уагIахъа хъвмаррала амастер-классква апсуа диаспора ъабзазауа Сакарйа шта йапшым акытква рпны йакIвдыршатI. Атшыбжьараква йанрылга 15-гIв чкIвынчва алата команда азыркIкIын, ауат рыжвла ъану рпсадгьыл апны йакIвшушыз анкъвакъвра йырцIабыргта тшаздрыхIазыруа йалагатI.
Спортла, абадыррала, ащцарала, анкъвакъврала йалаз ахымшкI астадион апынгьи ауи утыцIтагьи ахIауа датшата йырчпатI. ХIкъраль йауу агIкомандакIи Трыкв Республика йауу апсуа гвыпи анйан финал апны апхъагылара йазабакIуан.
Анкъвакъвра йгIайыланажьыз алахIвараква хIыцагIвишатI чкIвыныргIи физкультури тшауацIдрыхрала АААК ахъвшара аунашвахъцIагIв Барзениа Валерий.
«ХIгвыргъьитI ахъвмарра ащапIы ъагылыз. Ауи йгьахъаз замангагахым – йкIьыду спорт квпшырахатI. Угвы йалахIитI ауи ауыс закIыла уалачпата тшаназудырхуагьи. АчкIвынчва зымгIвагьи азаджв азаджв хвы йзыйбахуа, ахъвмаррагьи амагIны щтIырхуата йазазаъан. Йубун ахъвмарыгIвчва анкъвакъвра бзита штшаздрыхIазырыз, рквпшыранадзарагьи гвы аутуата штшапсахыз. АгвыпквакI рхъвмарща анадзара джьаущушта йаъапI. СлахIвараква ажвала йгьузыхIвушым», – йхIватI Берзениа.
Анкъвакъвра йалан КIвтIол, Ачандара, ПакIващ, ЧIлоу, Дурыпщ кытква, Афон ШIыц къала, СогIвым йапхъахауи йхвбахауи апхьартаква ркомандакви Трыкв Республика йгIатыцIта йгIайыз асасчва ргвыпи.
АшIыпIа хъвшараква рыцынхарала АААК ахъвшара аунашвахъцIагIв Жьыба Дмитрий анкъвакъвра штшаздрыхIазыруаз гIахIайхIвтI:
«ХIара апсуа уагIахъа хъвмарщаква гIащаквхIыргылхуа хIалагищтара хысквша айхIа цIитI. Ауат ахъвмарраква рапхъа йгылапI «Аимҵакьачара». ХIара ауи йазынарху аматериалква хIхIырдыртI, ахабзаква лыхIхтI, тшызлаубжьуш цхърагIага хIрыхIазыртI, хIкъраль акъалакви акыткви хIгIархъыкIвшауамца атшыбжьараква адыгIгалтI. ХIара йакIвхIыршатI СогIвым апны анбжьагIв анйараквагьи Мгвыдзырхва кыт аэтнопарк апны ареспублика анкъвакъврагьи. УахьчIва абар «Аимҵакьачарала» Трыкв Республика агвыпгьи злу чемпионат акIвшитI», – йхIватI Жьыба.
СогIвым йаъу АААК ауысхарта аунашвахъцIагIв Реквава Темур атурнир акIвыршара магIныта йаму гIаликIгIатI.
«УахьчIва гвыргъьахъв дупI – хысквша хIыззгIайуаз гвыргъьара мшыпI. Уыс ду хIырхъйатI. ХIара йаъахмыз ахъвмарра ахабзаква шIыц-шIыц йлыхIхтI ухIва ауаштI, ужвы апсуа уагIахъа хъвмарщаквала Федерация ашвъа йшанырцIуш хIадынхалитI. Ари атурых йгIалахуш мшыпI. ЙгIалкIгIара атахъыпI репатриацияла АкъральыгIва комитет абзирала Трыквшта йауу хIдиаспора ргвыпгьи шхIзадкIылыз. ХIара хIгвыгъитI ари цIасхата ари хIуагIа йырчIву, йджьащахъву, датша закIы йапшым аспорт квпшыра апхъахьылагьи тшауацIнахуашта. Адуней апсуа-абаза конгресс хIуагIахъа йрыуу зымгIва адуней апны йъабзазалакIгьи анхара йапшым анархараква йгIарыланакIуамца йшаднакIылуаш йщтапI. Спортлагьи ауи адгылра ахьыла чIвырхъакI ъахIчпаз – дахIвра дупI», – йхIватI ауи.
Угвы зырчIвауа ахъвмарща, абакIра азгIашыкъра – йаргьи абар, апхъагылагIв дыгIдыртI. «Аимҵакьачара» хъвмаррала адуней анкъвакъвра апны йапхъахауата йчемпионхатI ЧIлоу йауу агвып. ЙгIвбахауа агыларта Трыкв йауу апсуа диаспора ргвып йыркIытI. Йхпахауа агыларта Афони СогIвым 5-хауа апхьарти ркомандаква йагIвыршатI.
Анкъвакъвра йалакваз акубокква, амедальква, артшхъвага швъаква, асогIаква рырттI.
Анкъвакъвра алгатI, ауаса агвыргъьахъв акIвшауаркIвитI. ХIара уыжвгьи йхIпырапI агIахIвраква, ашваква, акьахвраква. Трыквшта йауу асасчва хI-Псадгьыл йпшдзадзу ашIыпIаквала амдараква рзадыргалуаштI.
швталра йа тшаншвцIара атахъыпI.