«Аимцакьачара» уагIахъа хъвмарщала ачемпион хьзы хгвыпкI азабакIтI.
«Апсны» этнопарк апны «Аимцакьачара» апсуа уагIахъа хъвмарщала анкъвакъвра афинал акIвшатI. Ауаса йапхьитI уыжвгIанчIви регби йашIырпшу гвыпла атопасща. Ахъвмарща ахабзаквала агвыпква ркапитанква йдучвам ауабчватоп лабала йасуамца дара ргвып йауу ахъвмарыгIвчва йшырзауырщтуаш йащтапI. Атоп гIазкIуа ауи йыквызхра зтахъыта йпшIагылакву тшырдимыркIуата афинишдза днадзара атахъыпI.
Адуней апсуа-абаза конгресс ауагIахъа хъвмарщаква гIащаквыргылхрала апроект гIвысквша цIуата йджвыквнацIатI. Ауи агIамта ауацIа апроект апкъ йтата Апсны йапшым арайонква рпны атшыбжьаракви анкъвакъвракви акIвшатI. СынчIва апроект рыцIагьи тшауацIнахтI.
«ХIара швабыж хIайгвыргъьитI анкъвакъвраква йапхъахауата араса йауацIыхта йъакIвшауа. ЙхъахIцIитI хIапхъа анкъвакъвра Апсны акъалакви акыткви рыцIагьи щардата йшгIалалуаш. ЧкIвыныргIа, апсуаква йырцIасу анахьанат ауысква рапшта, ауагIахъа спорт квпшыраквагьи рылагара а-Конгресс анхара анархара хъадаква йрыуазакIыпI», – йгIаликIгIатI СогIвым йаъу АААК ашта хъвшара аунашвахъцIагIв Реквава Темур.
Анкъвакъвраква адызгалыз йрыуапI чкIвыныргIи спорти руысквала Апсны Республика АкъральыгIва комитетгьи. Анкъвакъвраква ракIвыршара йацхърагIатI «Апсны» этнопаркгьи.
«Ахъвмарраква ракIвыршара магIын ду амапI. Йапхъахауата, ауи абзазаща згIвада нкъвгара, акъару, ащаласра, анагра йырзырхIара йазынхитI. Ауи акIвымкIвагьи ари йапшу ахъвмарра чкIвыныргIа ауагIахъа цIасква рахьыла йацанарпитI. ХIара йхIмурадпI ауагIахъа спорт квпшыраква р-Федерация гIанхIыршарныс, ауи анкъвакъвраква рнадзара рыцIагьи йнанарыскIьуштI. Ужвы ари асахIат ауи тшазхIрыхIазыруата анхара джвыквхIцIахьатI, хIацIагылырквын зымгIва гIахIыдахIвуаштI», – йхIватI чкIвыныргIи спорти руысла АкъральыгIва комитет ашIара йырзынарху аполитикала ахъвшара аунашвахъцIагIв Къара-Уасман-оглы Идрис.
Анкъвакъвра аламгаскIва ауат радгалагIвчва сальамла акомандаква тшырзынадырхатI, уацIыхъван асасчва рпахь «Адац» йгьи «Адаул» саби ансамбльква гIахъвмартI. Анкъвакъвраква Лыхны, ЧIлоу кыткви СогIвым 5-хауа аквтанай апхьарти рыхкомандакI рылан. АхъвмарыгIвчва шIаква ркъаруква йырмайгьдзауа рымч, рщаласра, рацзакIыра гIадырбун.
«АчкIвынчва зджьара йгIанымхауата сырзыразпI. ЧIлоу ргвып щарда цIуата йаситI, бзитагьи йгIардахIвитI; СогIвым 5-хауа апхьарта агвып финал йшкIылсуаш йаназабакIуаз тактика нархарала бзита тшгIадырбатI. Бамбора апхьагIвчвагьи злу Лыхны ркоманда йагIвсыз амчыбыжь мастер-класс рзадыгIгалын – бзидздзата йхъвмартI», – йхIватI чкIвыныргIи физкультури тшауацIдрыхрала АААК ахъвшара аунашвахъцIагIв Берзениа Валерий.
Анкъвакъвраква рпны айгIайра ЧIлоу агвып йтыргатI. ЙгIвбахауа агыларта СогIвым 5-хауа апхьарта йакIытI, йхпахауа – Лыхны кыт. Анкъвакъвраква йрылаз акубокква, амедальква, артшхъвага швъаква рырттI.
швталра йа тшаншвцIара атахъыпI.