Декабрь мыз ауацIа а-Конгресс ауысхагIвчва гвып хъвдаквцIара дырхъйауата апсуа-абаза диаспора ъабзазауа Мараташварта Европа йгIакIвшан Германия апны АААК ашта хъвшара агIахътIрала рынхара уысква йрылгатI.
Адуней апсуа-абаза конгресс ашта хъвшара ужвы Германия апынгьи йгIандыршатI: ауи АААК ЙхIаракIу асовет аунашвачпагIв Эгьзакь Мусса йхъвдаквцIарала а-Конгресс ауысхагIвчва гвып Евросоюз акъральква нхара уысла йгIарыкIвшауата йгIахъыртIын декабрь а 16 агIан ауыла араъа рхачIвква алдыргатI. Агвып йрылан АААК архъйагIв секретарь Гицба Инар, ЙхIаракIу асовет йалу Чирикба Вячеслав йгьи Ахабарргарта портал аунашвачпагIв Лазба Амина.
АААК агвыпи Германия апсуа-абаза диаспори ранйара Мосбург анамыца коммуна апны йакIвшун. Араъа асквш 1993 йгIашIарышвта сквшы 27 цIитIта йынхитI Апсуа культура квта. Ауи йалапI Бавария йтабзазауа апсуа-абаза диаспора ащтийыгIвчва 100-гIв райхIа йнадзауата.
АААК йадыргалыз абашталагIвчва ранйара дгIадгылтI АААК ЙхIаракIу асовет йалу Мюнхен абзазагIв ХIаджьымба Эркангьи. Ауи ари агIаншара «сабап ду алата, швабыж йатахъыта» йпхьадзатI.
«Германия йту апсуа жвлара абари йапшта хIтурых Псадгьыл йапщылу анйараква щарда цIитIта йрыздзыштI. ЙцIыхъвахауа акультура нхара рыцIа-рыцIа йльальахауа йгIамгIвайситI. А-Конгресс ауысхагIвчва адиаспора руагIа йрачважвапахьадза рыцIа-рыцIа йгIацIсуан, адкIылара анхара гIальаматра шазрыму гIадырбун, ауасамцара анйара ъадзакIвшуз зымгIвагьи ацзакIхатI», – йхIыцагIвишитI йгвгIанаграква АААК ЙхIаракIу асовет ауысхагIв.
Ауи йшипхьадзауала, аудитория йалкIгIата ргвы гIащтIызхыз ауысхагIвчва гвып апсуа бызшвала йъагIачважваз акIвпI.
«ЧкIвыныргIа цри бызшва анрагIа йазхъвыцтI дара-дара рыцIа бзита йагвынгIвырныс ахъазла ауи ддырдырра шатахъу. Ауат ргвы йаситI рыбызшва бзита йъагIаргвнымгIвуа, йшатахъу апшта йъазаламчважвауа», – йхIватI ХIаджьымба Эркан анйара апны абызшва арыпхьара ауыс шгIащтIырхыз гIайрахауата.
АААК ЙхIаракIу асовет ауысхагIв йгIахIайхIвтI анйара амщтахь араъа йызгIамйыз щардагIвы телефон йшйызгIасыз.
«Апхъахьыла ари апш анйара анакIвшуш йазцIгIун, ауаъа йшгIадгылуаш багъьата йалачважвун. Анйара йалакваз руысла йхIвара атахъу ари акIвпI: рыуа щардагIвы ртурых Псадгьыл зынгьи йгьаъамызтI, ауи ахIатырла айззара амщтахь йцарныс багъьата ргвы йтаркIытI. Сыла йгIацIазжьитI ауат Апсны рбарыквын ргвы йшалахIуш, ари анйара ауи аъара лахIвара пшдза ангIарыланацIазара», – йхIватI ауи йажва ацIыхъва.
Мосбург апны апсуа культура квта пщысквша цIитIта дахъадапI Чкок Сезай. Ауи асквш 1971 йгIашIарышвта Германия дбзазитI. Ауи йакIвпI абашталагIвчва ранйара адызгалыз, араъа йаъан йхъапщыла Патхвариа Сибельгьи йсабиквагьи - Эфе Синани Дефне Чкоки. ХъацIагьи пхIвысгьи АААК йгIандыршаз ашта хъвшара йалалтI.
«Швабыж йхIгвапапI анамыца чIвыла апны Апсны йгIатыцIыз хIабашталагIвчва хIъарынйаз. Акультура квта апны тгIачвала запыт хIшанйалуш хIащтапI, араъа хIаргьи хIсабиквагьи хIабабарныс, тгIачвакIта хIащтаныкъварныс амаль хIымапI. Кьангьаш гьазгIазгуам, а-Конгресси хIари хIацынхауа хIаналагара хIуагIахъа тшдыррагьи рыцIа йшбагъьахуш, хI-Псадгьыл апны йбзазауа хIайщчви хIахщчви руысквагьи рыцIа джьгарта хIшрылалуаш. ХIуагIахъа йырзыстахъпI акъагIара, амамырра, Анчва йъамырра», – йхIватI ауи йтгIачва рыхьызлагьи аквта ахьызлагьи дчважвауата.
АААК ашта хъвшара шIыц даунашвачпагIвта далырхтI Пачулиа Тайфун. Ауи атурых Псадгьылгьи апсуа уагIахъагьи ркъагIара дамайчуата дырзынхарныс дшхIазыру йхIватI.
«Ужвы хIацыта, хIацацхърагIауа хIыжвлара сабап зларзгIагIгуаш амальква гIаншатI. ХIара ауралагьи хIшвыцIагылазлуштI (а-Конгрес шабгу – аредакция ррытаразга) йацлыхIхуа апроектква рырхъйара апны. Швабыж хIайгвгъитI уыжвласыла хIшатанйахуаш», – йхIватI ашта хъвшара ахъада шIыц.
Акультура квта апхIвысква Апсны йгIатыцIыз асасчва ауагIахъа фачIвквала йырпылтI. Анйара апны джьгарта тшгIазырбаз Абдипа Аише Германия апны дйытI, дгIадзынгылтI. Лани лаби - Абдипа Зиатти йгьи Тукипа Гьулер – атрыкв кыт Акиазы апны акIвын апхъала йъабзазуз. Айше щардала дгIайитI апсуа культура квта апны.
«Сара сан сылбжьатI апсуа фачIвква смацIауата, араъа Германия хIунагIва апны запыт йхIмацIауитI абастагьи, аквтысызбалгьи (раса чIванла ймацIауу аквтIужь), ахвылчапагьи, датшагьи щарда. ХIыжвлара апхIвысква щардала ахъачва хIырцхърагIитI гвыргъьахъв хIымата рахвы анырщра асхъан. Акультура квта апны хIуагIахъа гIахIвраквагьи тшырзызбжьатI. ЦIабыргыта, ужвыгьи хIыбызшва гьссмырдырстI, ага сани саби ауи бзита йырдырызтIхIва», – лхIватI Абдипа лгвасрагьи цIалымкIуата.
Ауи йшгIацылцIахызла, аквта гIаншищтара йцIуа асквш 27 рурала ауи анхара далапI.
«ХIани хIаби хIуагIахъа тшдырра щаквгылырныс ахъазла щарда рчпатI, ауаса адернекгьи алацIара гьмачIым. ХIара араъа хIаъата хIгIадзынгылтI хIва йауаштI. Ужвы хачIвыта хIпахь йгылапI ауи анхара ашIаква гIадхIкIылырныс. Швабыж магIны азыгIбитI араъа хIъабабалауа, хIтурых псадгьыл хIащтаныкъварныс лшара ъахIыму», – лхIватI багъьата апхIвыспа.
МухIамад Аль-Шариф – йызбжала дгIарыппI, йаба Макьа дауапI. Йаба йахьыла йанду – апсуа ткъвым Дзигута дрыуапI, йангьи дапсыуапI, ХвымсачипаргIа дрыуапI. Йыщайдзала дгIарыпызтынгьи МухIамад апсуа бызшва бзита йдыритI: йани йандуи йдырдыртI. Йхъапщылагьи дапсыуапI, атрыкв шта Дюздже акыт Хаджи йауу ахI ткъвым ЭшбаргIа дыртпхIапI.
«Швабыж йсгвапапI Апсны йауу хIабашталагIвчва съарынйаз. Щарда цIуата хIазпшуан ауи. ХIшгвыгъауала, а-Конгресси хIари хIацынхара уыжвласыла бзира щарда гIанарыцIсуаштI. Швабыж йстахъыпI стгIачвагьи саргьи хIацыта Апсны хIцарныс», – йхIватI МухIамад Аль-Шариф йгвалаква хIыцагIвишауата.
18 сквша райхIа зныбыжьта айззара йалаз зымгIвагьи Адуней апсуа-абаза конгресс йшалалуала анкетаква ргIвытI. Анйара джькIахбастала йгайыз айшвала, ауагIа гIахIвраквала, ашваквала йдрыпшдзатI.
Европа акъральква рпны абашталагIвчва рынйаракви ауат рпны ашта хъвшараква ргIаныршари знархару айззараква АААК гIвымакъраль нархара рымата асквш 2019 ауацIа йархъйарныс йылнахыз ауысква йрыланакIуата йакIвшитI. Германия апны йгIаншаз ашта хъвшара Европа апны йпщбахитI апхъала Великобритания, Нидерланды, Бельгия ПаштахIыгIва рпны йгIандыршаз ахъвшараква рымщтахь.
швталра йа тшаншвцIара атахъыпI.