Апсны йауу ахIаракьатчпагIвчва Кортава Астамури Хьюитт-Кортава Гунди бзазара Великобритания йцахын ауаъа тгIачвала бизнес джвыквырцIатI. Ауат йырчпауа аджьыкIа Англия ахвгIагIвчва йаквнагауа хвы аквырцIатI.
Барганджиа Саид
Апсны йауу ахIаракьатчпагIвчва хъацIи пхIвыси Кортава Астамури Хьюитт-Кортава Гунди пщысквшакI цIуашта бзазара Англия йцахын ауаъа апсуа аджьыкIа рчпауа йалагатI. Ауат хсквша йнайгвгъауата тгIачвала ауи ауыс йалапI. Ауи агIамта ауацIа апсуа аджьыкIа Англия абзазагIвчва щардагIв ргвква ахвгIатI.
Кортава Астамур йшихIвауала йпхIвыси йари Великобритания йанцах амщтахь бзидздзара «дара йырчIву фачIвыкI» ачпара джвыквырцIазарквын йшбзийыз йазхъвыцуан. «ЗымгIва йрапхъата – аджьыкIи ажьы злущуа хIдзырдзакви. АджьыкIа учпарныс рыцIа ймайрапI, йаквурыдзуа дукIгьи гьаъамта – ауыла хIалагарныс йаквхIкIтI», – йхIвитI Кортава.
Великобритания апны уара ууыс джвыквуцIарныс ахъаз щарда гьатахъым, йгIахIгвынйыргIвитI ахIаракьатчпагIв. Ауи ахъазла ауи зхьырпшыру ауысхартаква интернетла ахабар дуырдыргIвацитIта – «хIайда, ууыс ба».
КортаваргIа хъацIи пхIвыси аджьыкIа апсуаква йшырчпалауа апш йырчпитI, ахъагIари афгIви зрымчуаш закIгьи гьаларцIум. АфачIвы ртийуа йалагара апхъала йырдыруаз зджьакIы, рыгвлачва, рыгIвзачва адырпшытI. Ауи акIвымкIвагьи ахIаракьатчпагIвчва апсуа аджьыкIа Англия апны ауагIа бзи йырбауа йапшым аджьармыкIьаква йыргалун.
«АхвгIагIвчва хIфачIвы шыргвапхауа аныгIба Англия апны аджьыкIа хъахIара алаучпа йшауаш гIахIгвынгIвытI», – йхIвитI Кортава Астамур.
Ужвы хъацIи пхIвыси аджьыкIа мачI-мачIта йыртйитI, ауаса асатучпара гIаудахIвра ахIатырла апхъапхъа ахвгIагIвы дзымщцаз афачвы дарпшра атахъыпI.
Кортава йшихIвауала, аджьыкIа «йаныршIашвабыргра» зымгIвагьи штшырчпауа гьапшым, ауаса уацIыхъван йырхIвалауа йаразакIыпI.
«Йапхъахауа ажвата ауат йгIаршIышвтлитI: «бзидздзапI!», «уызгIвымсхызпI!», «упсы йгьхъанацIум!». ЙаъапI дакъикъапхьадзарала афачIвы йапшуа – йыршIарцIарныс гвы рзымчпауата, ауаса йанаквхIыргвышхвара йапшитIта зынла ршIахъа тшапсахитI. АщардагIв йзымщцас йгьи йрымбас афачIвы хъагIарала ауи аъара йбайата йгIацIцIуашта ргвы гьгIвум. УацIыхъван рразыра ажваква гIахIархIвитI», – йгватраква хIыцагIвишитI Кортава.
Ауи йгIаликIгIитI ауагIа аджьыкIа тшаквырпсата ухIварныс шпасаркIву: апсуа фачIвы зынзаджвыкI йапшыз зымгIва йыргвапхитI, ауаса ауи здырхьу ужвыгьи ауи апшта йгьщардагIвым.
«ХIара аджьыкIа йщардачвам ткванквакI йырзыгIгитI, мызкIы апны зны аджьармыкIьакви агIарбартакви хIрылазлитI. Англия йапшым акъалаква рпны ауи йапшу тира дута 60-кI райхIа хIрылалхьатI. Адистрибьюторкви аткван дукви хIрыцынхауа хIалагара хIтахъыпI, ауаса ауи анархарала [ужвыгьи] джьгарта хIгьпшцIамылстI, йауа ухIварыквын архарджьра адгалра йапщылаз абаргвыраква хIрылан», – йуыс зкву гIахIгвынйыргIвитI апсуа хIаракьатчпагIв.
АджьыкIа ъарчпуши йъартиуаши гIарауырныс атгIачва йгIарцхърагIатI Донкастер къала ашIыпIа хъаунашвахъцIарта апны йгIаныршу йдучвам абизнес йацкIрала а-Департамент.
«Йдучвам архарджьра йаквыргIапсу пещ хIшазыпшгIауа анырдыр ауат хIрылапшырныс зджьакI гIахIдырбатI, йгIахIдырбаз йрыуата закIы хIа йхIтахъыз зымгIвалагьи йаквшвун. Ауи злабзийу – уахьъанашылуа ткванпI. Ауаъа агIарбартакви аджьармыкIьакви рпны хIзабадырыз, ауи ашта йауу рхарджьыгIвчваквакI дара ртичIвква гIаквдыргылларныс йахIрыхвиттI. Аткван йнашылуа ахвгIагIвчва йырбитI [йара] ауаъа закI шаларцIауа, даргьи ауи йамагIну йазцIгIитI. Абарауаса хIара ауат йхIчпауа дхIырбитI, аджьыкIа йахIырпшитI. ХIара ауи ахвгIагIвчва рлакта хIтапшырныс, йырфауа йшачпауа гIбарныс, йырхIвауа гIгIарныс, аджьыкIа гIадрысабап йшауаш рахIхIвырныс лшара гIахIнатитI. Айшыста йухIвушызтын, ахвгIагIви хIари хIайнарчважвитI», – йылкIгIараква гIахIайхIвитI Кортава.
АджьыкIа зхвгIалауа, йгIацицIахитI ауи, амацIаура зъачIвагIугьи Англия апны йбергьльу ауагIагьи рылапI.
«УагIа щардагIв зпшлауа телебарала йгIадырбауа аларпшракI апны асквш 2016 агIан йайгIайыз МахIмуд Салиха Лондон йакIвшуз аджьармыкIьа хIанаъаз хIпны аджьыкIа лхвгIан уацIыхъван инстаграм апны ауи ахъаз кIара лгIвыхтI. Йара ауи апшта хIари хIфачIви хIхабар лара линстаграм апны йгIаталцIатI ателебара апны амацIаура йазынарху агIатраква йрылазлауа, амацIауыщаква зну, Британия апны асквш 2017 агIан йамцIырчIваз акнига «КIавкIаз» згIвыз Херкуле Оля», – йхIвитI ахIаракьатчпагIв.
АхвгIагIвчва йыргвапхара, аъачIвагIагIвчва кIьыдаквакIгьи хвду аквырцIара апны йгIанымхауата апсуа аджьыкIи ауи зчпаквауи рыцIа дутагьи рыхьыз гатI. Щарда мцIуата КортаваргIа йырчпауа афачIвы ахъагIара анадзара ъабзидздзу ахъазла (Great Taste Award) Великобритания апны хвы ззырбауа артшхъвага гIарквнадыргатI.
«Ужвы хIара хIэтикетка ауат рдамыгъа аквпI, ауи хIуыс бзита йнанарыскIьара атахъыпI», – дгвыгъитI аджьыкIачпагIв.
Ауи акIвымкIвагьи КортаваргIа хъацIи пхIвыси ртгIачва уыс асквш 2017 агIан Шеффилд апны йакIвшаз абизнес-анкъвакъвра апны финал йазынадзаз ахыгIв йрылашватI. Ауи анкъвакъвра Англия апны хвду азырбитI.
швталра йа тшаншвцIара атахъыпI.