Согъвым апны «Алашара» адкIылара ацхърагIарала апсуа уагIахъа фаша адзахра знархараз апхьараква рцIыхъва йнадзатI.
Барганджиа Саид
Апсны акъала хъада апны ахъачва йырзалху апхъанчIви апсуа уагIахъа фаша адзахрала йазалхта йадгалаз апхьараква знархараз апроект ацIыхъва йнадзатI. ЙгIашвхIыргвалашвахпI ауат апхьараква «Алашара» адкIылара агIаджвыквцIарала, ауи апрезидент Эгьзакь Мусса йрыбагъьаз асквш 2019 апрограмма йаланакIуата йшгIахъыртIыз, йыззынархазгьи апсуа-абаза этнос рпны цIаста йщаквгылаз анапIлачпара ъазара агIахчара акIвын. Апроект Согъвым йтагылу адзахра апхьарта «Мода-Текс» йрыцынхауата абзазара йаларыжьтI.
Апсны апны «Алашара» адкIылара ауысхагIв Айба Альас йшихIвазла, апроект пщымызкI гIацIанакIтI. АуагIахъа фаша адзахра хвгIвы тшазырбжьатI. Апроект агIарбараквала, апроект йалакваз ахъачва йырзалху хвуагIахъа фаша комплекткI рдзахытI.
«Ари апроект мурад хъадата йаман – ауагIахъа фаша ауагIа йрылагара, ауагIахъа фаша адзахра алкIгIараква бзита йыздыруа адзахыгIвчва ъазаква рпхьадзара йалархIара, ауи апсуа йгьи абаза уагIахъа фаша ацIасква ргIахчара», – йхIватI Айба Альас.
Адзахра апхьарта «Мода-Текс» арыпхьагIв Лихобабенко Кетеван йшгIалылкIгIазла, апроект йалаз ахIвсса щарда цIуата ауагIахъа фаша адзахра гIальаматра азрыман, ауи адзахра тшазырбжьарныс ртахъын.
Ауи йшылхIвазла, арыпхьара дахIврала йакIвшатI, баргвыракIгьи гьгIанымшатI. Ауи йакIвшаз апхьараква, ауат йрапшу апрограммаква магIны ду шрымугьи гIалылкIгIатI, йшпакIву ухIварыквын ауат ауагIахъа культури ацIаскви ргIахчара йацхърагIитI.
«ПщымызкI руацIа апроект йалаз ахIвсса ачгIвыча адзахыща, ауи асаща тшазырбжьун, ауыла йгIашIамсуата атехника суратчпара акурсгьи йахъыстI. Сшгвыгъауала, ауагIа йапшым агвыргъьахъвква рпны апхъанчIви уагIахъа фашаква рыцIа щардата йынкъвыргалуштI», – лхIватI Кетеван.
Апхьара йахъысыз, адзахгIвы шIа Цвейба Ревекка апроект адгалагIвчвагьи йхъатала Эгьзакь Муссагьи дшырзыразу лхIватI.
«Сара швабыж йсгвапата салан ари апроект джьащахъва. Сшгвыгъауала, апхъанчIви фашаква рхъа ахъазла йырдзахырныс гIазтахъхуш щардагIвызлуштI», – йгIалылкIгIатI ауи.
Абаза-апсуа уагIа ртшауацIыхра ацхърагIара знархару адуней адкIылара «Алашара» ауысхагIвчва ужвы апроект шауацIырхуаш амальква йырзыпшгIитI: йгIвбахауа ахъвы апны йапхьарныс гIазтахъхауа ахIвсса йырзалху апхъанчIви уагIахъа фаша адзахра тшазырбжьуштI. Акурс шIыцква рпны йадрыпхьуш уагIа шадыркIылуала ахабар рыцIа паса йдыргуштI.
швталра йа тшаншвцIара атахъыпI.