Адуней апсуа-абаза конгресси адрамтеатри йацыта апхьагIввчва культури азъазари рдуней рзыгIахъызтIуа апроект дырхъйаруаркIвитI. Асквш 2026 агIан атеатр йапхъахуз сасыта йгIайтI Тамыщ кыт йауу апхьагIвчва.

Апрограмма акультура нхарта атурых тшахаргIвазарала йджвыквырцIатI. Амдара джьащахъва апхьагIвчва йырзакIвлыршатI Апсны апны гIатгара зму ажурналист, актриса Когониа Элеонора. Ауи асабиква атеатр апны йара аъадаб шщаквгылу, артист йгIапсара хвы шаквуцIуш йгьи апещ ауацIа адауышвара аршIыйара гIаншара йшахъвыкIу ралхIвтI.

ЙалкIгIата асабиква йыргвапхатI асцена уыкIвшата йанамдуз. АпхьагIвчва йгIаргвындыргIвытI аспектакль йацасуа арежиссерква, агримерква, амзаркIыгIвчва йгьи адекораторква ргвып рынхара йшгIалцIуа. ЧкIвыныргIва рхъатала атруппа йалакву йрачважватI, ауат ргIапсарала асцена апны джьащахъвара ду шгIаншауа рылаквала йырбатI.

«Атеатр хIшнашылбыргуаз зынгьи хIызламшвас хIауакI хIылашватI. ХIара амдара джьащахъва хIзадыргалтI – атеатр актерква, аспектакльква зыргылквауа, агримерква гIальаматра щарда гIахIархIвтI. УацIыхъван хIара абуфет апны кIара хIдрыфын ауи амщтахь щарда йнамихуата аспектакль йалагатI. Ари ахъвлапын лахIвара щарда хIызгIаннажьтI. Са ауаъа ацара щардала сгвы йгIатахуштI», – лхIватI апхьагIвчва рыуа заджвы.

Акыт йтабзазауа апхьагIвчва рыхъазла ауи йапшу амдара йгьахъазларпшыгам – ауи ауат рдырраква йрыланархIитI. АдгалагIвчва йгIалыркIгIитI: апроект мурадта йаму ауагIахъа театр ареспублика ашIыпIаква зымгIва рпны йбзазауа асабиква йраргванта йчпара шакIву.

«Ауи апш амдара уалашварныс – ауи лкIгIара дукI узырчпауа йагIвызапI. Атеатр бзи йызбауа щардагIвы гIдыритI, ауаса ауи амадзараква збарныс зылшауа гьщардагIвым. Сара насыпрата йызбитI хIысабиква ауи апш лшара ъарыму, йауа ухIварыквын, Апсуа театр хIуагIахъа йырбайара дупI», ­–­ йгIалылкIгIатI арежиссер Аргвын Мадина.

А-Конгресс агвып Мыквба Хьыбла дзунашвачпагIву Апсуа драма театр агвып ъарыцынхауа йгьи апроект архъйара йъацыркIуа ахъазла аразыра ажваква рзынадырхитI.