Барганджиа Саид

Апсны йауу йгьи Трыквшта йбзазауа апсуакви абазакви йрыуу абитуриентква Санкт-Петербург акъральыгIва бнатехника университет йызлацIалуаш ашвъаква арт йауаштI. Ашвъаква мартI а 1 йалаган йнарахвитI. Апсуакви абазакви СПбГЛТУ хвыдъа йыцIалныс лшарахатI асквш 2020 ноябрь агIан Адуней апсуа-абаза конгресси ауниверситети ангIалра анадырчпал амщтахь.

СПбГЛТУ апны йапхьуш нахврала акомиссия ахъада Богатова Елена йшылхIвазла, бакалавриат йцауамцара (очната) йапхьуш йырзалху абюджет тыпква зквшара зтахъу ршвъаква июль а 20-дза йартра атахъыпI, йымцауата (заочната) йапхьаквуш – август а 11-дза, магистратура йыцIалквуш – август а 6-дза.

Богатова сынчIва абитуриентква ауниверситет йыцIалра ахъазла йгIазкIылсуаш архъвыхраква гIвквпшыракIта йаъазлушта лхIватI: рпны йшаъу хъарачIвыла уызтанха йауаш ауниверситет асайт аргIапсра (https://spbftu.ru/sistema-distantsionnoj-sdachi-vstupitelnyh-ispytanij/) гIадрысабапуата, йа йшырчпалауа апшта – йара апхьарта апны йыркIуата. Архъвыхраква асквш 2021 июль а 23 йакIвшуштI.

Ауниверситет йнарахвырныс ахIвара швъа аныргIвуа абитуриентква арат ашвъаква рымазара атахъыпI: апаспорт акопия, апхьарта йшгIалгазла ашвъа йа ауи акопия, згани зыури 3х4 сантиметр йнадзауа цкIартIкI, Россия йшакъральгIву йа абашталагIв статус шрыму зырцIабыргуа швъа.

Йатахъу ашвъаква ауниверситет асайт йазалху ацхърагIага (https://spbftu.ru/abitur/elektronnaya-priyomnaya-komissiya-podat-zayavlenie/) гIарысабапта йщти йауаштI.

АААК йгьи СПбГЛТУ рацынхара ауысла

СПбГЛТУ йапхьуш нахврала акомиссия ахъада Адуней апсуа-абаза конгресс аунашвачпагIвчва «апхьарта гIамта ауырала йацынхарныс азыгIальаматра азрымата тшъагIадырбаз ахъазла» дшырзыразу лхIватI. Ауи йгIалылкIгIатI Санкт-Петербург акъральыгIва бнатехника университет сквш 65 цIуата арыпхьари науки руысквала агIвыма къральква рпны йаъу йхIаракIу апхьартаква, йпхатшу адуней фондкви аорганизациякви йшрыцынхауа. Апхьарта аунашвачпагIвчва АААКи дари рацынхара агIвхъатакIгьи рсабап алазлушта йгьи джьащахъвазлушта йайгвгъитI.

АААК Апсны йауу абитуриентква СПбГЛТУ йыцIалырныс йырцхърагIуштI

Богатова Елена йшылпхьадзауала, апсуа-абаза диаспораква рабадырра тшауацIнарыхрала а-Конгресс алшаракви АААК ахабарргарта портал амчи гIарысабапта дырра нардза заура зтахъу абитуриентква асквш 2021 агIан Санкт-Петербург апны рахIа йпхатшу йхIаракIу апхьартаква йрыуу закIы йшзыцIалуаш ахабар уашIамсуата йыргара атахъыпI.

«А-Конгресс ауысхагIвчва хIари абитуриенткви хIанйараква адгалра апны швабыж йгIахIцхърагIитI, хIапхьарта апны йакIвшауа ауысква, йыншауа ашIыцраква рхабар йыздырра атахъу йырзынадырдзитI, хIызланхауа арыпхьара анархара хъадаква ауагIа йрыларгитI. Апхъахьыла хIара йхIгвыгъапI Апсни Трыквшти рпны йаъу йхIаракIу апхьартаква йапшым анархараквала хIрыцынхарныс, апроектква рыцхIырхъйарныс», – лхIватI Богатова.

Апсни Трыквшти йауата СПбЛТГУ хвыдъа йыцIалра зтахъкву ауаъа йаныцIалуа лкIгIарата йырзырчпуш атамам гIаддырдырра ахъазла info.spb@abaza.org электрон почтала, йа +7 812 514 88 55 телефонла Санкт-Петербург апны йаъу Адуней апсуа-абаза конгресс ауысхарта анхагIвчва тшырзынадырха йауаштI.

ЙЫЖВДЫРРА АХЪАЗЛА: Киров Сергей йыхьыз зхъу Санкт-Петербург йтагылу акъральыгIва бнатехника университет (СПбГЛТУ) асквш 2020 агIан сквш 217 ахъыцIтI. Ауи ъачIвагIа гIацIгарала аквтанай, йхIаракIу, йкIьыду арыпхьара программаква архъйитI; абна млыкврхIара, абнапкъра, амшIы адынхалра, абнахимия, ашвъабгъьычпара, агидролиз рхарджьра нархараквала архарджьра, анаука йгьи анаука-арыпхьара нхара йапщылу

аъачIвагIагIвчва арыхIазыритI, шIыц-шIыц йанарыпхьитI, ръазара йаланархIитI; анхара йаквыргIапсу, йцIолу анаука рхъвыхраква акIвнаршитI.

СПбГЛТУ акъраль йхIаракIу абнатехника апхьартаква зымгIва йрапхъата надзара щардала йалу аъачIвагIа арыпхьаща йазцатI. УахьчIвала ауаъа студентта 6000-гIв райхIа апхьитI, ауат йаргвану йгьи йхъару агIвыма къраль 42 йгIартыцIызгьи рылапI. Ауниверситет арыпхьари анаука рхъвыхракви рыхъазла щата багъьа амапI. Ауниверситет арыпхьагIвчва ргвып цIаста йщаквгылхьаз арыпхьащи анаука нхащи йрыццауата анархара шIыцквагьи тшауацIддрыхитI, ауатква зымгIва рнадзара шбзийу аъачIвагIагIвчва аквшахIатхитI. Арыпхьара акIвзыршауа апрофессоркви арыпхьагIвчви зуыс бзита йыздыруа гвыппI.

Ауниверситет йанакIвызлакIгьи Россия Федерация абнатехника апхьартаква наука йгьи методика квтата йырзалуан. Ауаъа йынхитI Россия а-Госстандарт ашвъа зму экспертиза Аквта, акъральква рацынхара ргIапсра йахъвыкIу Абна млыкврхIари абна рхарджьри рдуней квта (МЦЛХП – IСFFI), Европа абна институт Санкт-Петербург апны ашта проект квта, Адуней бна институт йаланакIуа абни абна пкъыгIваква ртехнологии рхъвшара.