МызкIы ацкIыс ймачIпI Апсны Республика апны алхраквадза йгIанхахыз. Ари магIын ду зму агIамта йхIаракIу акъральыгIва ъанатIа йазабакIуа акандидатква ралхра кампания акIвдыршитI, ауагIа йрынйитIта рпрограммаква ддырбитI, акъраль ауачIвамш рыла йшгIацIарыжьуа рхIвитI.

Адуней апсуа-абаза конгресси (АААК) «Алашара» адкIылари жвлара организацияпIта – аполитика абакIра йгьалалуам. Ауаса хIара багъьата йыгIдыритI алхра кампания йхътIыта, адемократия хабзаква йрыквыргIапста йакIвшара шатахъу. Акандидатква зымгIва ауагIа йрынйата рпрограммаква йрыхадыргIвазарныс ахъазла йацапшыта лшара рымазара атахъыпI.

Алхра хвитнагIа зму Апсны акъральгIвчваква датша къраль йтабзазауагьи рылапI, ажва ахъазла – Россия, шIыпIа кIьыдата йгIауахвырквын – ауи йаланакIуа Къарча-Черкес Республика. Черкесск апны, апхъала апшта, Апсны а-Президент даналырхуа атшын алхырта тып нхуштI.

ХIара акандидатква зымгIва КъЧР алхыгIвчва йрынйарныс, рпрограммаква ддырбарныс, разцIгIараква джьауап рыртырныс ахъазла лшара рзыгIаныршара магIын ду амата йыгIбитI. АААКи «Алашари» антахьгьыт ажвлара адкIылараква йрыцта ауи йапшу анйараква радгалра йацхърагIарныс йхIазырпI.

УахьчIва йалкIгIата магIны амапI алхраква радгалри ракIвыршари йырпщылу ауысква зымгIва ахабза апкъ йтагылазларныс. Апсны ауагIа азпшитI йхIаракIу акъральыгIва ъанатIа йазабакIквауа акъраль апхъаламгIвайсра шырбауа, ажвлара адызкIылуаш, акъраль йаззырхIуш, ауагIа рбзазаща шагъьхуш йазынхуш йалыргу рпрограммаква гIархIвушта. Йпрезидентхуш – ауагIахъа адызкIылта агIатгара шIыцква йрыквзыргвышхвуш дапхъагылагIвызлара атахъыпI.

Адуней апсуа-абаза конгрессгьи «Алашара» адкIыларагьи хъвдаквцIара хъадата йрыму адуней шабгу апны апсуа-абаза уагIахъа рацзакIыра хчара йгьи йрыбагъьара акIвпI. Ауи ахачIвы Апсны Республика атшауацIыхри акъагIари лшарата йызчпуш уыс хъадапI. КъЧР апынгьи Апсны апынгьи хIъадзанхауа асквшква руацIа йхIырхIаз ашвапха ажвлара ргIаджвыквцIараква сабапра ду шгIаргуа арцIабыргитI. ХIара ауи ашвапха зымагIальамату зымгIва йрыцагIвхIшарныс хIхIазырпI.

Багъьата йхъахIцIитI йымчу йгьи йазакIу акъральгIв жвлара ащаквгылра шакIву ареспублика азхIара лшарата йызчпуш. Къарута йхIылу адхIкIылырквын акIвпI магIын ду зму агIарбараква хIанырзынадзуш, ажвлара гIаныршараква анхIызрыбагъьуш, Апсны Республика къагIара ахъазла щата багъьа анхIзыгIаныршуш.

Эгьзакь М.ХI., Адуней апсуа-абаза конгресс ЙхIаракIу асовет аунашвачпагIв, «Алашара» Дуней адкIылара апрезидент