Апрель а 26 ащымта COVID-19 йгьи апхъала йлыхьуаз анахьанат азгIваква йгIархъшахъыцIыз ашвхIаусыгIвала сквшы 95 йыртаз ачымазагIв адуней лхIваджьтI. Ари ахабар аргатI ауагIа коронавирус шIкIгIара ачвхъыхчара йазалху а-Оперштаб.

Апсны азгIвадарахчара аминистерства атерапевт хъада Арчелиа Анжела йшылхIвазла, сквшы 95 зныбжьыз апхIвыс наскIьахьа Гвдауыта ачымазагIвтара дангIарг йшгIадрыбергьыльызла, ауи пневмании гипертонии лыхьуан, лчIачIаква гьызгIвадамызтI.

«Йлайъазауа йаналага арентген агIарбараква тIакIв йагъьхазтынгьи лара лаъаща хьантата дгIамгIвайсуан, луыс рахIагьи йзырхIатлуз лныбыжьла дъанаскIьадзаз акIвын», – лхIватI айъазагIв.

АчымазагIв хьпшрата дыззыбжаз зымгIва абгата йлыдыргалуан, ауи йаццауата йлыдыргалуан акоронавирус шIкIгIара ауысла АзгIвадарахчара адуней адкIылара ашвъаква йгIархIвауа амальква.

«АйъазагIвчва йрылшуз зымгIва рчпатI, ауаса лныбыжьла швабыж дъанаскIьахьаз йгIалцIла азгIва йгьзамайгIайтI», – лхIватI Арчелиа Анжела йцIыхъвахауата.

АчымазагIв COVID-19 шгIалахвыз апрель а 11 атшын йгIадрыбергьыльтI, ауаса мчбжьыкI айхIа ачымазагIвтара дщтIалныс гьлымуазтI, апрель а 20 атшын акIвпI дщтIарцIарныс данадгыл. Ауи агIан лызгIвадара швабыж йщаквысхьан.