Барганджиа Саид

Июль а 21 атшын Йхвбахауа апсыуа-абаза хъвмарраква ргIахътIра ртлапIахатI ахIаракIьатI пшдзаква ралажьрала. Ауи амщтахь анкъвакъвраква джвыквылтI.  

Аспорт гвыпква анкъвакъвуан махъарыхъварала, ащъа ахъалрала, парала, хIатлащтIыхрала, хIахъваущтрала, гIвра апхъанысрала, анашанаква райхсрала, аркъан ахърала, футболасрала, волейболасрала.

Анкъвакъвраква йрылаз щардагIвы йшгIалыркIгIузла, арат ахъвмарраква рпны йхъаду айгIайра гьакIвым, алазлара акIвпI.  

«Сара йхвынхауата сгIарылалитI арат ахъвмарраква. Ари апш лшара ъахIыму швабыж йбзипI: аспорт апны тшгIахIырбауа йахъазымкIва йапшым акъральква йгIартыцIуа хIайщчва хIрабадыритI, хIраргванхитI», – йхIвитI Апсуа кыт (Къарча-Черкес) йауу чкIвынкI.

ЛгвгIанаграква хIыцагIвылшатI Апсны йауу аволейбол гвып ркапитан Гунба Илона. «ХIара хIгвып йахьчIва пщын хIгIахъвмартI, зымгIва рпынгьи хIайгIайтI. ХIара арат ахъвмарраква йхынхауата хIгIарылалитI, хIгIайпхьадзагьи айгIайра гIатыгIгитI. Ауралагьи джьгарта тшхIрыхIазыритI йгьи швабыж йхIгвапата абаза хъвмарраква хIгIарылалитI», – лхIватI ауи.

Анкъвакъвраква рпны айгIайра рыцIа щарда гIатызгаз АлбыргIан кыт ргвып ракIвпI, ауат ракIвпI йаргьи аджьаз йгIалху, ауагIахъа рыпшдзагаквала йхърысу, йамырдауа акубок зквнадыргаз.
Арахьари асогIат, Шамба Тарас йыхьыз зхъхIвалгIаз акубок рквнадыргатI ЙынджьыгьчкIвын кыт ргвып.

АгIарбараквала йгIвбахауа йгьи йхпахауа атыпква агIвыршатI Къвбина йгьи Гвым ргвыпква.

Къарча-Черкес республика апны Абаза хъвмарраква йхвынхауата йакIвшитI. Ауи йгIалалуа аспортсменква рцришта гIвынаква сквшигIадзапхьадза рыцIа-рыцIа йтыбгIахитI, Россия ашIыпIа шIыцквагьи агIвыма къральквагьи гIацIанакIитI.