Июль а 23 Апсны апны АкъральыгIва баракъ амш дыртлапIатI, ауи апсуа-абаза уагIахъа сквшигIадза адуней шабгу апны йауацIыху гвыргъьахъвта йнардаслитI.
Барганджиа Саид
Апсны Республика АкъральыгIва баракъ амш дыртлапIатI Согъвым апны апщаша июль а 23 агIан. Агвыргъьахъв чкIвыныргIи спорти руысла ареспублика АкъральыгIва комитет йаднагалтI, ауыс йацыркIтI Согъвым къала аунашвахъцIарта чкIвыныргIи спорти руысла ахъвшара, Апсны Республика культурала а-Министерства йгьи Адуней апсуа-абаза конгресс.
ТшынларкIвата акъала хъада апны угвы йаланархIун апсуа ныпла йдрыпшдзата аурамквала йалсуаз йазалхыз автомобиль: амашина апсуа ашваква гIатгун, йаргьи аурам йыквыз ауагIа аргвыргъьун. АзджьакI ауи "дауыш ду зхъыцIуаз" автомобиль гIаларкIуанта агIахIвраква джвыквырцIун.
Абаракъ амш йазынархаз агвыргъьахъв уысква «МотоАбхазия» йгьи RidebikeApsny жвлараква йадыргалыз мотоциклли велосипедли гIамдарала йджвыквылтI. Ауи йызтахъу далал йауан. ЙгIайуашыз зымгIва акъала аунашвахъцIарта адзхъа апарк апны тшазыркIкIытI. АщардагIв амшгьи Апсынгьи йырдамыгъу анып рнапIыцIакIын. АуагIа рлактаква агвыргъьара гIарныпщуан, зымгIвагьи азаджв азаджв йайхIвахIвуан, рпсадгьыл акъагIари ажвгIванд мамыри азыртахъта йазхIвахIвуан.
Согъвым абзазагIв Габлиа Астанда хъвлапнипхьадза велосипедла дамдитI. Агвыргъьахъв йазынарху агIамдара уалал йауашта йанылдыр "швабыж дайгвыргъьатI".
"Са сшапшуала, ауи уаднакIылитI. ХIара зымгIва хIацыпI, хIгвыргъьитI. ЗымгIвагьи агвыргъьахъвла срайхIвахIвитI", – лхIватI Габлиа Астанда.
АРИ АГIАНШАРА АСУРАТЛЕНТА АПШРА>>
ЙащтагIайуата Чанба Самсон йыхьыз зхъу Апсны адрама театр апны АкъральыгIва капелла ашвахIвагIвчва концерт гIадырбатI. Согъвым абзазагIвчва щардагIв ауи апш концерт йапшырныс алшара гьагIврымщттI, йаргьи лахIвара мчы гIарыланацIатI.
"ЙъасхIвауагьи спхащитI, сара йахьчIва йапхъахауата хIкапелла аконцерт сапшытI. Ауат рашвахIваща кIара сзымхIвахуа сачпатI. Ари йапшу амш апсуа уагIа рашваква йалкIгIата угвы йнадзитI", – йлахIвараква хIыцагIвишатI Думава Марлен.
Амш йагIаншара хъадата йалтI ауагIа ргIамгIвайсра. Афакелква знапIыцIаз агвып йгIакIвдыршаз ауагIа метр 20 зуру, зган 10 метркI йнадзауа Апсны АкъральыгIва баракъ рымата АмхIаджьырква рдзытшпурамла йагIвстI.
"Ауи зджьара йгIанымхауата йгвлахIаран – ауагIа жвагIвпхьадзара урылата хIнып нкъвугарныс. Арат асквшква зымгIва сара ауат амгIвайсраква асуратква рпны йызбун акIвмызтын зынгьи сгьрыламызтI. Саъара гIасхъахIатI", – ллахIвараква гьылзыцIамкIтI Папава Марианна.
Ари атшын йакIвшатI йапшым атурых гIамтаква рагIан Апсны ауагIахъара агIарбагаква ргIарбартагьи.
АгIамгIвайсра амщтахь зымгIвагьи Апсны адрама театр апахь йайззахын ауаъа йырзадыргалыз ашвахIвари агIахIвракви йырпшытI. ЙгIайззаз рпахь йгIахъвмартI "КIавкIаз" уагIахъа гIахIврала ансамбль, Хвынцариа Отар йыхьыз зхъу ауагIахъа ъамапсымаква р-КъральыгIва оркестр йгьи "Шаратын" КъральыгIва ансамбль йалу асаби гIахIвра студия "Йайрума".
Ауахъ рахIагьи йарыпшдзатI згвы йгIащтIнахуаз зымгIва злаз "Аураща" апсуа ацгIахIвра.
ЧкIвыныргIи спорти руысла АкъральыгIва комитет аунашвачпагIв йтарагылыгIв йхъвдаквцIараква зырхъйауа Цушба Давид йгIаликIгIатI АкъральыгIва баракъ амш артлапIара "цIас пшдзата йшщаквгылхьаз". Ауи йшихIвазла, сынчIвагьи ауи йанакIвызлакIгьи апшта уагIа щардагIв алата йадыргалуашын, ауаса апандемия йгIалцIла йшыртахъыз апш йгьырзымчпатI.
"Абаргвыраква уадыркIылитI, йахьчIвагьи ауи хIаквшахIатхатI. Ари ймайрам агIамта ари апш гвыргъьахъв адыгIгалырныс йапшым адкIылараква гIахIцхърагIатI. ЙалкIгIата сшырзыразу расхIвра стахъыпI Адуней апсуа-абаза конгресс ауысхагIвчва, кIьыдата лыхьыз схIвапI апхIвыс советква рунашвачпагIв Ардзынба Гета. Зуыс ауи апшта бзита йыззырхъйауа ауагIа урыцынхарныс гвлахIарапI", – йхIватI Цушба Давид.
Ауи дшхъвыцуала, ага агвыргъьахъв йшыртахъыз апшта йырзадымгалызтынгьи, йхъаду – ахIауа апны анып амш апсып ныкъвун, ауагIа тшадыркIылын ахъвмарра йгIалалтI.
Агвыргъьахъв адгалагIвчва йрыуазаджвыз Адуней апсуа-абаза конгресс йаланакIуа апхIвыс советква рунашвачпагIв Ардзынба Гета АААК ахъазлагьи Апсны ауагIа зымгIва рыхъазлагьи ари амш анахьанат амшква йшгIарылхIвауа гIалылкIгIатI.
"Ари агвыргъьахъв адуней шабгу йхъылапсата йбзазауа абаза уагIахъа йгIарыцIанакIуа зымгIва аднакIылитI, йаргьи, ажва аламкIва, Апсны апны йауацIыхта йдыртлапIитI. Ауи акIвпI Адуней апсуа-абаза конгресс ауи йазынарху ауысква ансисквшагьи йызгIарылалуа", – лхIватI Ардзынба.
Ауи йшылхIвазла, цIыпхгьи АААК АкъральыгIва баракъ амш артлапIара йагIаджвыквцIагIвын йгьи йадгалагIвын.
"ЦIыпх хIара "Аураща" гIахIвра цIаста йгIаджвыквхIцIатI, ауи агвхахIвара, ацзакIыра гIазырбауа гIахIврапI. ХIара йхIчпауа зымгIва ацзакIыра йазынхитI", – йгIахIгвынлыргIвытI Ардзынба Гета.
Барганджиа Сандро йтгIачва йыцта Гагра дгIатыцIын агвыргъьахъв далазларныс дгIайтI. Ауи йшипхьадзауала, "ари йапшу ймайрам агIамта" агвыргъьахъвква йалкIгIата магIны рымапI.
"ХIара хIсабиквагьи хIыцта хIгIайтI. Швылаквала йыжвбитI ауат гвыргъьарата йтарцIауа, зымгIва шыргвапхауа. АуагIахъа фаша зышву ауагIа анубалауа мачIсачIпI, ауаса уахьчIва, анчва йбзирала, бзидздзагIв урынйитI. АцIайква йрымаджьащахъвата анып, афаша йырзынарху ахабарква йрыздзыргIвитI. Ауи гIальаматпI. ЗымгIвагьи АкъральыгIва баракъ амшла срайхIвахIвитI", – йхIватI агвыргъьахъв асас.
Агвыргъьахъв, ахъвмарра йалаз ауагIа рыуа щардагIвы, цIабыргыта, фаша рышван – дугьи хвыцгьи. АсабиквакI рдзамгIваква анып рнын.
Уатырба Милана 11 сквша дыртапI, ауи лабаду Барцыц Анатолий дйыцта дгIайтI. АпхIвыспачкIвын амаль лымата абаракъ амш шагIвлымщтуа гIахIалхIвтI. Ауи йазалхта йылзырдзахыз чгIвыча лымапI. Асквш шабгу ауи ари агвыргъьахъв дазпшитI бзидздза йылбауа аъахвтан лшвылцIара ахъаз.
"Сара ари агвыргъьахъв швабыж бзи йызбитI. ЙсзымчхIахуа сазпшуан", – лхIватI апхIвыспачкIвын.
ДжьапIуа Ардагьи лсабиква лыцта дгIайтI. Ауи йцIыхъвахауа ахысквша лтгIачва ари агвыргъьахъв шагIврымщтуа гIахIалхIвтI.
"Ауи, цIабыргыта, гIаншара дупI. Сара ссабиква йхвыцищтарагьи анып атурых рымагIальаматпI, ауи йгIанарбауа йазцIгIалитI. ЙалкIгIата ауат йхътIу анапIсаргвыцIа ргвапхитI. Ари йапшу агвыргъьахъвква атахъыпI, ауат асабиква рпсадгьыл бзи йшырбуш йазырбжьитI", – йылпхьадзитI ДжьапIуа Арда.
Абаракъ амш агIан, уагIа щардагIв злу антахьгьыт ауысква рпны апшта, йызтахъыз дзачIвызлакIгьи швъа йгIвыта АААК далал йауан. Ахъвлапын ауацIа а-Конгресс асатырква 30-гIвла йгIарылахIатI.
Агвыргъьахъв адгалагIвчва йдрыхIазырыз апрограмма йаналгагьи ауагIа цIыхквтадза йгьамцIымцIхтI: ашва рхIвун, йгIахIвуан йа ргвы чIвандзыкIьа йайчважвун.
Апсны Республика ауыжвгIанчIви къральыгIва баракъ асквш 1992 июль а 23 атшын Согъвым (Акъва) къала апны йакIвшаз Апсны Республика ЙхIаракIу асовет асессия апны асквш 1978 агIан йнарахвыз Апсны АССР а-Конституция къару амахымкIва, ауи атарала асквш 1925 агIан йнарахвыз Апсны ССР а-Конституция шгIащаквдыргылхуа ауысла щаквыргылра аннарахв амщтахь йдрыбагъьатI. Асквш 2005 йгIашIарышвта Апсны Республика АкъральыгIва баракъ амш гвыргъьахъв мшыта июль а 23 агIан йдыртлапIалитI. Ауи атшын Апсны апны ауагIа агвхахIвара йалата ахъвмарраква адыргалитI.
швталра йа тшаншвцIара атахъыпI.