Ажвлара проектлыхрала АААК апроект апкъ йтата Гал 1-хауа аквтанай апхьарта апхьагIвчва рыхъазла апсуа бызшвала арыпхьара джвыкврыжьтI.
Базба Селма
Апсуа бызшвала арыпхьара джвыквылтI Гал 1-хауа аквтанай апхьарта апхьагIвчва рыхъазла. Ауи апхъала гIвымшкI руацIа жвлара проектлыхрала атшыбжьара акIвшатI.
Жвлара проектлыхрала атшыбжьараква – АААКи чкIвыныргIи спорти руысквала АкъральыгIва комитети йацдырхъйауа проектпI. Апроект асквш 2024 йгIашIарышвта Апсны акъалакви акыткви рпны акласс ахIбаква рапхьагIвчва рыхъазла йакIвдыршитI, ауи гвыпла ацынхара агъьчIвра, ажвлара рыхъаз рыцIа магIны зму ахачIвква гIалкIгIара йгьи ауат рхъйа йшауаш амальква гIаура йырзынархапI. Акомиссия апсуа бызшвала арыпхьара ари апхьарта апны рыцIа йапхъу уыста йщаквнаргылтI.
Жвлара проектлыхрала апроект йахъпшылуа чкIвыныргIа рыцынхарали физкультура тшауацIнарыхрали АААК ахъвшара аъачIвагIагIв Квициниа Есма йапхъахауа агIарбараква гIахIалхIвтI.
«Жвлара проектлыхрала апроект апкъ йтата Апсны йапшым апхьартаква рпны 6 треннингкI акIвшатI. Апроект унашва ахъызцIауа жвлара проектлыхрала аъачIвагIагIвчва Чкадуа Лани Цквитариа Мати апхьагIвчва проектлыхра ащатаква йрыхадыргIвазатI, ауи анархарала дырра уымазларныс зсабапу гIаргвындыргIвытI. Гал апхьарта апны йакIвшаз атшыбжьара апсуа бызшвала арыпхьараква адгалрала апроект гIанарыцIстI», – лхIватI ауи.
Апсышвала арыпхьараква цымызкI йакIвшуштI. ЙарыпхьагIвызлуш Апсны Республика репатриацияла акомитет абашталагIвчва ашвъа йанцIарала ахъвшара аъачIвагIагIв хъада Хашиг Сария лакIвпI. Рхъвыхрата интерактив форматла йакIвшаз йапхъахуз апхьарасахIат дакъикъа 45 йнайтI. АпхьагIвчва арыпхьагIв йлабадыртI, рхъа йаквчважватI, уыста бзи йырбауа рхIватI, апсуа бызшвала дыррата йрыму гIадырбатI.
Хашиг Сария йапхъахуз апхьарасахIати дара апхьагIвчви лахIварата йгIалыларцIаз хIыцагIвылшатI.
«Адуней апсуа-абаза конгресс апсуа бызшвала арыпхьара джвыквнацIатI. Сара ауи апроект арыпхьагIвта салалырныс сгIадрайгватI. ЙгьцIаскIрым, ауи сгвы алагIваласра гIаланацIитI. Йауа ухIварыквын – апхьагIвчва дара ахIватI йадрыпхьарныс. Йаргьи ауи арыпхьара асабиква рыбызшвагьи, апсуаква ргвбайарагьи ддырдырныс рыцIагьи йыртахъхауата йадызгалра стахъыпI», – лхIватI Хашиг.
Жвлара проектлыхрала атшыбжьараква – АААКи чкIвыныргIи спорти руысквала АкъральыгIва комитети йацдырхъйауа проектпI. Апроект Апсны акъалакви акыткви рпны акласс ахIбаква рапхьагIвчва проектлыхрала анхара йгIаланадыркIырныс, рхъвыцщи рыршIыйари тшауацIддрыхырныс ахъазла йакIвдыршитI. ХIазту асквш ауацIа АААК атшыбжьара шIыцква ракIвыршара йахъазымкIва рыцIа пасата йгIалыркIгIахьаз апроектква рырхъйарагьи йадынхалуаштI.
швталра йа тшаншвцIара атахъыпI.