АГУ апны чкIвыныргIа р-Апсуа-россия форум анхара джвыквнацIатI. Ауи йагIаншара хъадата йалтI СогIвым дуней информация-технология форум (СМИТФ). Айззара чкIвыныргIи спорти руысквала АкъральыгIва комитети Апсны Республика Киберспортла Ассоциации (АКРА) йадыргалтI, ауыс йацнакIтI Адуней апсуа-абаза конгресс.
Йапхъахауа адуней IT-форум Апсны акъральыгIва университет апны анхара джвыквнацIатI. Ари агIаншара Апсны йахъазымкIва Россия аштаква йрыуата IT-индустрия йалу ауагIа, аъачIвагIагIвчва шIаква, ахIаракьатчпагIвчва йгьи аэкспертква азнакIкIытI.
«ХIара, Киберспортла Ассоциация агIащтийыгIвчва, хIкъраль апны IT нархарала йынхауа чкIвыныргIа, йара ахъаз киберспорт зымагIальамату зымгIва рыхъазла уатыкв гIанхIыршара хIтахъхатI. Апсны ага йдумызтынгьи, йынхауа акомпанияква зымгIва йырдыруазтынгьи, йаъапI ауат йырчпауа йауата арынок йгIаквмылс кIара. ХIгIаджвыквцIара АкъральыгIва комитет апны йацыркIтI, Анчва дырзыразхатI ауи ахъазла. Ауи акIвымкIвагьи йгIахIыцIагылуа анхартакви адкIыларакви хIшырзыразу рахIхIвра хIтахъыпI», — йхIватI АКРА аунашвачпагIв Берзениа Валерий.
Айззара йалакву апсуа технология компанияква ргIахъвыцраква тшрыхадыргIвазарныс, ауыжвгIанчIви цифра ахъвдаквыщтраква рдырырныс йгьи ауат апхъахьыла йыззцуш йаквчважварныс лшара рымапI.
Адуней апсуа-абаза конгресс аунашвахъцIагIв Реквава Темур чкIвыныргIа ргIаджвыквцIараква йрыцукIырныс магIныта йаму гIаликIгIатI йгьи Киберспортла Ассоциации дари рацынхара апны дахIврата йыззынадзаз дацIачIвагъватI.
«ХIара хIыхъаз швабыж йгвлахIарапI ари йапшу агвыргъьахъв ду хIъалахъву. Йшыжвдыруа апшта, АААК арыпхьара, культура, спорт рпны знархараквала йапшым проект щарда архъйитI. ЦIыпхищтара хIара джьгарта Апсны Республика Киберспортла Ассоциация хIацынхитI, хIкъраль апны ауи анархара тшауацIнарыхра хIацхърагIитI. ХIычкIвынчва швабыж йгврыхвапI, ауат йашIамсуа знадзара хIагIу анкъвакъвракви айззаракви адыргаллитI. УахьчIвагьи хIара ауи амайчра нхара агIарбараква хIрыквшахIатпI. Ари апшта йауацIыху айззара Апсны апны йапхъахауата йакIвшитI, хIаргьи ауи ансисквша хIазызддалуш цIасхушта хIгвыгъитI», — йгIаликIгIатI Реквава.
Рпроектква гIадырбатI «Аквафон», «А-Мобаил», «Система», StemLab, TicketMe датшагьи анхартаква. Стендипхьадза аргIапсраква хIбзазара рыцIа ймайрата йгьи йуыжвгIанчIвита йшырчпауа зырцIабыргуа швапхата йалтI.
«Ари айззара хIалата хIара зымгIвагьи йхIхIвитI хIкъраль апны туризм йахъазымкIва IT нархарагьи штшауацIнахуа. УахьчIва араъа быжьстендкI адгалапI, ауат йрыуата ахпа «А-Мобаил» йырчIвыпI. Араъа йгIарбапI йщаквгылу интернет аоператор А-home, «тыдз гвыбзыгъа» проект, «багIвча» проект. Ауи акIвымкIвагьи хIара хIызцынхаквауа гIахIырбитI. Ауат йрыуапI СТЭМЛАБ IT-апхьарта, йара ауи апшта хIызцынхауа Садзба Инари хIари «Ticket.Me» проект нахIрыскIьитI», — йхIватI «А-Мобаил» компания аунашвачпагIв йтарагылыгIв Хашба Арсоу.
Асасчва йыргвапхадзауата акомпанияква рстендква йрыдгылуанта агIахъвыцра шIыцква тшрыхадыргIвазун.
«СТЭМЛАБ араъа йадыргалуа акурсква, йыздынхалуа ашIыцраква, рдахIвраква гIанарбитI. Ажва ахъазла, 3-D печать, 3-D джыпхалыхра, йнапIылачпару аинтеллект 3-D модель йашIарышвра. Йара ауи йапшта араъа йгIарбапI адронква, ашIырпшыгаква, хIапхьагIвчва ауи атехникала анхара тшызлазырбжьауа анхагаква», — йхIватI СТЭМЛАБ ауысхагIв Булиа Давид.
ЧкIвыныргIа р-Апсуа-россия форум агIахътIра йазынархаз айззара щыбжьанымщтахь йакIвшатI. Ауи йалан Апсны Республика а-Президент Гвынба Бадра йгьи Апсны а-Министрква ркабинет агIащтийыгIвчва. ЙгIачважвара апны акъральыгIва ахъада ари йапшу айззараква магIныта йрыму дацIачIвагъватI.
«ПIатIу зкву асасчва, анбжьагIвчва, чкIвыныргIа р-Апсуа-россия форум йалу зымгIва! Гвылагьи псылагьи Апсны адгьыл апны швсрайгвитI. ХIара хIыхъазла чIахIра дупI Апсни России йауу апхъагылагIвчва шIаква адызкIылуа араса йауацIыху чкIвыныргIа райззара хIпны йадыгIгалырныс. Ари йапшу анйараква йалкIгIу магIны рымапI. Ауат чкIвыныргIа абадырырныс, ршвапха амырдарныс, рхъвыцраква агIвыршарныс йгьи йацрымагIальамату ауысква гIарауырныс лшара рыртитI. РахIа йхъадаху — ауат азхъацIара дрыбагъьитI йгьи хIкъралькви хIуагIахъакви разазаъащаква апхъахьыла йшцуш ащата щтIарцIитI», — йхIватI акъральыгIва ахъада.
Айззара агIахътIра йазынархата гвыргъьахъв концерт акIвшатI. ХымшкI руацIа ари ауатыкв апны йапшым ауысква йырзынарху асессияква, айчважвараква, атшыбжьараква йгьи амдараква акIвшуштI.