Апсны а-Фыр Джикирба Рауф ахIахъв йаницIаз асурат сквш 30 рымщтахь Гвма кыт апны йгIараухтI Апсны ашIара радкIылара «Апеипш», Ардзынба В.Г. йыхьыз зхъу айсра ртшхъвара амузей, Адуней апсуа-абаза конгресс йгьи Апсны АкъральыгIва шварагIарадара акъвырльыкъвхарта йаланакIуа Йазалху хъвдаквцIара зму аквта рпшгIагIвчва.
Апсны а-Фыр Джикирба Рауф йнапIыла ахIахъв йаницIаз, сквш 30 зхъыцIыз асурат гIараутI Гвма кыт апны Адуней апсуа-абаза конгресс, Апсны ашIара радкIылара «Апеипш», Ардзынба В.Г. йыхьыз зхъу айсра ртшхъвара амузей рынхагIвчва йадыркIылыз апшгIагIвчва гвып. Ауат йгIарцхърагIатI Апсны АкъральыгIва шварагIарадара акъвырльыкъвхарта йаланакIуа Йазалху хъвдаквцIара зму аквта.
Йшазхъвыцуала, йгIарауыз ахIахъв апны Апсны а-Фыр Джикирба Рауф асквш 1992 агIан хIваспала йтихуамцара пхIвыспа шIакI ллакта аницIатI. Асурат далымгаскIва йкъайчIвахын айбащра дпшцIалтI, йаргьи ауаъа даладзтI. Ахахъв йазыпшгIауа йшалагаз гIахIалхIвтI чкIвыныргIа ртшауацIыхрали физкультурали АААК ахъвшара аунашвачпагIв Квициниа Эсма.
«А-Конгресс апны хIара чкIвыныргIа радкIыларакви чкIвыныргIа йрыцынхауа акъральыгIва уысхартакви руысхагIвчва хIрынйалитI. Йапшым апроектква, ауысква анадыгIгалуа хIшацынхуш хIалачважвалитI. АхIахъв азыпшгIара ауысгьи ауат айчважвараква йгIархъшахъыцIтI. Квланба Саид ауи ахабар ангIахIайхIв заджвгьи гвалымста дгьгIанымхатI, йаргьи хIалалын апшгIараква адыгIгалтI», – лхIватI ауи.
АхIахъв гIарауныс ауи апхъалагьи йызнымкIва йцахьан, ауаса закIытагьи йгьгIарыдамхIвуазтI. Ужвыгьи зны ауи йатащтацахныс шгIаларгаз гIахIайхIвтI Апсны ашIара радкIылара «Апеипш» аунашвачпагIв Квланба Саид.
«Ауи ахIахъв ахабарква щарда цIуата йызгIахьан. Апсны ауагIа р-Абашта айсра агIан Джикирба Рауф йара батальонкI апны дйыцта йайсуаз сан лылаквала йылбатI ауи [Джикирба Рауф] айбащраква такIв йанашIас ахIваспа гIайахвта ахIахъв сурат аницIауа дшалагаз. ЙшгIацIцIызла, ауи пхIвыспакI лшIахъа йгIвуан. Ауаса асурат найырдзарныс дгьахамдзатI. Айбащраква атагIалагахтI. ГIвымшкIума анцIы ауи дщхатI. Асквш 2015 йгIашIарышвта ахIахъв гIахIауныс хIащтан, ауаса йгьгIахIыдамхIвтI. АйгIайра асквш 30 гIаргванхауа йаналага ауи ауыс атахъатахIкIхтI, Джикирба Рауф йхъмаштылра ахIатырла апшгIараква атаджвыквхIцIахтI», – йхIватI Квланба.
Лара Малиа Индира сентябрь амшква рагIан айсра апны йыншаз гIалгвалашвахырныс лчвхIатлапI.
«Асквш 1992 сентябрь а 18 дгIарщытI Рауф. Ауи йыцта датшагьи хIыпщыгIвчкIвынчва гIайщытI аснайпер. Ауи амщтахь ахIахъв зуысызда? СквшквакI анахъыцIх акIвпI схъа йангIаташвах Рауф хIваспала ахIахъв сураткI шаницIуз. УахьчIва сара сгвы ауи ахIатлара аквцIхта йызбитI», – лхъвыцраква хIыцагIвылшатI Малиа Индира.
АпхIвыспа лшIахъа зну ахIахъв гIазауыз Адуней апсуа-абаза конгресс хабарргарала ахъвшара апны анхара тшазызбжьауа Бгъанба Щазина лакIвпI.
«АхIахъв йану асурат хвыта йазибуз сазхъвыцын асуратчпагIв ауи йхътIыта зджьара йшгIаныймыжьуашыз гIасгвынгIвытI. Агьагьара снапшыгIапштI, дангIвуаз дызтагылаз аъащаква сыла йгIацIазжьын цIлащапIыкI йыцIакъайчIвахзапI-хIва сгвы йгIанагтI. Йаргьи ауаса акIвта йгIацIцIтI. АшвараххIвра йхънагIвахыз ахIахъв агIылахIва йубауа ацIла ащапIы йыцIан», – лхIватI ауи.
ЙгIарауыз ахIахъв Ардзынба Владислав йыхьыз зхъу айсра ртшхъвара амузей йарттI, ауаъа ауи дзачIвызлакIгьи дзапшуаштI.
швталра йа тшаншвцIара атахъыпI.