Адуней апсуа-абаза конгресс ашIыпIа хъвшараква рынхара агвынзыргIвуаши чкIвыныргIа йрыцынхуши анхагIвы йъанатIа гIвыджь азабакIитI. Ауат заманкIдза руысхаща дырхъвыхуата анхара йаладыргатI.
Барганджиа Саид
АААК ашIыпIа хъвшараква рынхара агвынзыргIвуаши чкIвыныргIа йрыцынхуши анхагIвы дгIалхрала анкъвакъвра агIарбараквала гIвыджь гIалырхтI. ХымызкI руацIа ауат агIвычкIвынчва акоординатор йхара атахъу ауыс дырхъйауата йынхуштI, ауи амщтахь АААК аунашвачпагIвчва заджв дгIалырхуаштI.
Анкъвакъвра йцIыхъвахауа ахъвы апны гIвыджь дырхъвыхуата пIатла шрыртуаш анкъвакъвра аъаща йгIанахIвитI. Ауи апIатла аналгара агIвыджь рыуа заджвгьи АААК нхара днармахвнысгьи ауаштI.
Афинал йалашваз агIвыджь АААК ЙхIаракIу асовет аунашвачпагIв Эгьзакь Мусса анкъвакъвра йалакваз данрачважва амщтахь йгIалырхтI. Ауи а-Конгресс агвып апсуа-абаза уагIахъа рыхъаз магIын ду зму ахачIвква рырхъйара йшазынхауа гIаликIгIатI: Апсни Къарча-Черкеси рпны йахъазымкIва адиаспора ъабзазауа акъральква зымгIва рпынгьи ауагIахъа адкIылра, цри бызшва, ацIасква, агвбайара гIахчара йгьи тшауацIдрыхра. Пандемия йгIалцIла ашIакIраква ъадзащаквгылаз йашIадрысыз анхара ужвы рыцIагьи мчыта йджвыквцIахра атахъыпI. АААК апахь йгылу ахачIвква рырхъйара рыласра ахъазла акIвпI нхагIвчва шIыц гIахвра затахъхазгьи.
«Ауыс рыцIа йаквыргIапсу нхагIвы дгIалхIхра ахъазла хIара анкъвакъвра адыгIгалтI. ХIара ашIара харзына хIымапI – дырра зму, йджьгару, йхъадахугьи – зуагIа, зкъраль рыхъазла згвы цхIауа», – йхIватI Эгьзакь Мусса.
АААК архъйагIв секретарь Гьыцба Инар йшихIвазла, анкъвакъвра 30-гIв гIалалтI.
«ЗымгIвагьи рдырраква бзипI, анхара йазгIашыкъпI, рхIальлагьи йпшдзапI, ауысхарагьи йазычпапI, агIвыма бызшваквагьи рдыритI. РахIа йхъадахугьи – гвалымсра гьрылзымбгIатI. Ауи йгIалцIла заджв-гIвыджь гIарылухырныс гьмайрамызтI», – йхIватI Гьыцба.
Йаргвану ахмызкI руацIа йгIалырхыз агIвыджь хачIв апхъата рпахь йгылазлуштI йаъу АААК ахъвшараква руысхагIвчва йрыцта апроектаква рырхъйари Апсны апны ахъвшара шIыцквагьи гIаныршари.
Акоординатор йхъвдаквцIараква
* АААК ашIыпIа хъвшараква ргIаныршара, АААК а-Устав йгIанахIвауа амурадкви ахачIвкви рыпкъ йтата ауат жвлара магIны зму проектта йдырхъйуш, уыста йырхуш лыхра джьгарта далазара;
* ашIыпIа хъвшараква рынхара рхъвыхра, ауат рхачIвква рыцIа йнардзата йдырхъйара ахъазла рацынхара аныргIалра;
* ашIыпIа хъвшараква йлырхыз ауысква андырхъйауа ауат рыцIа сабап щарда шгIаргуаш апшта йагвныргIвра, апроектква рлыхра апны зджьакIы йдырхIахьаз ашвапха бзиква гIарысабапра;
* АААК ашIыпIа хъвшараква йакIвдыршауа ауысквала йатахъу ашвъаква агвныргIвра, ауат ашвъаква рхъвыхра, АААК аквта уысхарта йшырщтийуаш ахъпшылра;
* йхъгалраква дырхъымсуата анхара агIарбараква азкIкIра – аунашвачпагIвчва анахIвара нхарата йакIвшаз ауысла йатахъу ашвъаква рыхIазыррагьи алата;
* ансисквша йакIвшалауа «Абаза» Культура-спорт фестиваль адгалра ацхърагIара;
* ашIыпIа хъвшараква уыста йакIвдыршауа ахабар АААК ахабарргарта портал аунашвачпагIви анхагIвчви йаназаману йдырдырра;
* ЙхIаракIу асовет аунашвачпагIв, архъйагIв секретарь, аппарат аунашвачпагIв апроектква рырхъйаща цIбата йацIырбауа ласыта йыррайшахра, апхъахьыла ауат рапш анхара йшгIаламшвахуаш амальква нахвра.
швталра йа тшаншвцIара атахъыпI.