Апсынгьи Россиягьи рпны спорт йамастерыз Бебиа Олег асквш 2023 май а 10 атшын йазалху айсра аоперция (СВО) апны йырхвыз айсчва шгIатыргахуазымца дырщытI. ЙгIайырбаз ахъацIара ахъазла ауи Россия Федерация ахъахчара а-Министерства амедаль, АхъацIара аорден йгьи 1-хауа астепень зму Георгий йджьуар гIайквнадыргатI. «Сокол» зшIытга хьзыта йызмаз айсыгIв дшгIабзазази дшщхази ажурналист, АААК апхIвыс совет аунашвахъцIагIв Бебиа Екатерина лгIвыра апны швапхьа.
Бебиа Екатерина
ЗапшсквшышвызлакIгьи йара афырква гIаншитI, афыруыс шIыцква акIвшитI, ауат ауагIа ргвква йгIартахитI. Асквшква 1941-1945 рагIан йакIвшаз Абашта айсра Ду, асквшква 1992-1993 рагIан йакIвшаз Апсны ауагIа р-Абашта айсра рымщтахь Донбасс апны йакIвшауа йазалху айсра операция йалата фашизми нацизми йырпшIагылу, хъацIара гIадырбауата з-Псадгьыл зхчауа афыр шIыцква рыгIамта гIаталтI. ЙрылапI ауат йдууым хI-Апсны апачва къайматквагьи. УахьчIвала ауат айбащраква хIреспублика йауата чкIвынчва 30-гIв рыладзхьатI, ауат дрыуазаджвыпI сара йсаргвану агIвычIвгIвыс – саща Бебиа Борис йпа Олеггьи.
Олег йыжвла Очамчыра район йаланакIуа КIвтIол кыт йаъапI. Ауаса йара дъагIадрийызгьи (асквш 1982 февраль а 11 агIан) дъагIадзынгылызгьи Гвыльрыпщ район йаланакIуа Агвдзера кыт апны акIвпI. Бебиа Олег Бигвава Дауыр йыхьыз зхъу Гвыльрыпщ аквтанай апхьарта дгIалгатI. Дшхвыцыз далаган спорт тшадикIылуан, йалкIгIата – бокс. Анкъвакъвраква дрылалуа даналага Россия йауу абжьагIвчва ауи рыла дгIацIашватI. ЙшIаз, йпшдзаз, йкъваданыз ачкIвын зынла гвы йырттI. Апхьарта дангIалга Олег боксла абжьагIвы Угрозов Игорь Валентин йпа дызшIитын Россия дцатI, ауи йунашва дацIата «Боевые перчатки» («Айсыга напIтараква») спорт клуб апны бокс тшазибжьун. Атшыбжьаракви анкъвакъвракви йрыцйырцауата асквшква 1998-2000 рагIан Ленинград область йаланакIуа Сосновый Бор къала йаъу 36-хауа аъачIвагIагIацIгарта лицей апны мшIычпагIвта дапхьун. Асквш 2000 август агIан ауи Россия апны спорт амастер хьзы гIатигатI.
Асквш 2002 агIан Пушкин А.С. йыхьыз зхъу Ленинград область акъральыгIва университет физкультурала ахъвшара дыцIалтI. Олег ауи йхIаракIу апхьарта апны йапхьаквуз дгIарылхIвун. Ауи Санкт-Петербург боксла йалакIу акоманда даларцIатI. ЙмагIщари йайрышри рбзирала йпахь мурадта йыргылуаз дырзынадзун – спорт апны йымгIвала рыцIа-рыцIа хIаракIыта дхъалуан. Ауи спорт дъадзалаз асквшква, дъадзайсызи айгIайрата йгIатигази, йымаз аспорт хьзы йгIарылцIла дахIвра зму боксерта дгIалыркIгIун. Заман айшысла Олег Борис йпа йыхьыз Россия апны йахъазымкIва ауи утыцIтагьи йырдыртI.
Асквш 2006 агIан Бебиа Олег арадиоактив пкъыгIваква йъарыдынхалуа азавод апны рчвагIвыта дынхауата йыла хвырта чвгьа адзатI. ГIван йпыркъытI, уацIыхъвангьи заман ауыра дгIащаквгылхуан, ауаса спорт кIайрышвра атахъхатI.
Олег тыдзра йчпатI. Ленинград область йаланакIуа Сосновый Бор къала апны дбзазун. Йхъапщыла Бебиа Юлия Василий йпхIа Россия а-Президент йпны йгIаныршу АкъральыгIва къвырльыкъвхара академия Алагъь-мараташварта филиал дгIалгатI, экономикала йхIаракIу дырра лаутI, йцIыхъвахауата Россия а-Пенсия фонд апны ъачIвагIагIв апхъагылагIвта дынхатI. Олеги Юлии хыгIвгIаричва раутI. РпхIахIба Кристина дмедахщапI, тахIа дцахьатI, лпхIа Аня дгIадзынгылитI. Рпа Баграт «атомклассква» рсеть апны анкъвакъвраква дрылазлитI, адипломква гIайквнадыргахьатI. РпхIайцIба Диана дзюдо тшадылкIылитI, мъа гIважь лымапI, артшхъвагаква гIатылгитI. Йазалху аоперация аламгаскIва Олег Апсны дгIайхта спорт бжьагIвыта дынхара йгвыгъан. Ауаса йшутахъу апш йанакIвызлакIгьи йгьцум.
Асквш 2022 сентябрь агIан Бебиа Олег СВО дызшIырттI, архысчва рбатальон далата атанкква ракетала йрайхсуа ахъвшара апны доператорын. Ажва гьалам, ауи йыла шйыхьыз ашвъаква дйырбата айсра тшацIнайырга йауашын, ауаса ауи гьйымчпатI. Купянск ахьыла Харьков область йаланакIуа Ольшана поселок апны къвырльыкъв йхун. Олег Борис йпа хъацIара гIайырбауа дайсуан. ЗшIытга хьзыта «Сокол» йыман.
Асквш 2023 мартI а 13 Олег йайсра гIатгараква рыхъаз «Йазалху айсра операция йалу» медаль гIайырттI. Асквш 2023 май а 10 йырхвыз айсчва ангIатыргахуаз Бебиа Олег дщхатI. Россия Федерация ахъахчарала аминистр йунашвала ауи ахъахчара а-Министерства амедаль, АхъацIара аорден йгьи 1-хауа астепень зму Георгий йджьуар гIайквнадыргатI.
Олег йыдзра ауи йаба Бебиа Борис (Рамин) Карбей йпа йызгIвадара щаквнарыстI. Ауи йпа даныцIайцIа амщтахь щарда днамихуата дйыщтацахтI. Борис Карбей йпа дгIвычIвгIвыс нардзан, йпсадгьыл дазцIабыргын. Ауи гIвпачва харзына гIадзынйыргылтI; сквш 30 райхIа Гвыльрыпщ аквтанай апхьарта апны дынхатI, ачкIвынчва айсра уыс йайрыпхьун, апхьарта амлыквгьи дахъпшылуан. Борис Карбей йпа арыпхьагIвчвагьи апхьагIвчвагьи пIатIу йыквырцIауата даъан.
НцIрала хIгвква уыртазтI, йшIаз, йпшдзаз, хъацIара злаз Бебиа Олег! НцIрала хIгвква уыртазтI, зпа фырта дзыгIзаз, кърар змаз гIвычIвгIвыс цкьата йгIабзазаз Бебиа Борис!
швталра йа тшаншвцIара атахъыпI.