Апсуа йгьи абаза гIвычIвгIвыс дуква йгIарыквчважвауа турых жвабапхьадзара азылкIытI лгIвыра «Ахъыкв йазцауа амгIва» апны Апсны агIвгIвчва йгьи ажурналистква радкIылараква йрылу Апсны къральыгIва университет апрофессор, йбергьльу апсуа журналист йгьи апублицист Бебиа Екатерина.

Ари Бебиа Екатерина лнапIы йгIацIцIыз й-49-хауа книгапI. Ауи йшылхIвазла, лынцIра шабгу йбергьльу агIвычIвгIвысква рхабарква азылкIитI. Ауи апшта, акнига шIыц апны бзагIвра 30 аныпI, лахьыта жвабапхьадзара гIарбапI. АбзагIвраквакI Бебиа архивква рпны дынхауамцара сквшы 20 райхIа руацIа йылгIвуан.

"СстудентыркIвата сара йбергьльу апсуаква рхабарква азскIуа салагатI. Ауат гIарыквчважвара сбзазара йауыс хъадахатI", – тшгIацIылххитI агIвгIвы.

Лгвы йалахIауата йгIалылкIгIатI ауи Адуней апсуа-абаза конгресс ЙхIаракIу асовет аунашвачпагIв Эгьзакь Мусса йгIайыквчважвауа абзагIвра. Ауи йахьылцIатI "Йузыджьамщауа Эгьзакь Мусса".

Ауаъа абаза уагIа йгIарылцIыз агIвычIвгIвыс ду Эгьзакь Мусса йбзазара амгIва, йпахь йыргылуа амурадкви ахачIвкви, йсабихъи йчкIвынхъи, йгIатгаракви йдамыхIвраква йгIарыликIгIуз адерскви дгIарыквчважвитI.

"Эгьзакь Мусса, цIабыргыта, дгIвычIвгIвыс джьащахъвапI. Сара ауи сквшы 20 райхIа цIуата дыздыритI, йанакIвызлакIгьи хвду азызбауата абаза уагIа рыхъаз йчпауа сапшитI. СынчIва сара сынасып йгIанакIытI апсуа-абаза хъвмарраква йрылаз сстудентква ауи йабасырдырырныс. Ауи анйара астудентква ргвы йгIатахатI. ГIвсахIаткI шагIвсыз заджвгьи гвы гьайымттI", – лгIагвалашвахраква хIыцагIвылшатI Бебиа Екатерина.

Ауи лкнига афырква дрыуазаджвыпI Апсны къральыгIва университет аректор Гварамиа Алекогьи. Ауи йгIайыквчважвауа абзагIвра агIвгIвы сквшы 20 райхIа дадынхалтI.

"Ауи агIамта ауацIа сара асуратква, абыжьква, авидео зну ашвъаква азскIуан. Ауи нхара щарда апщылан", – лхIватI ажурналист.

«Ахъыкв йазцауа амгIва» афырква йрыуапI агIвгIвы ЩынкIвба Баграт, йбергьльу апсуа политик йгьи ажвлара уыснкъвгагIв Уазган Константин, архитектор Смыр Игорь, Апсны йгIвыджьхуз рпрезидент Багапщ Сергей, апрофессор, академик Этлыхв Олег, йбергьльу абызшвадырыгIв, Къарча-Черкес къральыгIва университет наука нхарала апроректор ПIаз Сергей датшагьи гIвычIвгIвыс ду щардагIв.

АуагIа йгIарыквчважвауа Бебиа лбзагIвраква лфырква рбзазара арыхъвартаква баргвква гIанарбитI, ауи ауат рхIальква гIахъылтIитI, рсуратква уыла йгIацIалыжьуата йылгIвитI, архивква йгIарылху ашвъаквагьи ауат рбзазара йалаз агIаншараква гIадырцIабыргитI. АбзагIвраква зымгIва асуратквагьи рыцпI, ауат апхьагIв афыр йтурасы рыцIагьи абгата йыла йгIацIаржьитI. Асуратква райхIара акнига згIвыз йылчIвыпI.

"ЙызгIвуа зымгIва сгвы амчла, агIвычIвгIвыс йзынарху сбзибарала йырчвыпI. СгIазквчважвауа зымгIва згвыли зпсыли сара йсаргванхаз уагIапI. Сара ауат йанакIвызлакIгьи сгвы йтазлуштI, ауат скнигаква рпны йбзазитI. Сара йсжурналист борчта йспхьадзауа ари акIвпI – йызквнагу зымгIва къальамла атурых йгIалажьра. ЙуыгIвуа гьпсуами щта – ауи анцIрала йгIанхауа хъмаштылрапI", – кьангьаш гьазгIалгуам агIвгIвы.

ЗныкI ауи лфыркви лари рымгIваква алыстI. Ауат журналист йа наука, арыпхьара, жвлара уыс лырхъйауата дрынйатI.

Лара лхъатала йылбаз, архивква рпны йгIалауыз йырхъазымкIва «Ахъыкв йазцауа амгIва» книга апны гыларта ду ркIитI афырква йрабадыруаз ауагIа, ауат ръачIвагIалагIвчва ргIахIвахраква.

Лара Бебиа Екатерина багъьата йхъалцIитI "ахъыкв йазцауа запшмгIвазлакIгьи" шмайрам.

"Ауи абаргвыраквала, ймайрам ащаквыргылраквала йырчвыпI, ауаса ауат абаргвыраква дырхъысра ахъазла агIвычIвгIвыс зынгьи щтахьла йгIатымхъауа дабакIгIвызара атахъыпI.

Ари акнига йалу абзагIвраква ззынарху ауагIа ауи апш гIвычIвгIвыс хIаль рылапI – ауат абакIгIвыпI, ргвгьи мчыпI. ДзачIвызлакIгьи йпхыцIа йара-йара йлихитI. АгIвычIвгIвыс мчква рбзазара баргвыпI, ауи ауат асайитI. Арат абзагIвраква рфырква ргвы абайарала ухъыркъьалитI", – йылпхьадзитI агIвгIвы.

Адуней апсуа-абаза конгресс ЙхIаракIу асовет аунашвачпагIв Эгьзакь Мусса агIвгIвы дшылзыразу йхIватI. Ауи йгIаликIгIатI Бебиа Екатерина сквшщарда руацIа "дакъикъакIлагьи дгIашIамсуа" апсуа-абаза уагIа дшырзынхауа – ауат йгIарылцIыз йагъьу агIвычIвгIвысква, ауагIахъа ртурых апны рахIа угвы йгIатахауа йгьи угвы цIузыркIгIауа агIаншараква дгIарыквчважвауамцара.

" ЗымгIва хIыхъазгьи магIны зму йгьи йджьащахъву ари апш книга бнапIы йъагIацIцIыз ахъаз сгвы йгIатыцIуата снабайхIвахIвра стахъыпI. ЙхъасцIитI хIапхъахьылагьи книга джьащахъва щардала хIшбыргвыргъьуш. Ари й-49-хауа бгIацIщтрагьи ауи ззынарху зымгIва лахIвара щарда рызгIанарыцIсуаштI. Квырмыш бзысчпитI зтшын хIанйаз йгIашIарышвта уыста йбхауа ахъаз. Сара йсыласхIвитI хIуагIа гвылагьи псылагьи бзи йшббауа. ЙгIалскIгIара стахъыпI бынхара анадзара шхIаракIу", – йхIватI Эгьзакь Мусса.

Бебиа Екатерина Адуней апсуа-абаза конгресс ахабарргарта портал интервью рылтитI

© АААК / Авидзба Наала

АгIвыра экземпляр 400 йнадзауата йгIацIцIтI. ЙгIайуа амчыбыжь уалагата ауи Согъвым акнигатйыртаква рпны йузыхвгIуштI. ЗакIы сомшвкI йахвпI.