Апсны апны йпхъахауата йакIвшатI Къарча-Черкес апны сквшквакI цIуата йакIвшалауа «Абаза» фестиваль ду. Асквш 2019 апхын агIан Апсны йауата ауаъа гвып дукI аъан. ХIъачIвагIалагIв, ажурналист Бебиа Екатерина ауат июль амшква йырзылгIвыз асуратгIвыраква уахьчIва йгIатахIцIитI.
Бебиа Екатерина, АААК ахабарргарта портал йазалхта
Апсны апны йакIвшаз «Абаза» фестиваль сара апхын Къарча-Черкес апны ансисквша йакIвшалауа афестиваль хIалазларныс хIайщчва абазаква хIшрызцаз гIасгваланаршвахтI. Ауаъа хIъадзаныз амшква анцIрала сгвы йгIатахатI.
Агвыргъьахъв хIцитI!
Апсны йтыцIта КъЧР апны июль а 21 йгIашIарышвта а 23-дза йакIвшуз агвыргъьахъв – Абаза уагIа ркультура амш йцарныс зтахъыз автобускI азна – 47-гIвы йнадзатI. Ауат йрылан АГУ арыпхьагIвчва, жвагIвстудентчва, аспортсменква, ашвахIвагIв шIа Азизова Саиди ауи лбжьагIви, Адуней апсуа-абаза конгресс ЙхIаракIу асовет йалакву. ЗымгIва хIацыта Согъвым хIтыцIын Черкесскла хIджвыквылтI. Апсны йтыцIта йцуз агвып друнашвачпагIвын а-Конгресс архъйагIв секретарь Гицба Инар. Сара унашва зхъсцIуз агвып йасрыпхьауа астудентква ракIвымкIва йалан АГУ арыпхьагIв, Апсны апны йбергьльу ауысагIв СакIаниа Гвында, «Апсны ауниверситет» газет аредактор Чхамалиа Алхас, арыпхьагIв АмкIваб Ахра.
Ажва гьалам, амгIва уарыгIапситI… Ауаса Черкесск хIшнадзабыргуаз хIгIапсара хIхъаштылхтI. Пхата йгIахIпыралыз хIайщчва абазакви ауат йгвыргъьуз рлактакви къару шIыц гIахIыларцIатI. ХIапхъалагьи афестиваль – щарда хIзызпшуаз, йцIасхаз агвыргъьахъв пшдза хIпыран.
Йапхъахуз амш: хIайщчваква рпны сасра
Апсны йтыцIыз агвып йапхъахауата хIайщчва хIъарынйаз абаза кыт ахIбаква йрыуазакIу АлбыргIан уъарылалуа апны акIвпI. Абазаква ари акыт руагIахъа йыргарата йырпхьадзитI. Ауи атшын Абаза хъвмарраква ъакIвшушыз акыт аквта апны хIара швабыж пхата йгIахIпылтI.
ХIара, ажурналист ахIбачви астуденткви, аспорт анкъвакъвраква хIырпшра йахъазымкIва йыгIгIвуаш абзагIвраква рыхъазла абазаква йрыуата фыргьи – ажвлара рпны йбергьыльхаз агIвычIвгIвыс джьащахъваква гIахIауан.
ЙгIвбахуз, «ажурналистква йырчIвыз», амш:
КъЧР апны йгIвбахуз амш рыцIагьи уыс щардала йырчвын. Ауи «ажурналистква йрымшын» – ухIва ауаштI. Щымта АГУ йауаз хIгвып абаза газет «Абазашта» аредакция хIцатI. Агазет аредактор хъада – йгвапу, асасбзибара гIазныпщуа Къвыл Фардауыс зымгIва хIылрайгван аредакция анхагIвчва гвып хIрабалырдыртI, йлыцынхауа зымгIва пхата дрыквчважватI, «Абазашта» газет аквыдзахква хIлырбатI, агвып рдахIвракви баргвырата йзынйауи гIахIалхIвтI.
Ауи амщтахь Апсны йгIвыджьхуз апрезидент, Апсны а-Фыр Багапщ Сергей Василий йпа йгIайыквчважвауа хIкнига «Акъыльи ахъацIари рымгIва» апрезентация ъакIвшушыз Апечать атдзы айззарта пещ хIнардылтI.
Апещ уагIала йырчвын. Ауаъа йыгIвназ райхIарагIв Сергей Василий йпа дыздыруаз уагIан: агIвгIвчва, апхьахьаква, ажурналистква, адепутатква, ажвлара уысхагIвчва, чкIвыныргIа, сара сстудентква. ЙалачIвакваз рылаква гIасачважвун, сара ауат рыбызшва гIасгвынгIвуан, рлактаква хътIын йгьи йгвыргъьун. Ауат КIавкIази Апсни рпа цIабырг, акъыль ду зрыцIсуаз, згвы хътIыз Багапщ Сергей йсурат зныз акнига ахъкъьа йанапшуаз рхъа ду йшырбахуа, мачIкIгьи йшнашхыйахауа гвы астуан.
Заджвгьи йшIумырпшуаш агIвычIвгIвыс Эгьзакь Мусса
УацIыхъван хIстудентква зыхьыз абазакви апсуакви ъабзазауа йъакIвызлакIгьи йырхIвауа Эгьзакь Мусса йынйан швабыж йрымаджьащахъвата йачважватI.
ХIара заджвгьи йшIумырпшуаш, зуагIахъа зджьара йгIанымхауата бзи йызбауа, йрызцIабыргу, дгIакIвзыршауа зымгIва – зныбыжьла йнаскIьахьугьи ажурналист шIаквагьи – къарукI гIарылазцIауа ауи агIвычIвгIвыс гIвсахIаткI руацIа хIйачважварныс лшара хIыман.
МачIкI сапхъыспIта тIакIв рыцIа кIьасата йакIвшаз датша анйаракIгьи саквчважвапI: йащтагIайуаз атшын сара йагIвсыз асквшышв асквш 70-ква рагIан Согъвым апедагогика институт апны йсыцапхьуз абаза пхIвыспа Абыда Фалина слынйатI.
Фалина Эгьзакь Мусса йцри кыт Гым дауапI, хIанашIашвагьи сылцIгIатI: акыт абзазагIвчва Мусса ХIабальа йпа йчпауа ауысква йшпарзаъу? Ауи йбергьльу ажвлара уыснкъвгагIв, абзихагIв йыхъазла лара лгвгIанаграквагьи гIасалхIвырныс слыхIватI.
Ауи лджьауап ауацIыхын: сыгIвза зцри кыт, зуагIахъа шабгу рыхъазла бзира щарда зхауа ауи агIвычIвгIвыс йгIатгараква ауырата йгIашIылпхьадзун.
Абар ауи йылхIваз: «ХIара, Гвымлокт абзазагIвчва зымгIва, насыпрата йыгIбитI хIхъагьи ду йыгIбахитI згвылагьи зпсылагьи зпсадгьыл ауи аъара бзи йызбауа Эгьзакь Мусса хIкыт дъауу. Ауи саргьи квтанай дырра ъагIацIызгаз апхьарта дгIалгатI. Ауи зыхьыз хIарыф дула йыргIвуа дгIвычIвгIвыспI, йуагIа рыхъаз йгвы йыхьитI, хIкультура, хIыбызшва, хIлитература, хIшIалахIвара ргIахчара дахъгвыргIвитI. ХIкытлагIвчва рбзазара анадзара уыла йшуызгIацIамыжьуашыз апшта йгIащтIихтI. Йахчала акыт амгIваква рчпитI, «Алашара» спорт тдзы йыргылтI, тшпсщарта парк йчпатI, нхага техникакI ъаныз гIариттI, афачIвбжахIазырква ъарчпауа нхарта гIанйыршатI, хшнахвырта гIахъитIытI. Абаза тштлапкъква ъагIащаквдыргылхуаш тшырхIарта йыргылитI. Ансисквша апхьарта йапхъахауа акласс йцауа асабиква согIа рититI. Йцри кыт йахъазымкIва ауи йгватра абаза кытква зымгIва йырзынайырхитI. ХIара хIпсы апш бзи йыгIбауа Эгьзакь Мусса йгвы цкьата хIуагIа бзи йбитI, хIаргьи хIсабиквагьи дгIахIайгвгIвитI, йгвылагьи йпсылагьи йанакIвызлакIгьи дхIыцпI. Ауи хIуагIа адуней шабгу бзирала йдйырдыртI. Сара йгьсымбастI йгьи йгьсымгIастI аджвырагIв щарда зхътысыз, зхъа назмыркъвыз йуагIахъа ауи аъара бзи йбауата, ауи щтIихра ахъазла ауи аъара йчпауата. ХIара ауи квырмыш йзыхIчпитI, анчвата йдуугьи хIйыхIвитI ауи згIвадара багъьи нцIра ауыри йыйтырныс…»
Анхара йалаз ауагIа
МачIкI срыквчважвара стахъыпI ауат амшква руацIа сзынйаз, сызцынхаз ауагIагьи.
Схъа ду йызбахуа лунашва схIвара стахъыпI сахIварала Апсны йауаз агвып йрыларцIаз АГТРК апны йынхауа ажурналист шIа Кирвал Камилла. КъЧР хIъадзаныз ахымшкIгьи ауи тшпсщамгIва лымамкIва дынхун. Тшынла аоператори лари йхъырхуаз уахъынла асасырта апны, зымгIва тшанпсырщахуаз, дадынхалхуан, йабылтуан, кIара рзылгIвуан, асюжетква лрыхIазыруанта АГТРК йгIартныс йылщтиуан. Согъвым хIангIайх Камилла ужвыгьи йауацIыху репортаж къомкI адылгалхтI, ауат зымгIва пкъы рыцIата, йпшдзата йаъан.
ЙанакIвызлакIгьи апшта швабыж йсгвапан сара йгврыхву хIуысагIв СакIаниа Гвында дъахIыцыз. ХIгIвыджь хIацыта йызнымкIва Санкт-Петербург, Москва, агIвыма къральква рпны хIцахьатI. Ауат ацараква айхIарала хIыршIыйара йапщылан. Ари азын сара йстахъын «Акъыльи ахъацIари рымгIва» книга апрезентация апны СакIаниа Гвында дгIачважварныс. Багапщ Сергей йзынарху акнига ауысла Гвында лгIачважвара сшазпшуаз ацкIысгьи сгвы ахвгIатI. Ауи лгIачважвара амщтахь сгвы тынчхан схъа йасхIвхтI: «Апрезентация гIахIыдахIвтI!»
Ауниверситет йауаз хIгвып дгIарылскIгIара стахъыпI гIапсара зымдыруаз Чхамалиа Алхас. АхымшкI руацIагьи хIара щымта уалагата джьасыдза акультура-спорт фестиваль ауысква хIрылан. Асасырта кIьасата хIгIайхуан. Ага ауаса йаъазтынгьи Алхас агIвра дадзхъачIвунта асоциал сетква йгIартайцIуш йрыхIазыруан. Мшипхьадза шакIвшаз абгата уыла йгIацIаржьитI ауи йадигалыз асуратква, авидеорепортажква, йаницIаз абыжьква, йгIвыраква.
Ауаъа хIъадзаныз хIара операторти суратхъыхыгIвти дхIыцын астудент АмкIваб Девид. Ауи ауат ауысква йыхъвда йхъасцIата данхIыцнахIахв швабыж дайгвыргъьатI. Девид йпшгIауа, ймагIщауа, чIвецкI злу телеоператорти алахъвгIахъасра ззыгIакIуа дсуратхъыхыгIвти тшгIайырбатI. Ари абзагIвра йацу асуратква райхIара хъызхыз ауи йакIвпI.
Псардиа Алхас. ЙшIу, ауаса щардала узайгвыгъа йауаш, апсыуата йырбжьаз дчкIвынпI. ЦхърагIаракI ъатахъу йара дгIаншун, зымгIва йгватра рзынайырхун, хIабабапхьадзагьи ужвыгьи кIара чпара атахъызтын дазцIгIалун. АджвырагIв закIыла йыцкIра атахъызтын зымгIва рапхъа ауи днадзун.
Ужвыгьи студенткI, Читанаа Айнар, «Sputnik Абхазия» агентстства дыркорреспонденттагьи дхIыцын. Айнар КъЧР апны акультура амшква рыхъазла гIвыра къомкI гIаквицIатI, кIьыдата Эгьзакь Мусса йынхари йбзазари йырзынарху бзагIвра йыгIвытI. Ауи йгIвыраква гватрадъа йгьгIанымхатI, щардагIвы йдыртшхъвауата йрыквчважватI.
Йхпахуз амш: хIара хIапсуа баракъ
Афестиваль йцIыхъвахуз амш Апсны акъральыгIва баракъи Абаза уагIа ркультури рымш йазынархан. Ауи Черкесск аквта, Россия агIвадахьла йаъу рахIа йдуу апаркква йрыуу «ДзыгIвбжьа йачIва» апны йакIвшатI. Агвыргъьахъв хIара хIапсуа баракъ йарыпшдзун. Ауи йалан сасчва щардагIв – Трыквшта, Москва, Апсны, Ставрополь шта, Къарча-Черкес йрыуу апсуакви абазакви.
Йхпахуз амши агвыргъьахъв шабгуи йшцIасхаз апшта фейерверкла йалгатI. ЗкьгIвы райхIа йнадзуз ауагIа амцIыцIхырныс ргвы йгьамуазтI, йанамцIыцIхуазгьи йащтагIайуа асквш агIангьи Абаза уагIа ркультура амш апны йшанйахуаш йайгвгъун.
Ауи йджьащахъваз ахъвлапын амщтахь щымта щажьыта йызбаз зымгIва гвышхвара ду гIасылрцIауата сара Апсныла сгIаджвыквылхтI. ХIайщчва абазаква рпны йыгIгаз гвыргъьарала йырчвыз, йджьащахъваз ауат ахымшкI хIыгвква щардала йыртазлуштI.
швталра йа тшаншвцIара атахъыпI.