Апсны апны октябрь а 16-18 руацIа йапхъахауата йакIвшаз «Абаза» культура-спорт фестиваль Согъвым апны концерт дула йалгатI.
Адуней апсуа-абаза конгресс йапхъахауата Апсны апны йакIвнаршаз «Абаза» культура-спорт фестиваль октябрь а 18 Согъвым АмхIаджьырква рдзытшпурам апны гвыргъьахъв дула йалгатI.
Апсны акъральыгIва драмтеатр апахь сцена дыргылтI. Щыбжьан араъа акъала абзазагIвчви афестиваль асасчви айззауа йалагатI. ЗымгIвагьи ргвква гIащтIырхуа йгIагун ауагIахъа макъымква.
Азаджв йцIыхъв азаджв дтагыла ауатыкв йгIаталуан апсуа йгьи абаза гIахIвчва гвыпква, ашвахIвагIвчва, амакъымасчва.
Афестиваль алгамта асасчва аконцерт йахъазымкIва датшагьи джьащахъвара щарда рызпшуан. Агвыргъьахъв ъакIвшуз ауатыкв шта-штата йшан: араъа абазаква гIазырбауа апхъа заман агIан йхъырхыз суратква йыргIарбартапI, арахьараъа алингвист картаква йыртыппI, мачIкI унаскIьата Апсны акъральыгIва музей акъачIвахыртаква йгIарыгIвнырхыз апкъыгIвакви АлбыргIан кыт аэтнография музей апны йазкIкIу апкъыгIвакви ргIарбарта адгалапI.
Афестиваль йгIайыз ауагIа джьасыдза ахъвмарра йалан.
Апсны апны йапхъахауата йакIвшаз «Абаза» культура-спорт фестиваль октябрь а 16 атшын Адуней апсуа-абаза конгресс ЙхIаракIу асовет аунашвачпагIв йкубок ахъазла хвитта абакIрала адуней анкъвакъвраквала йгIалаган хымшкI йнайтI.
швталра йа тшаншвцIара атахъыпI.