Россия алагъь къала хъада апны йакIвшатI КIавкIаз ауагIахъаква ркультура IХ афестиваль, ауи йапхъахауата йалан Адуней апсыуа-абаза конгресс ащтийыгIвчва.
Барганджиа Саид
АААК йаланакIуа Санкт-Петербург ашIыпIа хъвшара агIахIвчва гвып йгьи а-Конгресс йалу ашвахIвагIв Шашура Диана Санкт-Петербург апны йакIвшаз КIавкIаз ауагIахъаква ркультура IХ афестиваль йалан. Ансисквша йакIвшалауа ари афестиваль сынчIва йапхъахауата йалалтI АААК ащтийыгIвчва.
Агвыргъьахъв концерт апрограмма йалан КIавкIаз ауагIахъаква рэтнокультура цIасква гIазырбауа атеатр ргылчIвква, ахореография, ашвахIвара гIахъвмарраква, аъамапсыма макъымква йгьи аминиатюраква. Апсыуаква ракIвымкIва рыршIыйара гIадырбатI азербайджанква, армальква, адагъстанква, айынгвыщква, акъарчаква, асатинква, ачеркесква йгьи ачачанква.
Агвыргъьахъв даквчважвауата Шашура Диана йшгIалылкIгIазла, афестиваль бзита йадыргалтI, ларгьи йылгвапата ауаъа ашва лхIватI.
«Сара швабыж йсгвапапI афестиваль апны хIреспублика ахьызла ашва ъахIхIвазгьи гIахIвра пшдза ъагIахIырбазгьи, йшспхьадзауала, хIылшараква йрылахIырхIатI», – лхIватI апсыуа ашвахIвагIв.
Ауи йшылхIвазла, афестиваль апшыгIвчва тшызхадыргIвазуз йапшым акъалакви акъралькви ргIамдара аджыпха йтагылата йакIвшун. Апрограмма агIахъвмарра зигIваквала йырчвын. Ахъвшараква рбжьара йапшым азъазараквала амастер-классква нхун, ацIыхъвадза зымгIвагьи гьагьата йгIалагылын агваран гIахIврала йдырчвытI. «Ауи асахIат хIара зымгIвагьи хIпны хIаъазшва хIыла йгIацIалуан», – лхIватI Шашура.
АААК Санкт-Петербург ашIыпIа хъвшара аунашвачпагIв Реквава Темур йшгIаликIгIазла, а-Фестиваль дара акъала абзазагIвчвагьи асасчвагьи бзи йырбауа цIаста йакIвшалауа гвыргъьахъвыпI, ауи йгIалцIла АААК ащтийыгIвчва кьангьашкIгьи азгIарымгуата ауи йалалтI.
«Афестиваль йалалырныс йандрайгва хIычкIвынчва йыргвапата йадгылтI, йшпакIву ухIварыквын ари ауатыкв хIкультура, ауи апшдзара йатаркIвах йгIахIырбарныс амаль шIыцта йхIзалтI. ЧкIвынргIа мызкIы ауацIа тшдрыхIазыртI, апшыгIвчва зымгIвагьи швабыж йыргвапхаз агIахIвра дыргылтI», – йхIватI Реквава.
СынчIва Санкт-Петербург апны йакIвшуз КIавкIаз ауагIахъаква ркультура IХ афестиваль апрограмма нархара щардала йалан. Аконцерт ахъазымкIва ауи йалан КIавкIаз ауагIахъаква руагIа ршIыйара анапIлачпараква йгьи абзазагаква ргIарбарта, хна суратчпарала, кIьанджьчпарала, гобеленчпарала, ауагIахъа гIахIвраквала амастер-классква.
Санкт-Петербург апны КIавкIаз ауагIахъаква ркультура афестиваль асквш 2010 йгIашIарышвта ансисквша йакIвшитI. Арат асквшква руацIа ауи КIавкIаз йауата Санкт-Петербург йтабзазауа ауагIа швабыж йыргвапхауата йбергьыльхатI. Афестиваль йадгалагIвпI Санкт-Петербург ауагIахъаква ртдзы йгьи ауагIахъа азазаъащаква йгьи амиграция политика архъйара руысла Санкт-Петербург акомитет.
швталра йа тшаншвцIара атахъыпI.