КIавкIаз ащхъа уагIахъаква мчыла рышта йтыргищтара зтшын сквш 155 цIуаз АААК ауысхагIвчва Согъвым апны КIавкIаз айсра йаладзыз рчвахъабага син ащапIы хIврапшдза щтIарцIатI йгьи Апсни Трыквшти рпны ачвахъабага лентаква «Ашьамаҟа» ауагIа йрыларшатI.
Барганджиа Саид
Адуней апсуа-абаза конгресс ауысхагIвчва ргвып КIавкIаз айсри амхIаджьырри рызарар зквшваз ауагIа квырмыш рзырчпауата агIваша, май а 21 агIан Согъвым АмхIаджьырква рдзатшпыурам апны йгылу ахъмаштылга син хIврапшдза азыщтIарцIатI.
АААК архъйагIв секретарь Гицба Инар йшгIаликIгIазла, КIавкIаз айсра аналгаз амш йазынарху алалраква йанрылалуа ажвлара уыснкъвгагIвчва «ужвыгьи зны хIтурых шхIхъмаштылуа гIадырбитI, йгIадзынгылуа абанпараква ауи амагIны гIаргвындыргIвитI, ауи акIвымкIвагьи адуней шабгу апны апсуа-абаза диаспора радкIылра ахъазла ужвыгьи аъащаквакI гIандыршитI».
Апсуа-абаза уагIахъа йгIарыланакIуа зымгIва ауи атшын тшырзынайырхатI АААК ЙхIаракIу асовет аунашвачпагIв Эгьзакь Мусса.
«Апсуа-абаза, убых, адыгьа, йхIайщчву анахьанат ауагIахъаква тшырзынасырхитI йгIарыдсылыз, рыштаква йтызгата къраль швбжакI райхIа рпынквала йхъылазпсаз арыцхIагIара ду ншищтара сквш 155 ъацIуа ахъазла. ХIара ауат агIаншара чвгьаква хIгвква йгьыртыцIуам, ауи ахъмаштылра йгIадзынгылуаш абанпараква рыхъазла бзазара лашара ауыхвара апны йгIахIцхърагIара атахъыпI», – йхIватI ауи.
Эгьзакь Мусса йгIаликIгIатI аконгресс йалу зымгIва «хIуагIахъа йрылахьхуш йъахъгвыргIвауа, хIыжвла ъану хI-Псадгьыл йасабапхарныс ъартахъу» йшаднакIылуа.
«АААК анхара зымгIва йрапхъата йыззынарху апсуа-абаза йгьи аубых уагIахъаква рэтнокультура ацзакIыра рыбагъьара, ауат рсоциал-экономика йгьи ркультура тшауацIыхра ацхърагIара, ращтаныкъвара гIащаквыргылхра, апсуа-абаза диаспори ауат рыжвла ъану р-Псадгьыли рабадырра рымчра акIвпI», – дацIачIвагъватI ауи.
КIавкIаз айсра алгищтара сквшы 155 ъацIуа йазынархата аконгресс агIаджвыквцIарала Апсны акъалакви Трыквшта йбзазауа апсуа-абаза диаспора рквти «Ашьамаҟа» (апсчва йырзадыркIуа ачвамза йахьызпI – аредакция ррытаразга) акция акIвшатI. Апсуаква рпсчва йырзадыркIуа ачвамза зну лента зкьпхьадзара КIавкIаз айсра азарар зквшваз зджьабуз ауагIа йрыларшатI.
Апсны апны ауат алентаква «Ахъмаштылра амгъымца» йа «НартыргIа рымца» ахьызта АмхIаджьырква рдзатшпыурам апны йгылу КIавкIаз айсра йаладзкваз рхъмаштылга син адзхъа йадыргаллауа йцIасхаз айззараква рпны аконгресс йалакву йыршун.
Гицба Инар йшихIвауала, ари апш акция ансисквша йадыргаллуштI. АААК архъйагIв секретарь дгвыгъитI «Ашьамаҟа» лента «КIавкIаз ауагIахъаква рыхъаз йжьыхьыдаз агIамта йагаз ауагIа рхъмаштылра йадамыгъата йалуашта».
Аджьабара айззараква йрылан Трыкв Республика йгIатыцIхта Апсны йгIайхыз арепатриантквагьи. Ауи апшта, Трыквшта йбзазуз, аубыхква йгIарылцIыз Чаха Сурейа ари атшын ХIХ асквшышв агIаншара рыцхIагIаква йрыладзыз лапхъанчIвиква квырмыш рзылчпарныс дгIайтI. Ауи йшылпхьадзауала, «ари йапшу ауысква апсуа-абаза уагIахъа йгIарыланакIуа зымгIва рыхъазла магIын ду рымапI».
«ЙхIхъхIраштыл йгьауашым апсуаква мчыла рцри шта йантырцуз асквш ткIьийква. ХIаргьи йгIадзынгылуа абанпараквагьи ауатква хIхъхIраштылныс хIгьахвитым», – лхIватI ауи.
Трыквшата апны апсуа-абаза диаспора ауысхагIвчва Трыквшта апны йазалху хъвдаквцIара нкъвызгауа Апсны ащтийыгIв Харазиа Вадимгьи рапхъа дгылата КIавкIаз айсра йаладзыз квырмыш рзырчпауата йырджьабатI апсуа кыт Бабалы апны – йшырпхьадзауала ари ашIыпIа атшпы акIвпI Апсны йауаз амхIаджьырква йапхъахауата йъагIадгылыз.
Адиаспора йауу йыргвапата йацыркIтI акция «Ашьамаҟа» йгьи Апсны йгьи адунейла акъральква йыртабзазауа рабашталагIвчва йшрыцIагылуа гIадырбауата ачвахъабага лентаква ргвпква йыркIыддыркIылтI.
КIавкIаз айсра йаладзыз рджьабауата квырмыш рзырчпатI Къабард-Балкъар Республика апынгьи. "Абаза" адкIылара, "Алашара" адкIылара рщтийыгIвчва йгьи АААК йалакву швыгIвпхьадзарала абаракъква рымата амитинг йадгылтI. Къарча-Черкес Республика ажвлара КIавкIаз айсра йаладзыз рчвахъабага син адзхъа митинг акIвдыршатI йгьи ауат квырмыш рзырчпауата йырджьабатI.
Ансисквша май а 21 атшын КIавкIаз айсра йаладзкваз рджьабитI. Асквш 1864 ари атшын Кбаада ахва (ужвы Россия йаланакIуа Атшшарта Къапщы – аредакция ррытразга) апны сквшышвбжакI раъара йакIвшаз КIавкIаз айсра ъалгаз йазынархата айсыгIвчва рпарад акIвшатI. Аурышв ры райгIайра уагIа швынзыкьыгIвпхьадзара рпсадгьыл рыквнахтI. ТгIачва щарда Осман паштахIыгIвала йайтыпахра атахъхатI, ауаъа йтыцIхуа анахьанат акъральыква йрылалхуамцара адунейла йхъылапсахатI.
швталра йа тшаншвцIара атахъыпI.